Apay a ni Jehova Imparangarangna ti Naganna?

Maysa a komentario ti “Daan a Tulag” a naipablaak idiay Polandia idi 1964 sinungbatanna daytoy a saludsod iti mamagpanunot unay a pamay-an. Iti sidong ti imprimatur ti Iglesia Katolika Romana, ni Dr. Stanisław Łach, propesor idiay Lublin University, kunana:

“Ti nasubbot nga ili ket responsable iti nagan ti Dios iti imatang ti sangatauan.” Responsabilidad dagiti Israelita a pagreggetan “tapno bendituen dagiti Gentil ti nagan ni Jahwe [Jehova] ken saanda koma a tabbaawan” dayta. “Ti Jahwe ket addaan kaipapanan . . . Ti lubong ket maukomto depende iti reaksion dagidiay mangipudno iti dayta a nagan.” Indeklara ti propesor a “ti nagan a Jahwe dakkelto kadagiti nasnasion . . . Daytat’ agsaknapto iti intero a lubong. Kasta ti nagtungpalan . . . dayta a nagan ken Moises.”

Wen, kas impadto ti Malakias 1:11: “‘Ta ti naganko dakkelto kadagiti nasnasion,’ kuna ni Jehova dagiti buybuyot.” Ken asino itatta ti mangiwarwaragawag iti dayta a nagan iti intero a lubong tapno “siasinoman nga umawagto iti nagan ni Jehova maisalakanto”? Dagiti Saksi ni Jehova! Ti reaksion ti publiko kadagitoy a “tattao a maipaay iti naganna,” wen, “kadagidiay a nangipudno iti dayta a nagan,” ket maysa a banag a biag ken patay kadakuada. Aniat’ reaksionyo ken Jehova ken kadagiti Saksina?​—Aramid 2:21; 15:14; idiligyo ti Malakias 3:16-18.