TINNAG

Parsed a linas; lubid nga adda nakabitin a metal, bato, wenno pila iti ungtona kas padagsen tapno agtalinaed a nalinteg ken tapno diretso a nakatakder dagiti maibangon a pader ken dadduma pay a patakder. Uray ti mismo laeng a padagsen maaw-awagan no dadduma iti kuribatong, wenno tinnag. Nagar-aramat iti tinnag dagiti allawagi, kantero, ken dadduma pay a nasigo a trabahador kadagidi nagkauna a tiempo.

Mainaig iti panangibangon manen iti templo idiay Jerusalem, nailadawan ni Zorobabel kas siiiggem iti tinnag, iti literal, “ti bato [wenno, padagsen], ti lata,” sigun iti Masoretiko a teksto. (Zac 4:9, 10) Kas naipadto, saan laeng nga insaad ni Zorobabel ti pamuon ti templo no di ket isu pay ti nangaywan iti pannakaitultuloy ti trabaho agingga a nairingpas.​—Esd 3:8-10; 6:14, 15.

Nakita ni Amos iti maysa a sirmata a ni Jehova ket nagsaad iti maysa a pader a naaramid babaen iti tinnag, ket ngarud sigud a nalinteg, eskualado ti takder dayta. Nakita a siiiggem ni Jehova iti maysa a tinnag, ket naibaga iti mammadto a mangisasaad ti Dios iti tinnag iti tengnga ti ilina. Yantangay saan a nalasatan ti Israel ti naespirituan a pannubok iti kinalinteg, a saanda a nagtignay maitunos kadagiti kalkalikaguman ti Dios, ipakat ni Jehova ti hustisia ket ‘saannan a palabsen pay dayta.’ Mapaglangalang dagiti nangato a disso ti Israel, mapagwalangwalang dagiti santuariona, ket ti Dios ‘tumakder a bumusor iti balay ni Jeroboam buyogen ti kampilan.” (Am 7:7-9) Maitunos kadagitoy a sasao, dagiti Asirio pinagwalangwalangda ti Israel ken dinadaelda ti Samaria idi 740 K.K.P.