7. Gapu ta adda kaykayo iti igid ti karayan iti sirmata, ania ti impasigurado dayta kadagiti naadipen a Judio?

⁷ Kaykayo a pagtaraon ken makaagas. Dagidiay ngay kaykayo iti igid ti karayan? Nayonanda ti pintas ti nailadawan a lugar, di ngamin? Nayonanda pay ti kaipapananna. Sigurado a naragsakan ni Ezekiel ken dagiti kailianna a nangpanunot kadagiti naimas a bunga dagita iti kada bulan! Ipasigurado met kadakuada dayta a makaay-ayo a ladawan a taraonan ida ni Jehova iti naespirituan. Ken ania pay? Siputanyo ta dagiti bulong dagidiay a kayo ket ‘agserbinto nga agas.’ (Ezek. 47:12) Ammo ni Jehova a ti naespirituan a pannakapaimbag ti kangrunaan a kasapulan dagiti agawid ket inkarina nga ipaayna dayta. No kasano nga inaramidna dayta ket nailawlawag iti dadduma pay a padto maipapan iti pannakaisubli kas naammuantayo iti Kapitulo 9 daytoy a libro.

Kaykayo a Pagtaraon ken Makaagas

IDI UN-UNANA: Iti naespirituan a pamay-an, pakpakanen ni Jehova ti matalek nga ilina iti naisubli a dagada; pinaimbagna met ida iti nabayagen a sagsagabaenda a naespirituan a sakit

AGDAMA A TIEMPO: Ti adu nga abastotayo a naespirituan a taraon ti tumultulong kadagiti tattao a manglaban iti nasaknap a naespirituan a sakit ken bisin iti agdama a lubong

MASANGUANAN: Ni Kristo ken ti 144,000 a kaduana nga agturay tulongandanto ti amin a natulnog a tattao nga agbalin a perpekto, nasalun-at, ken nasaranta iti agnanayon!