JEHUDI

[Maysa a Judio; Ken (Kukua ni) Juda].

Maysa nga opisial ni Ari Jehoiaquim. Isu imbaon dagiti prinsipe ti Juda tapno iyegna kadakuada ni Baruc agraman ti lukot ni Jeremias. Idi imbasa ni Jehudi ti lukot iti sanguanan ni Jehoiaquim, pinigispigis dayta ti ari ken in-inut nga impuorna dagiti pirsay, agingga a naibus ti intero a lukot.​—Jer 36:14, 21-23, 27, 32.

Ni Jehudi ket apoko ni Cusi iti tumeng. (Jer 36:14) Pagarupen ti dadduma a ti naganna ken ti nagan ti inapona ket mangipaspasimudaag a saan a nayanak a Judio, no di ket maysa a proselita, a ti nagan ti apongna iti tumeng mangipamatmat a ti pamiliana ket naggapu iti Cus, wenno Etiopia. Nupay kasta, dagiti kaputotan iti nagbaetanda ket addaan iti kadawyan a Judio a nagnagan (ni Netanias nga amana ken ni Selemias nga apongna), ket uray ti mismo a nagan a Cusi masarakan iti sabali pay a teksto kas nagan ti maysa a nayanak a Judio. (Sof 1:1) Ngarud ti Jehudi ket nalabit nagan a nayawag kenkuana idi naipasngay, saan ket a maysa a nagan a nagun-odan iti panagbalin a proselita.