BET-EZEL

Maysa nga ili, nabatad nga iti Juda, a nadakamat laeng iti padto ni Mikias a nangipakpakauna iti didigra a naikeddeng a dumteng iti di matalek a Samaria ken Jerusalem. (Mik 1:11) Maulit-ulit a ti mammadto mangaramid iti panangay-ayam iti sasao iti panangaramat kadagiti nagan ti sumagmamano nga il-ili iti daytoy a paset ti padto, isu a ti aktual nga ibagbagana: “Iti balay ni Afra [nalabit kaipapananna ti “Tapok”] agiladkayo iti mismo a tapok. Bumallasiwka, O babai nga agnanaed iti Safir [kaipapananna ti “Nangayed; Napasileng; Makaay-ayo”], buyogen ti nakababain a kinalabus. Ti babai nga agnanaed iti Zaanan saan a rimmuar. Ti panagdung-aw ti Bet-ezel [kaipapananna ti “Balay iti Asideg (Abay)”] alaennanto kadakayo ti nakaisaadanna a disso. Ta ti babai nga agnanaed iti Marot [nagtaud iti sao a kaipapananna ti “pumait”] inurayna ti naimbag, ngem ti dakes bimmaba manipud ken Jehova nga agturong iti ruangan ti Jerusalem.” (Mik 1:10-12) No kasta, ti pakdaar ti mammadto, a naiturong kadagidiay naikeddeng nga aglak-am iti dayta a didigra, ket kasla ibagbagana kadakuada nga agsaknapto ti panagdung-aw agingga iti Jerusalem.

Naikuna nupay saan a sigurado a ti Bet-ezel ket adda iti ayan ti agdama-aldaw a Dir el-ʽAsal, agarup 16 km (10 mi) iti laud nga abagatan-a-laud ti Hebron.