NI JEHOVA ISU TI KINALINTEGTAYO

Ti sasao a nakaipatarusan ti dua a sao a Yehwahʹ Tsidh·qeʹnu, masarakan iti Jeremias 23:6 ken 33:16.

Ti Jeremias 23:5, 6 ket Mesianiko a padto a mangdeskribir iti masanguanan nga ari nga agtubo manipud linia ni David tapno “mangipakat iti kinahustisia ken kinalinteg iti daga.” Yantangay isu agturay kas pannakabagi ti Dios (no kasano a ni David, ken ti dadduma pay, ket nagtugaw “iti trono ni Jehova” kas ari a dinutokan ti Dios; 1Cr 29:23), kunaen ti padto, “Daytoy ti naganna a mayawagto kenkuana, Ni Jehova Isu ti Kinalintegtayo.” Awan pammaneknek iti panangikuna a daytoy a teksto kaipapananna a ni Jesus, ti Mesias, isu met laeng ni Jehova, a buklenda ti maysa a Dios, kas ipagarup ti dadduma. Mapaneknekan a kasta agsipud ta ti umasping a Mesianiko a padto iti Jeremias 33:14-16 iyaplikarna dagita met laeng a sasao iti Jerusalem, a kunkunana: “Ket daytoy ti mayawagto kenkuana, Ni Jehova Isu ti Kinalintegtayo.” Kadagitoy dua a kaso, ti ebkas ipakitana a ti nagan ti Dios a Jehova, a nayawag agpadpada iti inkarina nga ari ken iti pinilina a kabesera, ket garantia iti kinalintegda. Mainayon pay, ti kinahustisia ken kinalinteg nga agtaud kadagitoy wenno iparparangarang dagitoy ket bunga ti naan-anay a debosionda ken Jehova ken iti pagayatanna, a mangyeg iti pamendision ken panangiwanwan ni Jehova.