Iti edad a 18, nagbalin nga ari ni Jehoiaquin ket intultuloyna dagiti dakes nga aramid ni amana. (2Ar 24:8, 9; 2Cr 36:9, Rbi8 ftn) Ti ama ni Jehoiaquin a ni Jehoiaquim ket iturturayan ni Ari Nabucodonosor ti Babilonia ngem nagrebelde idi maikatlo a tawen iti basalio a kasasaadna (618 K.K.P.). (2Ar 24:1) Nagbanag daytoy iti pananglakub maibusor iti Jerusalem. Ti sasao a “bayat dayta a tiempo” (2Ar 24:10) ket mabalin a tumukoy iti nalawa a periodo a pagaplikaranna saan ket nga iti apagbiit a panagturay ni Jehoiaquin, iti kasta mabalin a ti pananglakub ket nangrugi idi tiempo ti panagturay ni amana a Jehoiaquim, a kasla ipasimudaag ti Daniel 1:1, 2. Agparang a natay ni Jehoiaquim bayat daytoy a pananglakub ket ni Jehoiaquin ti nagtugaw iti trono ti Juda. Nupay kasta, nagpatingga ti turayna kalpasan laeng ti tallo a bulan ken sangapulo nga aldaw, idi simmuko ken Nabucodonosor idi 617 K.K.P. (iti bulan ti Adar, sigun iti maysa a cronica ti Babilonia). (2Ar 24:11, 12; 2Cr 36:9; Assyrian and Babylonian Chronicles, ni A. Grayson, 1975, p. 102) Kas kaitungpalan ti sao ni Jehova babaen ken Jeremias, naidestiero ni Jehoiaquin idiay Babilonia. (Jer 22:24-27; 24:1; 27:19, 20; 29:1, 2) Naidestiero met ti dadduma pay a kameng ti naarian a sangakabbalayan, dagiti opisial ti palasio, nasigo a trabahador, ken mannakigubat.​—2Ar 24:14-16; kitaenyo ti NABUCODONOSOR.

Kunaen ti rekord iti 2 Ar-ari 24:12-16 nga indestiero ni Nabucodonosor dagitoy a kautibo, a karaman “dagiti amin a gameng ti balay ni Jehova ken dagiti gameng ti balay ti ari.” Ibaga ti salaysay iti Daniel 1:1, 2 a ti laeng naipan idiay Babilonia ket “paset dagiti aruaten.” Mabalin a gapu ta dagiti aruaten laeng a balitok ti gameng a tuktukoyen ti Maikadua nga Ar-ari, a naipaganetget iti dayta a salaysay, ket naipalubos a maibati ti dadduma pay nga aruaten. Ti sabali pay a posibilidad ket idi simmuko ti Jerusalem iti pananglakub ti Babilonia (a dimteng kas resulta ti panagrebelde ni Jehoiaquim iti ari ti Babilonia), naipan idiay Babilonia “ti sumagmamano kadagiti aruaten iti balay ni Jehova,” ket kalpasan ti ababa a tiempo, idi naipan metten ni Jehoiaquin idiay Babilonia, naikuyog met ti dadduma pay a “matarigagayan nga aruaten iti balay ni Jehova.” Daytoy a posibilidad ket ipasimudaag ti salaysay iti 2 Cronicas 36:6-10. Manipud iti salaysay ti Cronicas, agparang a kalpasan ti naballigi a panangparmekna iti Jerusalem, pimmanaw ni Nabucodonosor ngem idi agangay “nagbaon . . . ket impanna [ni Jehoiaquin] idiay Babilonia agraman dagiti matarigagayan nga aruaten iti balay ni Jehova.” Iti umasping a pamay-an, kalpasan ti sangapulo a tawen, iti maudi a panangparmek ken panangdadael iti Jerusalem (607 K.K.P.), pimmanaw ni Nabucodonosor ket napan idiay Ribla “iti daga ti Hamat,” a dagiti maaramid kalpasan ti panagparmek ket intalekna iti panguluen dagiti para-guardiana a ni Nabuzaradan.​—2Ar 25:8-21.

Kunaen ti salaysay ni Daniel (1:1, 2) a dimteng ni Nabucodonosor maibusor iti Jerusalem ken linakubna dayta ket nayawat ni Jehoiaquim, agraman ti sumagmamano kadagiti aruaten ti templo, iti ima ti ari ti Babilonia. Nupay kasta, iladawan ti salaysay iti 2 Ar-ari 24:10-15 ti pananglakub dagiti taga Babilonia iti Jerusalem ken ipakitana a ti simmuko idi agangay ken simmurot kadagiti taga Babilonia ket ti anak ni Jehoiaquim a ni Jehoiaquin, a ti panagturayna nagpaut laeng iti tallo a bulan ken sangapulo nga aldaw. Agparang ngarud a natay ni Jehoiaquim bayat ti pannakalakub ti siudad, nalabit iti nasapa a paset dayta. Impasimudaag ti padto ni Jehova babaen ken Jeremias (22:18, 19; 36:30) a saan nga umawat ni Jehoiaquim iti disente a pannakaitabon; ti bangkayna ket maiwalang iti ruar dagiti ruangan ti Jerusalem, a maisarang iti pudot ti init iti aldaw ken iti nakaro a lamiis iti rabii. Saan a naipalgak no kasano a ‘nayawat ni Jehoiaquim iti ima ni Nabucodonosor’ (Da 1:2). Mabalin a nayawat ni Jehoiaquim iti wagas nga isu ket natay bayat ti pannakalakub kalpasanna naipan ti anakna iti pannakakautibo, iti kasta ti kinaari iti linia ni Jehoiaquim ket napukaw iti im-ima ni Nabucodonosor. Saan a pulos masigurado ti nabayagen a patpatien dagiti Judio (inlanad ni Josephus) a ni Jehoiaquim ket pinatay ni Nabucodonosor sa imbilinna a maibelleng ti bangkayna iti ruar dagiti pader ti Jerusalem. (Jewish Antiquities, X, 97 [vi, 3]) Aniaman a wagas ti pannakatay ni Jehoiaquim, agparang a dagiti gambang a grilios nga intugot ni Nabucodonosor a pangparautna ken Jehoiaquim ket saan a nausar kas naiplano.​—2Cr 36:6.