No Apay nga Importante a Maammuam ti Sungbat
Apay nga importante a maammuam no adda Namarsua? No nakombinsirka kadagiti ebidensia nga adda mannakabalin-amin a Dios, baka kayatmo met nga ammuen dagiti ebidensia a ti Biblia ket naggapu kenkuana. Ket no agtalekka iti ibagbaga ti Biblia, mapadasam dagitoy:
Naragragsak ti biagmo
KUNA TI BIBLIA: ‘Nasayaat ti ar-aramid [ti Dios], nga ipapaayannakayo iti tudo manipud langit ken adu nga apit, a pempennekennakayo iti taraon ken parparagsakenna ti pusoyo.’—Aramid 14:17.
TI KAIPAPANANNA: Amin a banag a mangmangted iti ragsak kenka ket regalo ti Namarsua. Mas maapresiarmo dagita a regalo no maammuam no kasanoka kapateg iti Nangiregalo kadagita.
Makabirokka kadagiti pammagbaga a makatulong kenka ita
KUNA TI BIBLIA: “Maawatamto no ania ti nalinteg ken umiso ken patas, ti intero a dalan ti kinaimbag.”—Proverbio 2:9.
TI KAIPAPANANNA: Gapu ta pinarsuanaka ti Dios, ammona ti kasapulam tapno agbalinka a naragsak. No adalem ti Biblia, adu ti masursurom a makatulong kenka.
Masungbatan dagiti saludsodmo
KUNA TI BIBLIA: “Masarakamto ti pannakaammo maipapan iti Dios.”—Proverbio 2:5.
TI KAIPAPANANNA: No maammuam nga adda Namarsua, makatulong dayta tapno mabirokam ti sungbat dagiti importante a saludsod a kas iti: Ania a klase ti biag ti kayat ti Dios para kadatayo? Apay a nakaro ti panagrigrigat? Ania ti mapasamak kadatayo no mataytayo? Mabirokam dagiti makakombinsir a sungbat iti Biblia.
Agpokuska iti namnama iti masanguanan
KUNA TI BIBLIA: “‘Sigurado nga ammok ti pampanunotek para kadakayo,’ kuna ni Jehova, ‘ikkankayo iti talna, saan a didigra, tapno maaddaankayo iti nasayaat a masakbayan ken namnama.’”—Jeremias 29:11.
TI KAIPAPANANNA: Ikarkari ti Dios nga iti masanguanan, pukawenna ti kinadakes, panagrigrigat, ken uray ti ipapatay. No agtalekka kadagiti kari ti Dios para iti masanguanan, makatulong ti namnamam tapno naturedka a mangsango kadagiti inaldaw a problema.