Ti Nailangitan a Karuahe ni Jehova Agab-abante
“No maipapan kadagiti pilpilid, iti dengngegko nainagananda, ‘O natayyek a pilpilid!’”—EZEQUIEL 10:13.
1. Addaan ni Jehova ti ania a wagas ti panagbiahe?
KADAGITOY nga al-aldaw dagiti narang-ay a napegges nga eroplano, ipagarup dagiti papangulo ti lubong a tagtagiragsakendan ti kasasayaatan iti panagbiahe. Kaskasdi, 2,600 a tawen ti napalabasen, impalgak ni Jehova a Dios nga isut’ addaan ti superlatibo (ringbawanna ti amin) a wagas ti panagbiahe, dagiti langa a di pay pulos nakitkita ti asinoman nga inhiniero. Daytat’ nakalawlawa, nakaskasdaaw a karuahe! Makapasiddaaw kadi a ti Namarsua ti uniberso aglugan iti kasla karuahe a lugan? Saan, ta ti nailangitan a lugan ni Jehova dakkel nakaidumaanna iti aniaman a napanunoten ti tao.
2. Kasano nga iladawan ti Ezequiel kapitulo 1 ti nailangitan a karuahe ni Jehova, ket iti siasino ti pangiturongan ti mammadto ti atensiontayo?
2 Idiay Eze kapitulo 1 iti padto ni Ezequiel, nailadawan ni Jehova a sisasakay iti nagdakkelan a nailangitan a karuahe. Daytoy nakaam-amak nga uppat-pilidna a lugan mabalin nga agandar a bukbukodna ken makaaramid kadagiti nakaskasdaaw a bambanag. Nakita ni Ezequiel daytoy a nailangitan a karuahe babaen iti sirmata idi 613 K.K.P., idi nga isut’ adda iti maysa kadagiti waig ti kadaanan a Babilonia. Umuna nga iturong ti mammadto ti atensiontayo kadagidiay agserserbi iti nailangitan a karuahe ni Jehova. Bayat a basbasaentayo, padasentay nga iladawan no ania ti nakita ni Ezequiel.
Uppat a Parsua a Sibibiag
3. Aniat’ ipasimudaag dagiti uppat a rupa ti tunggal maysa kadagiti uppat a kerubin?
3 Insurat ni Ezequiel: “Ket nakitak, ket, adtoy! ti maysa nga angin a nadawel a naggapu iti amianan, maysa a dakkel nga ulep agraman apuy nga agluklukot, ken raniag iti aglikmut kenkuana . . . Ket manipud iti tengngana rimmuar ti kaasping dagiti uppat a parsua a sibibiag.” (Ezequiel 1:4, 5) Tunggal maysa kadagitoy uppat a parsua a sibibiag, wenno kerubin, addaan uppat a payak ken uppat a rupa. Addaandat’ rupa ti leon, a mangipasimudaag ti kinahustisia ni Jehova; rupa ti baka, a mangirepresentar ti pannakabalin ti Dios; ken rupa ti agila, a mangipamatmat ti Kinasiribna. Addaanda met ti rupa ti tao, a mangiladawan ti ayat ni Jehova.—Deuteronomio 32:4; Job 12:13; Isaias 40:26; Ezequiel 1:10; 1 Juan 4:8.
4. Apay a dagiti uppat a kerubin addaandat’ uppat a rupa, ket iti ania ti kaasping dagiti kerubin no iti kinapardas?
4 Tunggal kerubin situturong ti rupana iti maysa kadagiti uppat a direksion. Gapuna, kabaelan a baliwan dagiti kerubin ti dalanda iti apagdarikmat a sumursurot iti rupa a situturong iti direksion a tarigagayanna. Ngem iti ania met ti kaasping dagiti kerubin no maipapan ti kinapardas? Ay ket, makapaggarawda iti kapardas ti kimat! (Ezequiel 1:14) Awan pay aramid-tao a lugan ti nakagun-od iti dayta a kapardas.
