UKEL-UKEL
Glandula ti mabagbagi ti lalaki. Sigun iti linteg ti Dios a naited iti Israel, ti maysa a lalaki a narumek ti ukel-ukelna ket nalapdan nga agbalin a kameng ti kinapadi, yantangay maysa dayta kadagiti sumagmamano a pisikal a depekto a pakadiskualipikaran. (Le 21:17-21, 23) Daytoy nangato a pagalagadan maipaay iti kinapadi ket maitunos iti kinasanto ti akem ti papadi kas pannakabagi ti kinasanto ni Jehova iti sanguanan ti Israel. Tumunos met dayta iti kinapudno a ti kinapadi iti Israel insimbolona ti nailangitan a kinapadi ni Kristo ken ti kongregasionna a buklen dagiti katulongan a papadi, a kadakuada awan masarakan a pilaw. (Heb 7:26; Efe 5:27; Apo 14:1, 5; 20:6) Kanayonanna pay, ti kinalikaguman ti Dios ket papadi a mabalin a maaddaan iti annak a mangsuno kadakuada. Nupay kasta, kunaen ti Linteg a ti kasta a tao nga addaan depekto mabalinna ti mangan iti nasantuan a bambanag a maipapaay idi kas pagtaraon ti kinapadi.—Le 21:21, 22.
Maipaay kadagiti umasping a rason, ti maysa nga animal a napis-it, nataltal, naputed, wenno naipalsot ti ukel-ukelna ket saan a mabalin nga idaton kas sakripisio. (Le 22:24; idiligyo ti Mal 1:6-8; 1Pe 1:19.) Maigapu iti daytoy, saan a kinapon dagiti Israelita ti an-animalda, ta kinalikaguman ti Linteg nga amin a naamo nga animal a maparti a pagtaraon ket maiyeg iti santuario tapno mapapatay ken makan kas pakikaykaysa a daton. Dayta a linteg nagaplikar met iti Naikari a Daga maipaay kadagidiay agnanaed iti saan nga adayo iti Jerusalem.—Le 17:3-5; De 12:20-25.
Mabasa pay iti Linteg: “Awan lalaki a nakapon babaen ti panangtaltal kadagiti ukel-ukel wenno panangputed ti mabagbagina ti mabalin a sumrek iti kongregasion ni Jehova.” (De 23:1) Ti kasta a ‘pannakakapon’ ket awan nakainaiganna kadagiti nakayanakan a depekto wenno iti di inggagara a kasasaad. (Idiligyo ti Le 21:17-21; De 25:11, 12.) No kasta, nabatad a nainaig dayta iti inggagara a panagpakapon maipaay kadagiti imoral a panggep, kas iti homoseksualidad. Ti kasta a tao maparuar idi manipud kongregasion, a saan a mapalubosan a makitimpuyog iti dayta, iti kasta masalakniban ti kinadalus ti kongregasion.
Ti panagraem ni Jehova iti kalintegan ti lalaki a maaddaan iti annak babaen iti asawana, ken iti pannakabalin nga agpaadu nga inkabilna iti lalaki ken babai, ket impaganetget ti Linteg. Ti agkayong a pannakiasawa impaayna ti panagtultuloy ti linia, nagan, ken tawid ti pamilia ti lalaki. (De 25:5-10) Dagus kalpasan ti pannakadakamat daytoy nga urnos, intuloy a kunaen ti Linteg a no agdangdangadang ti dua a lallaki ket ti asawa ti maysa kadakuada ginammatanna ti pribado a paspaset ti sabali a lalaki tapno tulonganna ti asawana (maysa a tignay a mabalin a mangdadael iti pannakabalin ti lalaki nga agpaadu), maputed idi ti ima ti asawa a babai. (De 25:11, 12) Gapuna, saan a nagaplikar ditoy ti linteg a ti banag a nadadael ket masuktan iti katupagna. (De 19:21) Saan a kinalikaguman ti Dios ti panangdadael iti kamkameng a pagpaadu ti babai wenno ti asawana. Iti kastoy a pamay-an, mabalin a nabunga latta ti panagasawa, a babaen iti dayta makapagtultuloy ti linia ti pamilia ti asawa ti babai.
No maipapan iti kongregasion Kristiano, dagiti tattao a nakapon saanda a naparitan a sumrek, ta ti Linteg naikkaten maibatay iti sakripisio ni Kristo. (Col 2:13, 14) Nupay kasta, dagiti linteg a nadakamaten patalgedanda ti pannakaseknan ti Dios iti kamkameng a pagpaadu ken siiinget nga ipasimudaagna a di maiparbeng ti panagopera a mangdadael kadagiti pannakabalin ti maysa a tao nga agpaadu gapu laeng iti kaawan ti panangipategna iti dayta a sagut manipud iti Dios.
Mabagbagi. Ti Hebreo a sao maipaay iti “lasag” (ba·sarʹ) ket naaramat iti Kasuratan iti Levitico 15:2, 3 mainaig iti seksual a kameng ti lalaki, ti mabagbagina, kas naiduma kadagiti ukel-ukel.—Kitaenyo ti NADALUS, KINADALUS; idiligyo ti Isa 57:8, Rbi8 ftn.
Kadagiti pagano, ti mabagbagi ti lalaki ket ramit iti panagdaydayaw iti sekso kadagidi kadaanan a tiempo, kas met laeng ita iti sumagmamano a pagilian. Mabalin a natukoy iti Ezequiel 8:17 (Rbi8 ftn) ti kasta a panagdaydayaw kas nangmulit kadagiti apostata nga Israelita idi kaaldawan ni Ezequiel.