Jeremias 33:3—“Awagannak, ket Sungbatankanto”

“Awagannak, ket sungbatankanto ken nakasaganaak a mangibaga kenka iti naindaklan ken di maawatan a bambanag a saanmo pay nga ammo.”—Jeremias 33:3, Baro a Lubong a Patarus.

“Awagannak ket sungbatankanto. Ibagakto kenka dagiti nakaskasdaaw ken naindaklan a banag a saanmo pay nga ammo.”—Jeremias 33:3, Ti Baro a Naimbag a Damag Biblia.

Kaipapanan ti Jeremias 33:3

Kadagita a sasao, iyaw-awis ti Dios kadagiti tattao nga umawagda kenkuana iti kararag. No inawat dayta dagiti nakangngeg iti awis ket nagkararagda iti Dios, ipakaammona kadakuada ti mapasamak iti masanguanan.

“Awagannak, ket sungbatankanto.” Ti termino nga “awagannak” saanna la a basta kayat a sawen ti panangawag wenno panangipukkaw iti nagan ti Dios. Iti daytoy a bersikulo, ti panangawag iti Dios ramanenna ti panagkiddaw iti tulong ken panangiwanwanna babaen ti kararag.—Salmo 4:1; Jeremias 29:12.

Dayta nga awis ket mabalin a para idi iti nagkauna a nasion ti Israel. Saan a nagmatalek iti Dios dayta a nasion ken pangpangtaan ida ti armada ti Babilonia. (Jeremias 32:1, 2) Aw-awisen ni Jehovaa dagiti Israelita nga agsublida kenkuana babaen ti panangawagda kenkuana iti kararag.

“Nakasaganaak a mangibaga kenka iti naindaklan ken di maawatan a bambanag a saanmo pay nga ammo.” Dagiti banag nga ikarkari ti Dios nga ipakaammona ket “di maawatan” (wenno, saan a maammuan) gapu ta saan a kabaelan dagiti tattao nga ammuen dagita a bukbukodda. Ti termino a “di maawatan a bambanag” ket mabalin met a maipatarus kas “nakalemmeng a bambanag.”

Ania dagiti “nakalemmeng a bambanag” nga ipakaammo ti Dios? Dagiti mapasamak iti masanguanan—madadael ken mabaybay-an ti nagkauna a siudad ti Jerusalem, ken maibangon ken mapagnaedanto manen. (Jeremias 30:1-3; 33:4, 7, 8) Ngem inkari met ti Dios a saanna nga ipalubos a madadael dagiti agdaydayaw kenkuana kas maysa a nasion.—Jeremias 32:36-38.

Konteksto ti Jeremias 33:3

Naawat ni propeta Jeremias daytoy a mensahe manipud ken Jehova idi 608 B.C.E., bayat ti maika-10 a tawen ti panagturay ni Ari Zedekias. Impakpakauna ni Jeremias a madadaelto ti Jerusalem ken maipanawto ni Zedekias kas balud. Gapu ta saan a kayat ti ari dayta a mensahe, impaibaludna ni Jeremias.—Jeremias 32:1-5; 33:1; 37:21.

Dayta ti situasion idi imbaga ti Dios ti awisna a masarakan iti Jeremias 33:3. Ngem makapaladingit ta intultuloy ni Ari Zedekias ken ti kaaduan nga umili iti nasion ti kinasukirda. (Jeremias 7:26; 25:4) Saanda nga immawag iti Dios tapno agpaiwanwanda kenkuana. Makatawen kalpasanna, nagpatinggan ti panagturay ni Zedekias, nadadael ti Jerusalem, ken kaaduan kadagiti nakalasat ket natiliw ken naipan idiay Babilonia.—Jeremias 39:1-7.

Dagiti sasao a mabasa iti Jeremias 33:3 ipalagipna kadagiti agbasbasa ita a maipaay ti Dios ti “umiso a pannakaammo iti pagayatanna” ken maipakaammona ti “nauneg a bambanag” kadagidiay agkarkararag kenkuana ken mangad-adal iti Saona, ti Biblia. (Colosas 1:9; 1 Corinto 2:10) Karaman kadagiti nauneg a bambanag ti ikarkari ti Dios nga aramidennanto iti asidegen a masanguanan.—Apocalipsis 21:3, 4.

Buyaem daytoy ababa a video tapno makitam ti pakabuklan ti libro a Jeremias.