SINGSING
Nagsirkulo nga alahas. Adda nadumaduma a sukog-singsing nga arkos a kadawyan nga inar-aramat dagiti lallaki ken babbai a Hebreo, Egipcio, Asirio, Babilonio, Griego, Romano, ken dadduma pay a tattao idi ugma. Mayaruat dagitoy kadagiti agong, lapayag, ken ramramay. (Kitaenyo ti ARITOS; ARITOS TI AGONG.) Ti karaman kadagiti material a naaramid a singsing ket balitok, pirak, suer, bronse, sarming, landok, ken marfil; ti dadduma a singsing ket natampokan iti batbato. Nangnangruna a pagay-ayat dagiti Egipcio ti singsing a nakitikitan iti ladawan dagiti abal-abal, nga imbilangda a simbolo ti agnanayon a biag. Kadagiti nakaad-adu nga alahas a nasarakan iti tanem ti Egipcio a ni Faraon Tutankhamen, karaman ti maysa a singsing nga addaan tallo a nagaabay a sirkulo a nakitikitan iti tallo nga abal-abal, a ti maysa a sirkulo ket asul a sarming ken balitok met ti sabali pay a dua. Ti dadduma a singsing dagiti Romano ket nakitikitan kadagiti mitolohiko a disenio wenno kadagiti ladawan pay ketdi ti inapo wenno gagayyemda.
Iti pangngarig ni Jesus maipapan iti bayanggudaw nga anak, inladawanna nga imbilin ti manangpakawan nga ama a maikabil ti maysa a singsing iti ima ti nagsubli a bayanggudaw. (Lu 15:22) Daytoy a tignay ket mangipakita iti anamong ken panagayat ti ama ken kasta met ti dignidad, dayaw, ken saad a naipaay iti daytoy nagsubli nga anak. Dagiti Kristiano ket binalakadan ni Santiago a kabsat ni Jesus iti ina a saanda koma a mangipakita iti paboritismo kadagiti tattao a nangayed ti kawesda ken addaan kadagiti balitok a singsing ti ramayda (a mangipasimudaag iti kinabaknang ken takder iti kagimongan). (San 2:1-9) Umasping iti dayta, nupay saan a kinondenar ni apostol Pedro ti panagaramat iti kakasta nga arkos, impaganetgetna nga ad-adda a napatpateg ti naespirituan nga arkos.—1Pe 3:1-5.
Dagiti Pangtanda a Singsing. Ti Hebreo a sasao a naaramat a tumukoy iti singsing, pangtanda a singsing, wenno pangselio a singsing ket nagtaud kadagiti sao a kaipapananda ti “mailumlom” (Jer 38:6) ken ‘selioan.’ (1Ar 21:8) Mabalin a nainaig dagitoy a termino iti kangrunaan a nakausaran ti sumagmamano a kadaanan a singsing, a naaramat iti pananglamma iti pila wenno allid babaen ti ‘panangilumlom’ wenno panangitalmeg iti singsing iti dayta. Dagitoy a kita ti singsing ket balitok, pirak, wenno bronse; ti dadduma ket natampokan iti bato a nakaikitikitan ti nagan wenno simbolo ti makinkukua. Permanente a naimontar ti bato dagitoy a singsing wenno mabalin a pusiposen dayta wenno baliktaden. Ibitinda ti dadduma, nalabit iti tengnged, babaen iti arkos a singdan.—Ge 38:18, 25.
Ti pangtanda a singsing ti maysa nga agturay wenno opisial ket simbolo ti autoridadna. (Ge 41:41, 42) Naaramat dagita a pangselio kadagiti opisial a dokumento wenno bambanag a saan a mabalin a palsipikaren wenno baliwan, kas iti pannakaaramat ita dagiti opisial a selio wenno pirma.—Est 3:10-13; 8:2, 8-12; Da 6:16, 17.
Piguratibo nga Usar. Kadagidi nagkauna a tiempo, agparang a ti pangtanda a singsing ket nagbalin a simbolo ti maysa a maipatpateg a banag wenno tao. Impatuldo ti padto ni Jeremias a ni Ari Conias (Jehoiaquin) a taga Juda saanna a malisian ti didigra uray pay no isu ket ‘pangselio a singsing iti makannawan nga ima ni Jehova.’ Gapuna, naikkat ni Jehoiaquin iti trono kalpasan ti nakabibiit a panagturayna. (Jer 22:24; 2Ar 24:8-15) Kasta met, kinuna ni Jehova maipapan ken matalek a Zorobabel: “Alaenkanto, . . . ket sigurado nga isaadkanto a kas pangselio a singsing, agsipud ta sika ti pinilik.” (Hag 2:23) Ni Zorobabel nga agserserbi idi ken Jehova iti maysa nga opisial nga annong mainaig iti panangibangon manen ti templo idiay Jerusalem ket napateg ken Jehova, kas iti maysa a pangtanda a singsing iti mismo nga ima ti Dios. Awanan buteng a nagtulnog ni Zorobabel iti pammaregta nga impaay ni Jehova babaen kada mammadto Haggeo ken Zacarias ket intultuloyna ti trabaho a panangibangon iti templo nupay imparit dayta ti ari ti Persia a napakaammuan iti di umiso nga impormasion. (Esd 4:24–5:2) Intultuloy ni Jehova nga inusar ni Zorobabel a mangitungpal iti nayetnag a panggepna, ket awan ti natauan nga agturay a makaikkat kenkuana iti dayta a nadayaw a panagserbina.