BELIAL

[manipud Heb., kaipapananna ti “Awan Kaes-eskanna”; nagsilpo a beliʹ, “saan, awanan,” ken ya·ʽalʹ, “makagunggona; pakagunggonaan”].

Ti kualidad wenno kasasaad a kinaawan serserbi, di nadayaw, kinaawan kaes-eskan. Ti Hebreo a termino a beli·yaʹʽal ket naaramat a tumukoy kadagiti kapanunotan, sasao, ken patigmaan (De 15:9; Sal 101:3; Na 1:11), kadagiti makadidigra a kasasaad (Sal 41:8), ken masansan unay, iti awan kaes-eskanna a tattao a kakaruanen​—kas pagarigan, ti tattao a mangiparegta iti panagdaydayaw iti sabali a didios (De 13:13); dagidiay kameng ti Benjamin a nakaaramid iti krimen iti sekso idiay Gabaa (Uk 19:22-27; 20:13); ti nadangkes nga annak ni Eli (1Sm 2:12); ni nakuspag a Nabal (1Sm 25:17, 25); dagiti bumusbusor iti pinulotan ti Dios, a ni David (2Sm 20:1; 22:5; 23:6; Sal 18:4); dagiti awan serserbida a katimpuyog ni Jeroboam (2Cr 13:7); dagiti kakumplot ni Jezebel maibusor ken Nabot (1Ar 21:10, 13); ken ti pangkaaduan a tattao a manggutugot iti rinnupir (Pr 6:12-14; 16:27; 19:28). Iti panangipakita ni Jehova nga awanton ti mangbusor a bileg a mangsinga iti pudno a panagdaydayaw ti ilina iti dagada, indeklarana babaen iti mammadtona: “Awanton ti lumasat manen kenka nga asinoman nga awan kaes-eskanna a tao. Sigurado a magessatto a naan-anay.”​—Na 1:15; kitaenyo met ti 1Sm 1:16; 10:27; 30:22; Job 34:18.

Idi naituloyen ti pannakaisurat ti Biblia idi umuna a siglo, naaramat ti “Belial” kas nagan a maipaay ken Satanas. Gapuna idi insurat ni Pablo iti 2 Corinto 6:15 ti agsasaruno a pangipadis a sasaona nga, “Ania ti pagtunosan da Kristo ken Belial?” maikuna a dagus a ni “Belial” isu ni Satanas. Iti Syriac a Peshitta, “Satanas” ti mabasa ditoy.