10. Apay a maikunatayo a naparebbengan dagiti napulotan a natda ‘kadagiti nasion ken pagpagarian’?

¹⁰ Kas “Ari ti nasnasion,” ni Jehova binilinna ni Jeremias a mangipakaammo iti mensahe a pannakaukom ti nasnasion ken pagpagarian. (Jer. 10:6, 7) Iti ania nga anag a naparebbengan dagiti napulotan a natda ‘kadagiti nasion ken pagpagarian’? (Jer. 1:10) Kas iti nagkauna a propeta, ti klase Jeremias ket immawat iti annongen manipud iti Soberano ti uniberso. Gapuna, nadutokan dagiti napulotan nga adipen ti Dios a mamakdaar maibusor kadagiti nasion ken pagpagarian. Gapu ta inautorisaran ida ti Kangatuan a Dios ken us-usarenda ti nasin-aw a pagsasao a linaon ti naipaltiing a Saona, iwarwaragawag ti klase Jeremias a dagiti nasion ken pagpagarian ita ket maparut ken madadaelto iti inkeddeng ti Dios a tiempo ken iti bukodna a pamay-an. (Jer. 18:7-10; Apoc. 11:18) Determinado ti klase Jeremias nga agtultuloy a mangitungpal iti inted-Dios nga annongenda a mangipakaammo iti mensahe a panangukom ni Jehova iti intero a daga.

14, 15. (a) Ania ti imbunga ti panagtalinaed ni Jeremias a matalek iti annongenna? (b) Ania ti bigbigen ti ili ti Dios maipapan iti trabaho a panangasaba?

¹⁴ Malaksid iti awan sardayna a panangipakaammo ni Jeremias kadagiti pakdaar ken panangukom ni Jehova, impapusona pay ti annongenna a “mangbangon ken mangimula.” (Jer. 1:10) Adda nasayaat nga imbunga ti trabahona nga agibangon ken agimula. Dadduma a Judio agraman dagiti saan nga Israelita, a kas kadagiti Recabita, ni Ebed-melec ken Baruc, ti nakalasat iti pannakadadael ti Jerusalem idi 607 K.K.P. (Jer. 35:18, 19; 39:15-18; 43:5-7) Dagita a nasungdo ken managbuteng iti Dios a gagayyem ni Jeremias maitutop nga iladawanda ita dagiti addaan iti naindagaan a namnama a gagayyem met ti klase Jeremias. Maragsakan unay ti klase Jeremias a mangpabpabileg iti pammati ti “dakkel a bunggoy.” (Apoc. 7:9) Umasping iti dayta, dagitoy a nasungdo a kakadua dagiti napulotan maragsakanda unay a mangtulong kadagiti nasingpet a tattao a mangammo iti kinapudno.