5. Kasanot’ panangiladawan ni Ezequiel kadagiti pilid ti karuahe ken dagiti kama wenno igidda?
5 Maigiddato la unay, dagiti pilpilid ti karuahe addadan iti buya. Anian a karkarna dagitoy! Kunaen ti Eze 1 bersikulo 16 ken 18: “Ti langada ken ti pannakaaramidda kas la maysa a pilid iti uneg ti pilid. No maipapan kadagiti kamada, nangatoda ket nakabutbuteng; ket dagiti kama dagiti uppat napnoda kadagiti mata iti aglikmut.” Ti maysa a pilid iti arpad ti tunggal kerubin agresulta iti uppat a pilid iti uppat nga agkakanaig a puesto. Dagiti pilid nagraniagda a kasla berilo, maan-aninag wenno malasatan ti lawag nga amarilio wenno berde a bato. Daytoy mangnayon ti lawag ken pintas iti daytoy nadayag a sirmata. Yantangay dagiti kama wenno igid dagiti pilid ket “napnoda kadagiti mata iti aglikmut,” saanda a basta agturong lattan iti aniaman a direksion. Ket dagiti pilid nakangatngatoda, gapuna kabaelanna a saknapan ti dakkel a distansia iti maminsan laeng a panagtayyekna. Isuda, kas kadagiti uppat a kerubin, makapaggunayda a kas kapartak ti kimat.
Pilpilid kadagiti Pilpilid
6. (a) Kasano a ti karuahe addaan pilpilid kadagiti pilpilid? (b) Dagiti pilid intunosda ti direksionda iti panaggaraw ti ania?
6 Sabali pay a banag ti karkarna. Tunggal pilid addaan pilid iti unegna—maysa iti isu met la a diametro wenno kalawa nga apaghusto a sumilliwasiw iti puon ti pilid. Iti daytoy laeng a pamay-an a maikuna a dagiti pilid “mapanda kadagiti uppat a turongda.” (Eze 1 Bersikulo 17) Iti apagkanito, dagiti pilid mabalinda a baliwan ti direksionda agsipud ta adda sikigan ti pilid a sisasango iti tunggal direksion. Intunos dagiti pilid ti direksion ti panaggarawda kadagiti uppat a kerubin. Kadagiti uppat a pilid, ti bagi ti karuahe ti Dios makapagsakay babaen ti di makita a suporta nga umasping iti napigsa a bapor nga ipangpangato ti kutson nga angin bayat a tumtumpaw iti danum.
7. Aniat’ gubuayan ti pannakabalin dagiti pilid?
7 Sadinot’ nangalaan dagiti pilid iti daytoy a pannakabalin tapno makitunos iti panaggaraw dagiti uppat a kerubin? Manipud nasantuan nga espiritu ti Mannakabalin-Amin a Dios. Kunaen ti Eze 1 bersikulo 20: “Uray sadino a papanan koma ti espiritu, napanda met . . . Ti espiritu ti parsua a sibibiag adda idi kadagiti pilid.” Ti isu met la a di makita nga aktibo a puersa ti Dios nga adda kadagiti kerubin adda kadagidiay a pilpilid.
8. Ania a nagan ti naited kadagiti pilid, ken apay?
8 Dagiti pilpilid natukoyda babaen ti termino a “natayyek a pilpilid.” (Ezequiel 10:13) Daytoy ket nalawag a napartuat babaen ti aramiden ti tunggal pilid. Daytat’ agpuligos wenno agtayyek. Ti panangiladawan iti daytoy a paset ti nailangitan a karuahe iti kasta a pamay-an awagannat’ atension iti kapartak ti panaggaraw ti nailangitan a karuahe. Nupay dagiti pilpilidna agtayyekda a nakaparpartak unay, kabaelanda a makita a kankanayon ti dalanda gaput’ pannakapnoda iti matmata.
9. Kasanot’ panangiladawan ni Ezequiel no aniat’ adda iti ngatuen ti uppat a napardas panaggarawna a pilpilid ti karuahe?
