HELBON

Maysa a lugar nga agdindinamag gapu iti nasayaat nga arakna, nga ipatpateg unay ti siudad ti Tiro. (Eze 27:18) Ti Helbon ket kaaduanna a maikunkuna nga isu ti agdama a purok ti Halbun, agarup 20 km (12 mi) iti amianan nga amianan-a-laud ti Damasco. Adda dayta a purok iti akikid a ginget a natukantukad dagiti kaubasanna nga adda kadagiti nangato a darisdis ti bantay. Idi un-unana, saan laeng a Tiro ti agang-angkat iti arak ti Helbon no di ket kasta met ti Asiria, Babilonia, ken Persia.