TEMAN

[Makannawan; Abagatan].

1. Maysa a kaputotan ni Esau babaen iti inauna nga anakna a ni Elifaz (Ge 36:10, 11; 1Cr 1:35, 36); Edomita a shik.​—Ge 36:15, 16, 34, 42.

2. Maysa a lugar nga isu ti Tawilan nga agarup 5 km (3 mi) iti daya ti Petra, sigun iti dadduma nga eskolar. Nabatad a dayta ket Edomita a siudad wenno distrito (ti daga dagiti Temanita), a nagnaedan dagiti kaputotan ni Teman. (Ge 36:34; Jer 49:7, 20; Eze 25:13; Am 1:11, 12; Abd 9) Ti lugar nagdindinamag kas sentro ti kinasirib. (Jer 49:7) Iti libro ti Habakuk, nadakamat nga um-umay ti Dios manipud “Teman, Daydiay mismo a Santo manipud Bantay Paran.” Mabalin a tumukoy daytoy iti panagsilnag ti dayag ni Jehova, a ti kinangayedna ket iyanninaw dagiti bantay bayat nga ilasatna iti Edom ti kabbuangay a nasionna nga iturongna ida iti Naikari a Daga.​—Hab 3:3, 4; idiligyo ti De 33:2.