9 Ngem ita kumitatayo no aniat’ adda iti ngatuen dagidiay uppat a nakabutbuteng kangatona, napartak panaggarawda a pilpilid. Kunaen ti bersikulo 22 iti Ezequiel kapitulo 1: “Ket iti rabaw ti ulo ti parsua a sibibiag adda idi ti kaasping ti tangatang a kasla kristal a nakabutbuteng a perngen, a naiyukrad iti rabaw dagiti uloda.” Ti tangatang, nupay solido, ket salputen ti lawag, “kasla kristal a nakabutbuteng a perngen.” Daytat’ sumilsilap a kas ti rinibo a diamante bayat a silsilnagan ti init. Pudno a nakaam-amak!
Ti Nakasakay iti Nadayag a Karuahe
10. (a) Kasanot’ pannakailadawan ti trono ken Daydiay adda iti trono? (b) Aniat’ ipasimudaag ti kinapudno a ti Nakasakay iti karuahe nabungon iti kinadayag?
10 Nalawag, nagsardeng ti karuahe tapno ti Nakasakay kenkuana makisao ken Ezequiel. Iti ngatuen ti tangatang, adda kaasping ti maysa a trono, a sapiro, wenno natayengteng nga asul, ti langana. Idiay trono, adda Maysa a ti langana ket kaasping ti maysa a tao. Ti natauan a pormana ket makatulong unay ken Ezequiel tapno maapresiarna daytoy nadiosan a pannakaiparangarang. Ngem dayta a natauan a porma ket nabungon iti kinadayag, tapno rumaniag kas electrum, maysa a nasileng a metal a naglaokan ti pirak ken balitok. Anian a makapakintayeg a kinapintas! Manipud siket daytoy kas-tao a porma, daytoy elegante a kinadayag kumamang agpadpada nga agpangato ken agpababa. Ti sibubukel a porma ket ngarud linikmut ti kinadayag. Daytoy ipakitana a di mailadawan ti kinadayag ni Jehova. Mainayon pay, ti Nakasakay iti karuahe kinuyog ti naimnas a bullalayaw. Anian a kinatalinaay ken kinaulimek ti ipasimudaag ti bullalayaw kalpasan ti bagio! Addaan ti kasta a kalmado a kababalin, taginayonen ni Jehova dagiti galadna ti kinasirib, kinahustisia, pannakabalin, ken ayat iti perpekto a kinabalanse.
11. Kasano a naapektaran ni Ezequiel iti sirmata ti karuahe ni Jehova ken ti tronona?
11 Ti karuahe ni Jehova ken ti tronona nalikmut babaen ti lawag ken napipintas a kolor. Anian a pannakaisupadi ken Satanas, ti prinsipe ti kinasipnget ken iti okulto! Ket kasano a naapektaran ni Ezequiel babaen amin daytoy? “Ket idi nakitak,” kunana, “nagpaklebak, ket nangngegko ti timek ti maysa a nagsao.”—Ezequiel 1:28.
No Ania ti Inladawan ti Karuahe
12. Aniat’ iladladawan ti nailangitan a karuahe ni Jehova?
12 Aniat’ nailadawan babaen daytoy nakaskasdaaw a karuahe? Ti nailangitan nga organisasion ni Jehova. Buklenna ti amin a nasantuan a naespirituan a parparsua iti di makita a pagturayan—dagiti serapin, kerubin, ken dagiti anghel. Yantangay ni Jehova isut’ Kangatuan Amin a Dios, amin dagiti naespirituan a parparsuana agpasakopda kenkuana, ket agsakay kadakuada iti kaipapanan a siaayat nga iturayanna ida ken usarenna ida sigun iti panggepna.—Salmo 103:20.
13. (a) Kasano a maikuna a ni Jehova pagsakayanna ti organisasionna? (b) Kasano nga apektarannakayo ti sirmata ti agab-abante nga uppat-pilidna a karuahe ni Jehova?
