KEMOS
Ti kangrunaan a didiosen dagiti Moabita a natukoy kas “tattao ni Kemos.” (Nu 21:29; Jer 48:46) Kunaen ti sumagmamano nga eskolar a daytoy a didiosen ket isu ti Baal ti Peor, gapu ta nainaig ti Baal ti Peor kadagiti Moabita. (Nu 25:1-3) Nagisakripisioda iti ubbing agpaay ken Kemos nalabit gapu iti panagsagabada iti nakaro a tuok, wenno kadawyanda dayta.—2Ar 3:26, 27.
Manipud iti pagaammo a Bato a Moabita (nangisit a basalto a batonlagip) nga impatakder ni Ari Mesa ti Moab kas panglaglagip iti iyaalsana iti Israel, maammuantayo ti kanayonan nga impormasion no ania ti panangmatmat dagiti Moabita iti diosda a ni Kemos. Sigun itoy a monumento, ni Kemos ti namagballigi kadagiti pannakirupak, ken isu met ti nangibilin iti pannakigubatda. Binigbig ni Ari Mesa a ni Kemos ti nangispal kadakuada manipud panangirurumen dagiti Israelita, ken impambarna a ti rigat a napasaranda iti im-ima ni Omri nga ari ti Israel ket maigapu iti panagunget ni Kemos iti dagana.
Tinukoy ni Jefte daytoy a didiosen kas dios dagiti Ammonita. (Uk 11:24) Ti sumagmamano nga eskolar kuestionaranda no umiso met laeng ti sasao ni Jefte agsipud ta iti dadduma a teksto kanayon a nainaig ni Kemos kadagiti Moabita. Nupay kasta, laglagipen koma nga adu a didios ti nagdaydayawan dagiti Ammonita. (Uk 10:6) Kanayonanna pay, yantangay agkaarruba dagiti Ammonita ken Moabita, nga agpada a nagtaud ken Lot a kaanakan ni Abraham, saan a nakaskasdaaw a nagdaydayaw ken Kemos dagitoy dua a nasion.
Ti panagdaydayaw ken Kemos ket nabatad a naiserrek iti Israel bayat ti panagturay ni Solomon. Sigurado a gapu iti impluensia dagiti Moabita nga assawana, nangibangon ni Solomon iti nangato a disso maipaay ken Kemos “iti bantay nga adda iti sango ti Jerusalem.” (1Ar 11:1, 7, 8, 33) Nasurok a tallo a siglo kalpasanna, daytoy a nangato a disso ket napagbalin a di maikari a pagdaydayawan bayat ti nasaknap a narelihiosuan a reporma nga inaramid ni Josias.—2Ar 23:13.
Idi impadto ni mammadto Jeremias ti didigra a sagabaen ti Moab, impatuldona a maidestiero ti kangrunaan a dios ti Moab a ni Kemos kasta met ti papadi ken piprinsipena. Ibainto dagiti Moabita ti diosda gapu iti kinainutilna, no kasano a dagiti Israelita iti sangapulo-tribu a pagarian imbainda ti Bethel, nalabit gapu ta nainaig daytoy iti panagdaydayaw iti kigaw a baka.—Jer 48:7, 13, 46.