19. Apay a padasento ni Gog nga agawen ti nadalus a panagdaydayaw?

¹⁹ Dagiti dakes a motibo ni Gog. Mangaramidto dagiti nasion “iti dakes a plano.” Ipakitadanto ti nabayagen a panangbusor ken gurada kadagiti agdaydayaw ken Jehova, a kasla awan gawgawayda ken kasla “agnanaedda amin kadagiti lugar nga awanan iti pader, trangka, wenno ruangan.” Magagaran dagiti nasion a ‘mangala iti adu a sanikua’ kadagidiay “agur-urnong iti kinabaknang.” (Ezek. 38:10-12) Ania a “kinabaknang”? Adu ti naespirituan a kinabaknang ti ili ni Jehova; ti kapatgan a sanikuatayo ket ti nadalus a panagdaydayawtayo, a ni Jehova laeng ti pangipapaayantayo. Kayat dagiti nasion nga agawen ti nadalus a panagdaydayaw, saan a gapu ta napateg kadakuada, no di ket gapu ta kagurada dayta ken ti amin a mangsupsuporta iti dayta.