13 Ni Jehova pagsakayanna daytoy nga organisasion, a kasla adda iti maysa a karuahe, ket paggarawenna iti sadinoman a pangiturongan ti espirituna. Daytat’ di agtartaray a di naiturong, nga awanan kontrol wenno intelihente a pannakaiwanwan. Di palubosan ti Dios daytoy nga organisasion a mapan iti aniaman a direksion a kayatna a papanan. Imbes ketdi, sursurotenna dagiti panangidalanna. Aggigiddan, isuda amin agab-abanteda a sangsangkamaysa nga agturong iti naan-anay a pannakatungpal dagiti pangpanggep ti Dios. Anian a nakaskasdaaw a nailangitan nga organisasion ti naipanayag babaen daytoy a sirmata ti uppat-pilidna a nailangitan a karuahe nga agab-abante! Maitunos iti daytoy, ti organisasion ni Jehova nailadawan kas kuadrado, iti perpekto a kinabalanse.
Nadutokan kas Agbantay
14. Asinot’ iladladawan ni mammadto Ezequiel?
14 Ngem asinot’ nailadawan babaen ken mammadto Ezequiel? Manipud kinapudno ti historia, nalawag a ti bagi dagiti napulotan-espiritu a Saksi ni Jehova naitimpuyogda iti nailangitan a karuahe. Gapuna, ni Ezequiel iladawanna ti napulotan a natda dagiti Saksi ni Jehova nanipud pay 1919. Iti naespirituan, ti nailangitan nga organisasion ti Dios nakitipon iti napulotan a natda iti dayta a tawen, tapno ipasublina ida iti kinaaktibo kas Saksi ni Jehova iti amin a lubong. (Idiligyo ti Apocalipsis 11:1-12.) Ti kasla karuahe nga organisasion agab-abanten kalpasanna, uray pay itattan. Kinapudnona, dagiti pilpilidna ti irarang-ay agtaytayyek a naparpardas pay. Ket agtultuloy ti sipepegges a panagsakay ni Jehova!
15. Aniat’ kunaen ti timek ti Nakasakay iti nailangitan a karuahe, ket ania a trabaho ti inawat ni Ezequiel?
15 Tinarigagayan ni Ezequiel nga ammuen no apay a ti nailangitan a karuahe nagparang iti sangona ken nagsardeng. Nangngegna ti maysa a timek a naggapu manipud iti Daydiay situtugaw iti karuahe. Nakellaat iti daytoy nakaam-amak a buya, nagpakleb ni Ezequiel. Dumngegkayo bayat a ti timek ti Nakasakay iti nailangitan a karuahe kunaenna: “Anak ti tao, tumakderka ket makisaoakto kenka.” (Ezequiel 2:1) Kalpasanna ni Jehova dinutokanna ni Ezequiel kas agbantay ken tapno pakdaaranna ti nasukir a balay ti Israel. Isut’ nadutokan pay nga agsao iti nadiosan a nagan. Ti nagan ni Ezequiel kaipapananna “Ti Dios Mangpapigsa.” Gapuna ti Dios pinapigsana ti klase Ezequiel ket imbaonna ida, a dinutokanna ida kas agbantay ti Kakristianuan.
16, 17. (a) Kasano a ti sirmata ti nailangitan a karuahe gunggonaanna ni Ezequiel? (b) Iti kaaldawantayo, kasano a ti pannakaawat iti sirmata ti nailangitan a karuahe apektaranna ti klase Ezequiel ken ti dakkel a bunggoy?
16 Ti sirmata ti nailangitan a karuahe nakalawlawag ken nakapimpintas ken Ezequiel, ngem daytat’ nangisagana met kenkuana iti trabahona kas agbantay tapno mamakdaar iti um-umayen a pannakadadael ti Jerusalem. Napaypayso met dayta iti klase agbantay itatta. Ti pannakaawatda iti sirmata ti nailangitan a karuahe ni Jehova nga agab-abante addaan dakkel a mamagtignay nga epekto iti napulotan a natda. Idi 1931 naadaldat’ ad-adu pay maipapan ti sirmata ni Ezequiel, kas naipanayag iti Vindication, Book One. Napunnoda kalpasanna ti kasta a nasin-aw nga apresasion ta manipud ti ruar ti Oktubre 15, 1931 ingganat’ Agosto 1, 1950, ti disenio iti parupa nga abbong ti The Watchtower linaonna iti akinngato a makinkanawan a sulina ti panangiladawan ti maysa a managdibuho ti sirmata ni Ezequiel iti nailangitan a karuahe. Gapuna, ti klase Ezequiel nagtignay maitunos iti trabaho a naited kadakuada, ket nagserbida kas agbantay, a mangiwarwaragawag ti nadiosan a pakdaar. Ti tiempo nga agpaay iti naapuy a pannakadadael ti Kakristianuan manipud ken Jehova a naitrono iti nailangitan a karuahena as-asidegen!
