EN-EGLAIM
[Ubbog (Burayok) ti Dua a Kigaw a Baka].
Iti maysa a simboliko a sirmata a naited ken Ezequiel, ti naasin a dandanum ti Natay a Baybay “mapaimbag” ket dagiti dumadaklis agtakderda kadagiti igidna manipud En-gedi agingga idiay En-eglaim. (Eze 47:8-10) Ipasimudaag ti mismo a naganna a dayta ket adda iti igid ti maysa a burayok. Kaaduan nga eskolar kunaenda a ti En-eglaim isu ti ʽAin Feshka, iti asideg ti makin-amianan a laud nga ungto ti Natay a Baybay. Ti ʽAin Feshka ken ti ʽAin Jidi (a nangtaginayon iti nagan ti En-gedi) nga agarup 29 km (18 mi) iti abagatan, buklenda ti dua a kangrunaan a nadam-eg a disso iti makinlaud nga igid ti Natay a Baybay. Iti sabali a bangir, kunaen ti dadduma nga isu dayta ti maysa a disso iti makin-abagatan a daya nga igid ti Natay a Baybay, iti asideg ti Zoar. Maibatay kadagiti kadaanan a naisurat a dokumento, a mangtukoy iti distrito ti ʽAgaltain, kunaen ni Y. Yadin a “nalawag a ‘ti distrito ti ʽAgaltain’ isu ti makin-abagatan a daya a paset ti Natay a Baybay . . . No adda panagkanaig ti ʽAgaltain ken En-eglaim iti padto ni Ezequiel maipapan iti Natay a Baybay (Eze. 47:10: ‘ket mapasamakto a dagiti dumadaklis agtakderdanto iti rabawna manipud En-gedi agingga a mismo idiay En-eglaim’)—ti rebbeng a kayulogan daytoy a teksto ket mapaimbagto ti Baybay manipud agsumbangir nga igidna—maysa a nakabatbatad ken nakalawlawag a panangiladawan. Saan a kasapulan a sapulen pay ti En-eglaim iti makinlaud nga igid ti baybay (nabiit pay a naikuna a dayta ket isu ti Ain-Feshkha), ta no kasta nalimitaran laeng iti makinlaud nga igid ti tuktukoyen ti naimpadtuan a sirmata.”—Israel Exploration Journal, Jerusalem, 1962, Tomo 12, p. 250, 251.