² Naammuan ni Ezekiel nga agayus ti karayan iti Natay a Baybay ken mangpaimbag iti naapgad ken awan biagna a danum apaman a dumanon iti dayta a baybay, isu nga umadu dagiti ikan. Kadagiti igid ti karayan, makitkitana met ti amin a nagadu a klase ti kayo. Binulan a mangpataudda kadagiti baro ken nasustansia a bunga, ken makaagas dagiti bulongda. Kimmalma la ketdi ti puso ni Ezekiel ken rimmaniag ti namnamana idi nakitana dagita. Ngem ania ti kaipapanan kenkuana ken kadagiti padana a naipanaw daytoy a detalye ti sirmata maipapan iti templo? Ken ania ti kaipapanan dayta kadatayo ita?

6. (a) Ania a kari ti ipasigurado ti nailadawan a padto? (b) Ania met ti pakdaar ti sirmata? (Kitaen ti footnote.)

⁶ Danum a mangted iti biag. Iti sirmata a nakita ni Ezekiel, nagayus ti karayan agingga iti Natay a Baybay, a nangbiag iti adu a paset dayta. Paliiwenyo ta nangbiag ti danum iti adu a nadumaduma a kita ti ikan, a maipada kadagiti adda iti Dakkel a Baybay wenno Baybay Mediteraneo. Adda payen narang-ay nga industria ti panagkalap iti igid ti Natay a Baybay iti nagbaetan ti dua nga aginnaddayo nga ili. Kinuna ti anghel: Agbiagto ti “amin nga agnanaed iti pagayusan ti danum.” Ngem kayatna kadi a sawen a ti danum nga aggapu iti balay ni Jehova ket dumanon iti amin a paset ti Natay a Baybay? Saan. Inlawlawag ti anghel a ti dadduma nga alog ket saan a madanon ti danum a mangted iti biag. “Agtalinaeddanto a naapgad.”b (Ezek. 47:8-11) Isu a ti nailadawan a padto ipakaammona ti kari a mangipasigurado a ti nadalus a panagdaydayaw ket mangpaimbag kadagiti tattao tapno agtultuloyda nga agbiag. Ngem adda met pakdaar: Saan nga amin ket umawat kadagiti bendision ni Jehova; wenno saan nga amin ket mapaimbag.

Danum a Mangted iti Biag

IDI UN-UNANA: Aglaplapusanan a bendision ti impaay ni Jehova iti natulnog nga ilina, immadu ti bilangda, ken rimmang-ayda iti naespirituan

AGDAMA A TIEMPO: Iti sumaysayaat a naespirituan a paraiso, umad-adu dagiti magunggonaan iti lumawlawa a panagayus ti naespirituan a bendision ni Jehova ken arigna napagbiagda iti naespirituan

MASANGUANAN: Agkakaduanto dagiti makalasat iti Armagedon ken ti minilion a mapagungar, ket aglaplapusananto dagiti bendision ni Jehova para iti amin

12. (a) Ania dagiti nakitatayon a pammaneknek a ti kinapudno iti Biblia ket nangted iti biag ken naespirituan a salun-at kadagiti tattao? (b) Ania ti naintiempuan nga ipakdaar kadatayo ita ti sirmata? (Kitaen met ti footnote.)

¹² Danum a mangted iti biag. Naibaga ken Ezekiel: Agbiagto ti “amin nga agnanaed iti pagayusan ti danum.” Panunotenyo ti epekto ti mensahe ti kinapudno a nagayus iti amin a nakikadua kadatayo iti naisubli a naespirituan a daga. Dagiti kinapudno iti Biblia ket nangted iti biag ken naespirituan a salun-at kadagiti minilion nga interesado iti kinapudno. Ngem adda met naintiempuan a pakdaar ti sirmata: Saan nga amin ket nagtalinaed nga interesado iti kasta a kinapudno. Kas iti alog ken nalutlot a disso iti Natay a Baybay iti sirmata ni Ezekiel, adda dagiti saan nga interesado, dida kayat nga awaten ken iyaplikar ti kinapudno.c Ditay koma pulos agbalin a kasta!​—Basaen ti Deuteronomio 10:16-18.