Inalun-onna Aya ni Jonas?
KUNAEN kadatayo ti Biblia nga idi intarayan ni Jonas, maysa a mammadto ni Jehova idi maikasiam a siglo K.K.P., ti nakaitudinganna, isut’ naglugan iti maysa a barko. Idi sinallama ti bagio ti panaglayagda idiay Mediteraneo, isut’ intappuak dagiti tripulante iti baybay. “Insagana ni Jehova ti maysa a dakkel nga ikan a mangalun-on ken ni Jonas, iti kasta nagyan ni Jonas iti tian ti ikan bayat ti tallo nga aldaw ken tallo a rabii.”—Jonas 1:3-17.
Kuna dagiti dadduma, ‘Imposible! Awan parsua idiay baybay a makabael a mangalun-on iti maysa a tao.’ Ngem kabaelan ti sperm whale wenno ti dakkel a white shark [puraw a pating]. Nangipaay ti maysa pay a pamattapattaan ti National Geographic (Disiembre 1992)—ti whale shark [baliena a pating]. Daytoy ti pagaammo a kadakkelan a pating, a mabalin a 20 metro ti kaatiddogna ken agdagsen ti 70 tonelada.
“Tumulong ti naidumduma a tian ti whale shark a mangilawlawag iti pakasaritaan ni Jonas. Nalakayo la a madarepdep ti bagiyo a di nairanta a naisakmol iti ngiwat ti whale shark, a nakadakdakkel . . . Malaon ti rimmukib a ngiwat uray ti bassit a nataengan a whale shark ti dua a Jonas.”
Mangmangan ti whale shark kadagiti babassit a plankton ken krill, a “lumasat iti esopago nga agturong iti nalawa ken agbennat a tian.” Ngem, kasano a makaruar ti maysa a tao iti dayta? Kunaen ti National Geographic: “Addaan dagiti pating iti naalumanay a pamay-an ti panangiyula kadagiti dadakkel a banag a maalimonda a narigat a marunaw . . . In-inut a luangan ti pating ti tianna babaen ti panangibakuar ken panangiyulana iti dayta iti ngiwat. . . . Isu a maipauyaska a rummuar iti nagalis nga alpombra, medio nagalis ngem nalabit nakaadal manipud iti kapadasan.”
Ita saan a masarakan dagiti whale shark idiay Mediteraneo, nupay masarakanen dagita iti umamianan kas ti Siudad ti Nueva York. Addada kadin idiay Mediteraneo idi panawen ni Jonas? Siasino ti makasiguro? Saan a dinakamat ti Biblia no ania a kita a parsua iti taaw ti inusar ni Jehova, ngem pinasingkedan ni Jesus a mismo a pudno ti salaysay maipapan ken Jonas.—Mateo 12:39, 40.
[Picture Credit Line iti panid 32]
Norbert Wu/Peter Arnold Inc.