BOZRA

[Di Maasitgan a Disso].

1. Maysa a nalatak a siudad ti Edom, ti pagnanaedan ti ama ni Jobab nga Edomita nga ari idi maikadua a milenio K.K.P. (Ge 36:31, 33; 1Cr 1:44) Makita pay ti kinalatakna idi a napaltiingan da mammadto Isaias, Jeremias, ken Amos tapno tukoyenda dayta kas mangirepresentar iti intero nga Edom, a naikeddeng a malangalang.​—Isa 34:5, 6; 63:1-4; Jer 49:12, 13, 17, 22; Am 1:11, 12.

Maikunkuna a ti Bozra isu ti moderno a Buzera, a masarakan iti agarup 50 km (30 mi) iti amianan nga amianan-a-daya ti Petra ken adda iti asideg ti kadaanan a kalsada a naawagan Kangrunaan a Kalsada ti Ari. Nagsaad ngarud dayta iti medio sentro iti pagarian ti Edom ken sinaluadanna dagiti sungadan dagiti pagminasan ti gambang idiay Araba. Ti kadaanan a rebrebba idiay Buzera ipakitada a ti Bozra ket nasarikedkedan a siudad a naibangon iti akikid a dimmawadaw a turod manipud iti Jebel esh-Sheraʼ nga addaan nauuneg a wadi (naapres a ginget) iti agsumbangir a deppaar.

Ti patarus ti King James Version iti Mikias 2:12 ket aglaon iti nagan a “Bozra,” ngem ipapan ti kaaduan a moderno a patarus a tumukoy daytoy iti maysa a koral wenno kulongan dagiti karnero, imbes nga iti maysa nga ili.

2. Iti padto maibusor iti Moab iti Jeremias 48:24, natukoy ti Bozra kas maysa kadagiti siudad “ti daga ti Moab.” Nairaman dayta iti dadduma pay a siudad ti tanap wenno “daga ti nalantag a pagilian” (Jer 48:21), ket gapu ta nausar daytoy met laeng a Hebreo a sasao mainaig iti Bezer (De 4:43) imbilang ti sumagmamano nga eskolar a nalabit maymaysa dagita a lugar.​—Kitaenyo ti BEZER Num. 2.