17 Itatta, “maysa a dakkel a bunggoy” dagiti kasla karnero a tattao ti naitimpuyogen iti napulotan a natda. (Apocalipsis 7:9) Sangsangkamaysa, iwarwaragawagdan ti pakdaar ti um-umayen a pannakadadael ti Kakristianuan ken ti intero a diaboliko a sistema dagiti bambanag. Dayta a panamakdaar a trabaho maar-aramiden a nakaparpardas, ken kas ipakita ti Apocalipsis 14:6, 7, dagiti anghel supsuportaranda dayta.
Agab-abante a Kadua ti Nailangitan a Karuahe
18. Aniat’ masapul nga aramiden tapno magun-od ti agtultuloy a suporta dagiti anghel, ket iti ania a managsiputtay koma?
18 Dagiti managpasakop nga anghel agtigtignayda a sangsangkamaysa kas paset ti nailangitan nga organisasion ti Dios bayat a tultulonganda dagiti ad-adipen ti Dios iti panangitungpal ti trabahoda a mangiwaragawag ti nadiosan a pakdaar ti panangukom. No tarigagayantay ti agtultuloy a pannalaknib ken panangiwanwan dagitoy nabileg nga angheliko nga ad-adipen ti Dios, masapul nga agtignaytayo met a sangsangkamaysa ken makigiddan a sipapardas iti simboliko a panagtayyek ti pilpilid. Mainayon pay, kas paset ti makitkita nga organisasion ni Jehova nga agab-abante a kagiddan ti nailangitan a karuahena, masapul a nasiputtayo kadagiti panangiturong ti espiritu ti Dios. (Idiligyo ti Filipos 2:13.) No Saksinatayo ni Jehova, masapul nga agabantetayo iti isu met la direksion a kas ti nailangitan a karuahe. Sigurado a ditay aramiden ti kasungani iti pangpanggepna. No maikkan ti panangidalan iti pagturongantayo, surotentay koma dayta. Ngarud, ti kongregasion dinto masinasina.—1 Corinto 1:10.
19. (a) No kasano a ti pilpilid ti nailangitan a karuahe addaan matmata iti aglikmutda, iti ania a masapul nga alerto dagiti tattao ni Jehova? (b) Ania komat’ tignaytayo kadagitoy nariribuk a panawen?
19 Dagiti mata iti aglikmut ti pilpilid ti karuahe ti Dios ipamatmatdat’ kinaalerto. No kasano nga alerto ti nailangitan nga organisasion, masapul nga alertotayo a mangsuporta ti naindagaan nga organisasion ni Jehova. Iti kongregasion, maipakitatay dayta a suporta babaen pannakitulong kadagiti lokal a panglakayen. (Hebreo 13:17) Ket kadagitoy nariribuk a panawen, kasapulan dagiti Kristiano ti kumpet a sisinged iti organisasion ni Jehova. Ditay kayat nga ikabil dagiti kabukbukodantayo nga interpretasion kadagiti pasamak, ta no kasta ditay agab-abante a kadua ti nailangitan a karuahe ni Jehova. Kankanayon a saludsodantay dagiti bagbagitayo, ‘Sadino ti pagturturongan ti nailangitan a karuahe?’ No agab-abantetayo a kadua ti makitkita nga organisasion ti Dios, agab-abantetayo met a kadua ti di makita nga organisasion.
20. Ania a nasayaat a balakad ti ipaay ni Apostol Pablo idiay Filipos 3:13-16?
20 Maipapan iti daytoy, insurat ni Pablo: “Kakabsat, diak pagarupen a nagun-odakon; ngem maysa ti aramidek: Lipatek dagiti malikudan ket kamakamek dagiti masanguanan, agtarayak a sipipinget nga agturong iti kalat maipuon ti gunggona ti natan-ok a panangawis ti Dios gapu ken Kristo Jesus. Datayo, ngarud, amin a nataenganen, addaantayo koma ti kastoy a rikna; ket no mariknayo ti maisupadi daytoy lawlawaganto met ti Dios. Isuna laeng ta iti nakagtengantayon a rimmang-ayan, ituloytayo koma a pagnaan ti isu met la nga urnos.”—Filipos 3:13-16.
