NAGLALAOK A BUNGGOY

Grupo dagiti saan nga Israelita (ganggannaet) a pimmanaw iti Egipto a kadua ti nasion ti Israel. (Ex 12:37, 38, Rbi8 ftn; idiligyo ti Ex 12:43-49.) Mabalin a ti dadduma kadagitoy a tattao ket Egipcio wenno sabsabali pay a ganggannaet a pinilida ti sumurot iti pudno a Dios ken iti nasion ti Israel kalpasan a nasaksianda ti sumagmamano a panangdidigra ni Jehova iti Egipto. Ti dadduma itoy a grupo ket nalabit dagiti Egipcio a nangasawa kadagiti Israelita agraman dagiti nagbalin nga annakda. Kas pagarigan, ti babai nga Israelita a ni Selomit a kameng iti tribu ni Dan ket maysa nga Egipcio ti asawana ken addaanda iti maysa nga anak wenno nasursurok pay.​—Le 24:10, 11.

Iti Numeros 11:4, nadakamat manen daytoy a grupo ti “naglalaok a bunggoy [wenno, ummong (ti tattao); ti nariribuk a tattao].” Awan duadua a gapu ta saanda nga Israelita ken gapu ta narigat ti panagdaliasat idiay let-ang isu a nagbalinda a managreklamo, a nakaigapuan ti panagririri. Naaringanen dagiti Israelita iti panagrekreklamoda gapu iti inaagum a tarigagay, isu a nangrugida met nga agsangit a kunkunada: “Anian ta malagipmi ti ikan a kinkinnanmi idiay Egipto nga awan bayadna, dagiti pipino ken dagiti sandia ken dagiti kutsay ken dagiti lasona ken ti bawang! Ngem ita mamagmagan ti kararuami. Awan lattan ti makitkita dagiti matami no di ti manna.”​—Nu 11:4-6.

Iti Nehemias 13:3 ken Jeremias 25:20, ti sasao a “naglalaok a bunggoy” ket tumukoy kadagiti saan nga Israelita. Ti natukoy iti Nehemias ket dagiti ganggannaet a kas kadagiti Moabita ken Ammonita. (Ne 13:1) Ti immun-una a napasamak a panangpapanaw dagiti Israelita kadagiti ganggannaet nga assawada ken annakda ti mangipakita a karaman kadagitoy naglalaok a bunggoy ti annak dagiti ganggannaet (Israelita dagiti ammada).​—Esd 10:44.