Inaramidda ti Pagayatan ni Jehova

Kankanayon a Nagserbi ni Daniel iti Dios

MANMANO nga agbaliw ti andar ti historia iti agpatnag. Kaskasdi, naangay dayta idi 539 K.K.P., idi a ti Imperio ti Babilonia rinippuog dagiti Medo ken Persiano iti uneg ti sumagmamano la nga oras. Iti dayta a tawen, agarup 80 a tawenen nga agbibiag ni Daniel a propeta ni Jehova kas naidistiero a Judio idiay Babilonia. Nalabit idi nasurok a 90 ti edadna, maipasangon ni Daniel iti kakaruan a suot ti kinatarnawna iti Dios.

Idi natnagen ti Babilonia, mayat pay laeng ti kasasaad ni Daniel idi damo. Ti kabbaro nga ari isu ni Dario a Medo, 62-años a lakay a sipapabor ken Daniel. Maysa kadagiti immuna a tignay ni Dario isut’ panangdutokna kadagiti 120 a satrap ken ti panangital-ona iti tallo a lallaki iti ranggo a nangato nga opisial.a Maysa ni Daniel kadagitoy tallo a napaboran a lallaki. Gapu ta nabigbigna ti karkarna a laing ni Daniel, inggakat pay ni Dario a pagbalinen a primero ministro! Pagam-ammuan, napartak a nagbaliw dagiti plano ti ari.

Nasikap a Plano

Dagiti nangato nga opisial a kadua ni Daniel, agraman ti dakkel a grupo dagiti satrap, indatagda iti ari ti makakayaw nga ideya. Indawatda ken Dario a mangipaulog iti bilin a: “Siasinoman nga agdawat iti uray siasino a dios wenno tao iti bayat ti tallopulo nga aldaw, no di laeng kenka, O ari, isu maibellengto iti rukib dagiti leon.” (Daniel 6:7) Kasla nagparang ken Dario a dagitoy a lallaki iparparangarangda ti kinasungdoda kenkuana. Nalabit inutobna a daytoy a linteg makatulongto kenkuana, a maysa a ganggannaet, a mangpabileg iti saadna kas pangulo ti pagturayan.

Nupay kasta, dagiti nangato nga opisial ken dagiti satrap dida inggakat daytoy a mandamiento a paglaingan ti ari. “Nagbirbirokda iti puon ti darum a maibusor ken Daniel a maipapan iti pagarian; ngem dida nakasarak iti puon ti darum wenno pamabasolan, agsipud ta isu matalek idi, awan met ti aniaman a biddut wenno pagkurangan a nasarak kenkuana.” Isu a sigun kadagitoy a manangisikat: “Ditayto makasarak iti aniaman a puon ti darum a maibusor itoy a Daniel, malaksid no birukentayo ti maisalungasing kenkuana a maipapan iti linteg ti Diosna.” (Daniel 6:4, 5) Gapu ta ammoda nga inaldaw a nagkararag ni Daniel ken Jehova, impamuspusanda a pagbalinen daytoy a basol a patay ti dusana.

Nalabit dagiti nangato nga opisial ken dagiti satrap marurodda ken Daniel gapu ta isu “naisangayan iti ngatuen [dagitoy], agsipud ta adda kenkuana ti mangnibinibi nga espiritu; ket ti ari pinampanunotna nga isaad iti ngatuen iti amin iti pagarian.” (Daniel 6:3) Ti kinamapagpiaran ni Daniel mabalin a nangpataud iti di matarigagayan a lapped iti panagkunniber. Uray pay no ania ti kaso, inallukoy dagitoy a lallaki a pirmaan ti ari ti mandamiento, ket nagbalin a paset ti “linteg dagiti Medos ken Persas, isu a saan a mabalbaliwan.”​—Daniel 6:8, 9.

Nagtalinaed a Determinado ni Daniel

Idi nadamagna ti kabbaro a mandamiento, nagsardeng ngata ni Daniel nga agkararag ken Jehova? Nikaanoman! Nagparintumeng idiay makintuktok a siled ti balayna, nagkararag iti Dios iti namitlo kada aldaw, “a kas ar-aramidenna” a dati. (Daniel 6:10) Bayat nga agkarkararag, dagiti kabusorna “nagtitiponda ket nasarakanda ni Daniel nga agdawdawat ken agpakpakaasi iti sanguanan ti Diosna.” (Daniel 6:11) Idi indatagda daytoy iti ari, nagladingit ni Dario ta ti linteg a pinirmaanna inkalam-itna ni Daniel. “Nagtrabaho agingga iti ilelennek ti init iti panangispalna kenkuana,” kuna kadatayo ti salaysay. Ngem uray ti ari dina mawaswas ti linteg nga immandarna. Iti kasta impanda ni Daniel idiay rukib dagiti leon, a nabatad nga abut wenno usok. “Ti Diosmo a pagserserbiam a kankanayon, ispalennakanto,” impanamnama ti ari ken ni Daniel.​—Daniel 6:12-16.

Kalpasan ti nagpatnag a puyat ken panagayunar, sidadaras a napan ni Dario idiay rukib. Sibibiag ni Daniel ken di naan-ano! Dagdagus a nagtignay ti ari. Impaipurruakna dagiti kabusor ni Daniel agraman pamiliada idiay rukib dagiti leon kas gunggonada. Impaiwaragawag met ni Dario iti intero a masakupan nga “amin a pagturayan toy pagariak, a dagiti tattao agpigergerda ken agbutengda koma iti sango ti Dios ni Daniel.”​—Daniel 6:17-27.

Leksion Para Kadatayo

Ni Daniel nasayaat nga ehemplo ti kinamatalek. Uray ti ari, a di nagdaydayaw ken Jehova, nadlawna a ni Daniel nagserbi Kenkuana “a kankanayon.” (Daniel 6:16, 20) Ti ramut a sao ti Aramaico a naipatarus a “kankanayon” ad-adda a kayuloganna ti “agpuspusipos.” Isingasingna ti panagpatpatuloy. Nagsayaat ketdin ti panangdeskribir daytoy iti di agressat a kinatarnaw ni Daniel ken Jehova!

Nabayagen a kankanayon a matalek ni Daniel sakbay pay a naitapuak iti rukib dagiti leon. Idi agtutubo pay la a kautibo idiay Babilonia, dina kinayat ti mangan wenno uminum kadagiti imparit ti Linteg Mosaiko wenno dagidiay tinulawan ti ritual a pagano. (Daniel 1:8) Idi kuan, situtured nga indeklarana ti mensahe ti Dios ken Nabucodonosor nga ari ti Babilonia. (Daniel 4:19-25) Sumagmamano la nga oras sakbay ti pannakarpuog ti Babilonia, simamaingel nga imbunannag ni Daniel ti panangukom ti Dios ken Ari Belsasar. (Daniel 5:22-28) Isu nga idi sinaranget ni Daniel ti rukib dagiti leon, intultuloyna ti matalek a kurso nga inrugina.

Uray dakayo makapagserbikay met a kankanayon ken Jehova. Agtutubokayo kadi? Ngarud agtignaykay itan a mangpatanor iti kinamatalek babaen ti panangilaksidyo iti dakes a pannakikadkadua toy lubong ken makaperdi a konduktana. No nabayagkayon nga agserserbi iti Dios, taginayonenyo ti padron ti matalek a panagibtur. Dikay agsanud, ta tunggal suot a sanguentayo mangipaay kadatayo iti gundaway tapno ipakita ken Jehova a determinadotayo nga agserbi kenkuana a kankanayon.​—Filipos 4:11-13.

[Footnote]