Maysa pay, ti salaysay iti Jeremias kapitulo 36, a detalyado nga usigentayo, ipasimudaagna nga adda koneksion ni Baruc kadagiti manangbalakad iti ari ken napalubosan a mangusar iti siled a panganan wenno iti siled a pagtataripnongan ti gabinete ni Gemarias, a maysa a prinsipe wenno opisial. Kastoy ti argumento ni James Muilenberg nga eskolar iti Biblia: “Makastrek ni Baruc iti siled dagiti eskriba gapu ta adda lugarna sadiay ken isu ket maysa kadagiti opisial ti ari a nakitaripnong iti napateg nga okasion a panangbasa iti lukot iti publiko. Isu ket maysa nga opisial.”

Nabayag a proseso ti panangisurat kadagiti pakdaar a naited iti napalabas a 23 a tawen, ken nalabit agur-uray met idi ni Jeremias iti maitutop a tiempo. Ngem idi Nobiembre wenno Disiembre 624 K.K.P., situtured a “rinugian ni Baruc a basaen a sipipigsa ti sasao ni Jeremias manipud iti libro iti balay ni Jehova, iti siled a panganan ni Gemarias . . . , kadagiti lapayag dagiti amin nga umili.”​—Jeremias 36:8-10.