Dagiti Leksion Manipud iti Kasuratan: Malakias 1:1–4:6

Ti Pudno nga Apo Umayen a Mangukom

“UBBAW ti panagserbi iti Dios.” (Malakias 3:14) Ti kasta a panagduadua ket inyebkas ti mismo nga ili ti Dios idi nagipadto ni Malakias idi maikalima a siglo K.K.P. Apay? Gapu ngamin kadagiti nakaayay-ay a kasasaad iti Juda, nangnangruna kadagiti papadi. Ti naagum a gunggona ti kangrunaan a panggepda. Iti direkta ken napigsa a pamay-an, imbutaktak ni Malakias dagidiay managinsisingpet a narelihiusuan a papangulo ken namakdaar a ti pudno nga Apo ket um-umayen a maipaay iti panangukom.​—Malakias 1:6-8; 2:6-9; 3:1.

Ti padto ni Malakias addaan kaitungpalan iti kaaldawantayo. Gapuna, nasayaat no usigentayo dagiti leksion a linaonna.

Pananglais iti Nagan ti Dios

Namnamaen ni Jehova nga idaton ti ilina ti kasasayaatanda kenkuana. Umuna nga inyebkas ti Dios ti ayatna iti ilina. Nupay kasta, lalaisen dagiti papadi ti naganna babaen ti panangaw-awatda manipud kadagiti tattao kadagiti bulsek, masakit, ken pilay nga an-animal a maidaton. Awan ragsak ni Jehova kadagiti naagum a papadi wenno kadagiti nakapuy a datdaton dagiti im-imada. Ngem agpapan pay aniaman ti ar-aramidenda, “ti nagan [ni Jehova] ti nakakigkigtot iti nagtengngaan dagiti nasnasion.”​—1:1-14.

Addaan nadagsen a responsabilidad dagidiay mannursuro. (Santiago 3:1) Dagiti papadi “pinaitibkol[da] dagiti adu iti linteg.” Kasano a kasta? Babaen ti dida panangisuro kadagiti tattao iti linteg ti Dios ken babaen ti panangidumdumada. Umiso laeng a makapungtot ni Jehova kadakuada, “ta dagiti bibig dagiti papadi aywananda koma ti pannakaammo, ket birukenda koma ti linteg iti ngiwatna.”​—2:1-9.

Saan a laglag-anen ni Jehova dagidiay di mangpadayaw iti urnos ti panagasawa. Kontra iti linteg ti Dios, nangala dagiti lallaki ti Juda kadagiti gaggannaet nga assawa. (Deuteronomio 7:3, 4) Nagtraidoranda dagiti assawa ti kinaagtutuboda babaen ti panangisinada kadakuada. Ni Jehova “guraen[na] ti panangisina,” impakdaar ni Malakias.​—2:10-17.

Panangukom ken Pananggugor

Dinto palubosan ni Jehova nga agnanayon ti kinadakes. “Ti pudno nga Apo” umayto iti templona, a kuyogen ti “mensahero ti tulag.” Gugorannanto ken dalusannanto dagiti annak ni Levi. Agbalinto a napegges a saksi ni Jehova a maibusor kadagiti mangkukulam, mannakikamalala, dagidiay agsapata a siulbod, manangkusit, ken manangirurumen.​—3:1-5.

Dagidiay mangiyimut ti datdatonda ken Jehova papanglawenda ti bagbagida. Saan nga agbalbaliw ni Jehova. No ti simmiasi nga ili agsubli kenkuana, isunto ti siaasi nga agsubli kadakuada. Taktakawanda ti Dios babaen ti panangilemmengda kadagiti apagkapullo ken dagiti kontribusion. Ngem no iyegda dagiti apagkapullo, inkari ni Jehova ti maysa a bendision “agingga nga awanto ti lugar a makalaon.” Lak-amendanto ti awan mintisna a bunga.​—3:6-12.

