MAMMADTO A BABAI

Babai nga agipadpadto wenno mangar-aramid iti trabaho ti maysa a mammadto. Kas naipakita iti sidong dagiti paulo a MAMMADTO ken PADTO, ti panagipadto kangrunaan a kaipapananna ti napaltiingan a panangisarita kadagiti mensahe manipud iti Dios, ti panangipalgak iti nadibinuan a pagayatan. Mabalin a mairaman wenno saan ti panangipadles iti masanguanan a paspasamak. No kasano nga adda idi dagiti pudno ken ulbod a mammadto, kasta met nga adda sumagmamano a mammadto a babbai nga inaramat ni Jehova ken tinignay ti espirituna idinto ta ti dadduma ket ulbod a mammadto a babbai, a saan nga inanamongan ti Dios.

Iti Biblia, ni Miriam ti umuna a naawagan iti mammadto a babai. Nabatad a ti Dios nangyallatiw iti mensahe wenno sumagmamano a mensahe babaen kenkuana, nalabit iti napaltiingan a panagkanta. (Ex 15:20, 21) Gapuna, isuda ken Aaron nailanadda kas mangikunkuna ken Moises: ‘Saan aya a babaen met kadata a ni Jehova nagsao?’ (Nu 12:2) Ni Jehova a mismo, babaen ken mammadto Mikias, nagsao maipapan iti panangibaonna kada “Moises, Aaron ken Miriam” iti sanguanan dagiti Israelita idi inaonna ida iti Egipto. (Mik 6:4) Nupay naaddaan ni Miriam iti pribilehio a mausar kas instrumento iti nadibinuan a pannakikomunikar, ti kasta a relasionna iti Dios nababbaba ngem iti tinagiragsak ti kabsatna a ni Moises. Idi napaay a mangsalimetmet iti umiso a saadna, nagsagaba iti nakaro a pannakadusa manipud iti Dios.​—Nu 12:1-15.

Idi panawen ti Uk-ukom, nagserbi ni Debora kas gubuayan ti impormasion manipud ken Jehova, nga impakaammona dagiti pangngeddeng ti Dios maipapan iti sumagmamano a banag ken inyallatiwna dagiti pammilinna, kas iti bilbilinna ken Barak. (Uk 4:4-7, 14-16) Gapuna, bayat ti maysa a periodo ti kinakapuy ken panagapostasia ti nasion, isu piguratibo a nagserbi kas “maysa nga ina iti Israel.” (Uk 5:6-8) Ni Hulda a mammadto a babai nagserbi iti umasping a pamay-an, idi kaaldawan ni Ari Josias, nga impakaammona ti panangukom ti Dios iti nasion ken iti ari dayta.​—2Ar 22:14-20; 2Cr 34:22-28.

Tukoyen ni Isaias ti asawana kas “mammadto a babai.” (Isa 8:3) Nupay isingasing ti sumagmamano a komentarista nga isu naawagan a kasta gapu laeng ta nayasawa iti maysa a mammadto, awan Nainkasuratan a pammaneknek a mangsuporta iti daytoy a panangipapan. Agparang a nalablabit immawat iti maysa a kita ti panagipadto nga annongen manipud ken Jehova, kas kadagidi immun-una a mammadto a babbai.

Nagsao ni Nehemias iti di mainugot maipapan ken Noadias a mammadto a babai, nga, agraman “ti dadduma pay kadagiti mammadto,” pinadasna nga imula ken Nehemias ti buteng ket iti kasta malapdan ti panangibangon manen kadagiti pader ti Jerusalem. (Ne 6:14) Nupay nagtignay a bumusor iti pagayatan ti Dios, saan a kanayon a kayat a sawen daytoy nga awan nalinteg a takderna kas mammadto a babai sakbay dayta.

Ni Jehova nagsao ken Ezequiel maipapan kadagiti Israelita a babbai nga “agak-akem kas mammadto manipud iti bukodda a puso.” Ipasimudaag daytoy nga awanan dagitoy a mammadto a babbai iti nadibinuan nga annongen manipud iti Dios no di ket sinsinanda laeng, a bukbukodda nga inaramid ti bagbagida kas mammadto. (Eze 13:17-19) Babaen kadagiti mangsilo ken mangallilaw nga ar-aramid ken propagandada ‘nagan-anupda kadagiti kararua,’ a kinondenarda dagiti nalinteg ket pinanuynoyanda dagiti nadangkes, ngem ispalen ni Jehova ti ilina manipud iti imada.​—Eze 13:20-23.

Idi tiempo ti pannakayanak ni Jesus, bayat a maibilbilang pay laeng dagiti Judio kas ili a nakitulagan ni Jehova, nagserbi ni baketen nga Ana kas mammadto a babai. “Saan a pulos limmanglangan idiay templo, a mangipapaay iti sagrado a panagserbi iti rabii ken aldaw buyogen dagiti panagayunar ken ar-araraw.” Babaen ti ‘panagsaona maipapan iti ubing [a ni Jesus] kadagidiay amin nga agur-uray iti pannakaispal ti Jerusalem,’ nagakem kas mammadto sigun iti pamunganayan a kaipapanan a ‘panangisarita’ iti maysa a palgaak iti panggep ti Dios.​—Lu 2:36-38.

Ti panagipadto ket maysa kadagiti namilagruan a sagut ti espiritu a naipaay iti kabbuangay a kongregasion Kristiano. Ti sumagmamano a Kristiano a babbai, kas iti uppat a birhen nga annak ni Felipe, nagipadtoda iti sidong ti panangtignay ti nasantuan nga espiritu ti Dios. (Ara 21:9; 1Co 12:4, 10) Kaitungpalan daytoy ti Joel 2:28, 29, a nangipadto a “ti annakyo a lallaki ken ti annakyo a babbai sigurado nga agipadtodanto.” (Ara 2:14-18) Ti kasta a sagut, nupay kasta, saanna nga inikkat ti panagpasakup ti babai iti kinaulo ti asawana wenno kadagiti lallaki iti uneg ti kongregasion Kristiano; kas simbolo ti panagpasakupna, mangaramat idi iti abbong iti ulo no agipadpadto (1Co 11:3-6) ket saan nga agakem kas mannursuro iti uneg ti kongregasion.​—1Ti 2:11-15; 1Co 14:31-35.

Ti arig-Jezebel a babai iti kongregasion ti Tiatira kinunkunana nga addaan kadagiti pannakabalin nga agipadto ngem sinurotna ti dana dagiti nagkauna nga ulbod a mammadto a babbai ket inawatna ti panangkondenar ni Kristo Jesus iti mensahena ken Juan iti Apocalipsis 2:20-23. Di siuumiso a nagakem kas mannursuro ket inyaw-awanna dagiti kameng ti kongregasion nga agturong iti dakes nga ar-aramid.