21. Babaen panangsurot ti ania nga urnos a posible ti iyaabante iti naespirituan a kadua ti organisasion ti Dios?
21 Ditoy ti sao nga “urnos” dina kaipapanan ti dakes a nakaugalian a ditay mapalusposan ti bagbagitayo manipud iti dayta. Dagiti adipen ni Jehova addaandat’ nasayaat nga urnos babaen panangaramidda ti iyaabante iti naespirituan. Daytat’ urnos ti pannakaaddat’ personal a panagadal ti Biblia, itatabuno kadagiti gimong ti kongregasion, regular a panangikasabat’ naimbag a damag ti Pagarian, ken panangiparangarang kadagiti kualidad ti nailangitan nga organisasion ni Jehova. Ti kasta nga urnos tignayenna ida a sumurot kadagiti panangiturong ti kasla karuahe a nailangitan nga organisasion ni Jehova. Babaen panagandor iti kastoy a pamay-an, magun-odtayto ti kalattayo, dayta man ket gunggona ti imortal a biag idiay langit wenno agnanayon a biag iti paraiso a daga.
22. (a) Tapno nakaykaysa ti pannakaorganisar ti napulotan a natda ken ti dakkel a bunggoy dagiti sabsabali a karnero, aniat’ masapul nga aramiden? (b) Aniat’ di makalabas iti panagkita ni Jehova?
22 Kas ipakita ti Juan 10:16, ti “sabsabali a karnero” ken ti klase Ezequiel maorganisarda a nakaykaysa. Gapuna, nasken nga amin iti organisasion ni Jehova maawatanda ti naan-anay a kaipapanan ken kinapateg ti sirmata a nailanad idiay Ezequiel kapitulo 1 tapno agabanteda a sangsangkamaysa a kadua ti nailangitan a karuahe ti Dios. Ti sirmata dayta tulongannatayo a mangapresiar nga agabantetayo a maitunos iti organisasion ti Dios, ti makitkita ken ti di makita. Pampanunotentayo, met, a dagiti mata ni Jehova “mapanda nga agsublisubli iti amin a lubong tapno isu agparang a napigsa a bumadang kadagidiay a ti pusoda napalungdo a maiturong kenkuana.” (2 Cronicas 16:9) Awan banag a di makita ni Jehova, nangnangruna ti aniaman a nainaig iti panggepna a panangalangon ti Sapasap a Kinasoberanona.
23. Bayat nga agab-abante ti nailangitan a karuahe ni Jehova, aniat’ masapul nga aramidentayo?
23 Ti nailangitan a karuahe ni Jehova ket talaga nga agab-abante itan. Iti mabiiten isuamin a bambanag maiyegdanton iti kinadayag maitunos iti kinadayag Daydiay nakasakay iti dayta a karuahe—amin maipaay iti pannakaalangonna kas ti Soberano nga Apo iti uniberso. Dagiti serapin, kerubin, ken anghelna supsuportarandatayo iti naindaklan a trabahotayo a sangalubongan a panangaskasaba. Agabantetayo, ngarud, a kadua ti nailangitan nga organisasion ni Jehova. Ngem kasanot pannakigiddantayo iti dayta napardas-panagabantena a nailangitan a karuahe?
Kasanot’ Panangsungbatyo?
◻ Aniada a kualidad ti inladawan dagiti uppat a sibibiag a parsua a nakita ni Ezequiel?
◻ Ti nailangitan a karuahe ni Jehova iladladawanna ti ania?
◻ Siasinot’ inladawan ni Ezequiel a mammadto ti Dios?
◻ Kasano a ti pannakaawat iti nailangitan a karuahe ni Jehova apektaranna ti klase Ezequiel ken ti dakkel a bunggoy?