BET-HAQUEREM

[Balay iti Kaubasan].

Maysa a lugar iti asideg ti Jerusalem. Dinakamat ni Jeremias kas maikanatad a pangibayogan iti apuy a pagilasinan kas pammakdaar iti idadarup ti puersa ti kabusor manipud amianan. (Jer 6:1) Kadagidi tiempo kalpasan ti pannakaidestiero, nagan daytoy ti maysa a distrito ti Juda, a ni Malkias ti “prinsipe” iti dayta. (Ne 3:14) Gapu ta nadakamat ti Tecoa a kadua ti Bet-haquerem iti Jeremias 6:1, ibilang ti dadduma nga adda ti Bet-haquerem iti abagatan ti Jerusalem, iti nagbaetan ti Jerusalem ken Tecoa. Ni Jerome, a nagbiag idi maikapat a siglo K.P., tinukoyna a nagsaad dayta iti kasta a lokasion ken inawaganna iti Bethacharma. Maitunos kadagita a panangmatmat, naikuna nga isu dayta ti ayan ti Khirbet Salih (Ramat Rahel), 4.5 km (3 mi) iti abagatan nga abagatan-a-laud ti nagsaadan ti templo. Nupay kasta, saan nga ibilang ti dadduma a ti pannakadakamat ti Tecoa kaipapananna nga asideg dayta iti Bet-haquerem. Patienda nga adda ti Bet-haquerem iti ayan ti ʽAin Karim (ʽEn Kerem) (kaipapananna ti “Ubbog iti Kaubasan”), 7.5 km (4.5 mi) iti laud nga abagatan-a-laud ti nagsaadan ti templo. Agsaad daytoy iti nadam-eg a benneg nga addaan kaolibuan ken kaubasan, ken masarakan iti sakaanan ti Jebel ʽAli, nga iti kangatuan a pasetna makita ti Bantay dagiti Olibo, a paset ti Jerusalem, kasta met ti Baybay Mediteraneo iti laud. Kunaen ti dadduma a ti dadakkel a muntuon ti batbato a nasarakan iti tapaw ket maar-aramat idi a pagpasgedan iti ap-apuy a pagilasinan kas kadagidiay dinakamat ni Jeremias.​—Kitaenyo ti BET-CAR.