Inton Adda Panagtutunos iti Intero a Lubong
NAKABUYAKAYO kadin iti dua a nalaing a sirkero, sumasala iti ballet, wenno ag-skate iti kayeluan? Tunggal panaggarawda ket agkasapulan iti artistiko a paglaingan, abilidad, ken pamay-an. Dayta ti pakakitaan iti naan-anay a panagtinnulong ken panagtinnunosda. Nagragsak ketdin no ti biag itatta ket nasaysayaat pay ngem iti dayta—adda panagtutunos ket awan panagririri ken panaglalaban. Ngem kas naipadto iti Biblia maipapan iti panawentayo, dagiti tattao ‘saanda a sidadaan iti aniaman a tulagan.’—2 Timoteo 3:1-5.
Kaskasdi, iti daytoy narigat a kasasaad, riniwriw a nasingpet-panagpuspusoda a tattao ti agsursuron nga agbiag buyogen ti pudno a talna ken panagtutunos. Kasano? Babaen ti panangawatda iti napasnek nga awis a nailanad iti Biblia idiay Isaias 48:17, 18 a kastoy ti kunana: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam. O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon ti baybay.”
No awatentayo dayta a naimpusuan nga awis, kaawatan a ni Jehova ti agbalin a Mananggunggona kadatayo. Isursuronatayo no kasano ti “magna” buyogen ti pudno a talna ken panagtutunos. Ti kasunganina—ti panangtulad kadagiti teoria ken pilosopia dagiti imperpekto a tattao—ket minamaag. Namin-adun a pinatalgedan ti pakasaritaan ti tao ti kangrunaan a kinapudno a nailanad idiay Jeremias 10:23: “Saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” Iti simple a pannao, ditay kabaelan nga iturayan ti bagbagitayo ken makaaramid iti nainsiriban a pagannurotan mainaig iti naimbag a kababalin nga agaplikar iti amin. Ti Dios laeng ti makaaramid kadagita.—Isaias 33:22.
Pudno a Talna ken Panagtutunos
Asidegen nga iyeg ti Dios ti panagtutunos iti dagatayo. Inkarina nga addanto tiempo a “ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.” (Isaias 11:9) Wen, agarinto met laengen ti manayon a talna.
Kinapudnona, mapasaranto dagiti sibibiag ditoy daga ti baro a kita ti panagtutunos. Ngamin, ti Dios isuronanto dagiti nasungdo a tattao nga iturayanna nga agbalin a nalaing a manangaywan iti planeta a daga. Kayariganna, ‘mamatalgedto pay iti tulag’ iti amin nga agkaan iti padada nga animal, isu a sitatalna nga agpasakupdanto kadagiti tattao.—Oseas 2:18; Genesis 1:26-28; Isaias 11:6-8.
Saan laeng nga arapaap daytoy a namnama. Kinapudnona, iti laengen sermonna iti Bantay, namindua a dinakamat dayta ni Jesus. Umuna, kinunana: “Naragsak dagiti naalumamay ti kababalinda, yantangay tawidendanto ti daga.” Kalpasanna, idi insurona dagiti adalanna no kasano ti agkararag, kinunana: “Amami . . . , maaramid koma ti pagayatam, kas sadi langit, kasta met iti daga.” (Mateo 5:5; 6:9, 10) Idi dandanin matay, ginupgop ni Jesus ti kaipapananto dayta kadagiti tattao babaen iti maysa a makaay-ayo a sao—“paraiso.” (Lucas 23:43) Kinapudnona, gapu iti naibukbok a dara ni Jesus, sigurado a pumaysonto ti namnama a panagbiag nga agnanayon iti paraiso a daga!—Juan 3:16.
[Ladawan iti panid 12]
Iti asidegen a Paraiso nga inkari ti Dios, mapasaranto dagiti sibibiag ditoy daga ti baro a kita ti panagtutunos