TAMMUZ, I

Maysa a didiosen a nakita a sangsangitan dagiti apostata a Hebreo a babbai idiay Jerusalem idi maikanem a tawen ti pannakaidestiero ni mammadto Ezequiel (612 K.K.P.).​—Eze 8:1, 3, 14.

Kadagiti Sumeriano a teksto, naawagan ni Tammuz iti Dumuzi ken natukoy kas asawa wenno kaayan-ayat ti diosa ti kinabunga a ni Inanna (Ishtar iti Babilonia). Naikuna a sigud nga ari ni Tammuz ngem napagdaydayawan kalpasan ti ipapatayna. Dagiti Sumeriano a teksto a patien a naaramid idi maika-18 a siglo K.K.P. ipakitada a ti ar-ari ti Sumer inrepresentarda ni Dumuzi.

Kastoy ti komento da D. Wolkstein ken S. N. Kramer maipapan iti kinasiasino ni Tammuz: “Adu ti ‘matmatay a dios’ iti kadaanan a Sumer, ngem ti pagaammo unay isu ni Dumuzi, ti biblikal a Tammuz, a pagladladingitan pay laeng dagiti babbai ti Jerusalem idi kaaldawan ni mammadto Ezequiel. Ti dios a ni Dumuzi ket sigud a mortal a Sumeriano nga agturay, a ti biag ken ipapatayna dakkel ti impluensiana kadagiti Sumeriano a managpanunot ken mitograpo.” (Inanna, Queen of Heaven and Earth, New York, 1983, p. 124) Kanayonanna pay, kastoy ti insurat ni O. R. Gurney: “Sigud a tao ni Dumuzi, ari ti Erec . . . Malaksid iti dayta, ti kinatao ni Dumuzi ket patalgedan ti mitolohiko a teksto nga iti dayta kinunana ken Inanna ‘Iturongkanto iti balay ti diosko.’ Saan a kastoy ti panagsao ti maysa a dios.”​—Journal of Semitic Studies, Tomo 7, 1962, p. 150-152.