Dagiti mata ni Jehova adda iti ilina. Busoren ti Dios dagidiay agsao a sidadagsen maibusor kenkuana. Maisupadi iti dayta, imdengan ni Jehova dagidiay agbuteng kenkuana. “Maysa a libro a pakalaglagipan” ti maisurat agpaay “kadagidiay a nagpanunot iti naganna.” Makitanto ti ilina ti panaggiddiat ti nalinteg ken ti managdakdakes.​—3:13-18.

Umayen ti Aldaw ni Jehova!

Ti aldaw ni Jehova kaipapanannanto ti naan-anay a pannakadadael ti managdakdakes. Ti aldaw ni Jehova umayen, ket ti managdakdakes maibusto kas naggapasan iti manguram nga urno. Maalun-ondanto, a dinto mangibati ‘uray ramut uray sanga.’ Ket dagidiay agbuteng iti nagan ni Jehova, tagiragsakendanto ti makaagas a gunggona “ti init ti kinalinteg.” Sakbay ti iyaay daytoy nakakigkigtot nga aldaw, ibaonto ni Jehova ni Elias a mammadto a mangaramid ti trabaho a panangisubli.​—4:1-6.

Leksion maipaay itatta: No maipapan iti panagdaydayaw, sapulen ni Jehova a ti ilina idatonda kenkuana ti kasasayaatanda. (Idiligyo ti Mateo 22:37, 38.) Dagiti mannursuro ti Sao ti Dios addaandat’ responsabilidad a mangisuro a siuumiso ken mangiturong kadagiti dadduma iti pudno a panagdaydayaw. Nasayaat a laglagipentayo a dagiti mata ti Dios ti kinahustisia adda kadagidiay di mangipakpakita ti umiso a panangrespeto iti panagasawa ken dagidiay agar-aramid iti kinadakes. Sapay koma ta agpasakoptayo a sipapakumbaba iti pananggugor ken panangdalus ti pudno nga Apo bayat a sigagagar nga ur-urayentayo “ti iyaay ti dakkel ken nakakigkigtot nga aldaw ni Jehova”!

[Kahon iti panid 30]

DAGITI TEKSTO TI BIBLIA A NAUSIG

○ 1:10​—Dagiti naagum, mabisin-kuarta a papadi agserserbida a maipaay iti personal a gunggona. Agdawatda ti bayad a maipaay iti kalalakaan a serbisio idiay templo, kas ti panangirikep kadagiti ruangan wenno panangsindi kadagiti apuy idiay altar. Isu met laeng a ni Jehova ‘di maay-ayo kadagiti datdaton manipud im-imada’!

○ 1:13​—Dagiti awanan pammati a papadi minatmatanda dagiti datdaton kas makabannog a seremonia, babantot. Libbianda, wenno laisenda, dagiti sagrado a bambanag ni Jehova. Ditay koma met pulos palubosan “dagiti agtutubo a baka ti bibbibigtayo” a maidaton kas pormalidad laeng!​—Oseas 14:2; Hebreo 13:15.

○ 2:13​—Adu kadagiti Judio nga assawa a lallaki ti mangisinsina kadagiti assawada iti kinaagtutubo, nalabit tapno mangasawa kadagiti ub-ubing a pagano a babbai. Ti altar ni Jehova nagbalinen a naabbongan kadagiti lulua​—kaawatan manipud kadagidiay nailaksid nga assawa a babbai nga immay idiay santuario tapno ibukbokda ti sakit ti nakemda iti saklang ti Dios.​—Malakias 2:11, 14, 16.

○ 3:1​—“Ti pudno nga Apo” isu ni Jehova a Dios, ket “ti mensahero ti tulag” isu ni Jesu-Kristo. Ti umuna a kaitungpalan ti padto napasamak idi dinalusan ni Jesus ti templo. (Marcos 11:15-17) Daytoy ket idi tallo ket kagudua a tawen kalpasan nga isut’ napulotan kas Natudigan nga Ari. Umas-asping iti dayta, tallo ket kagudua a tawen kalpasan ti pannakaitrono ni Jesus kas Ari idi otoño ti 1914, kinuyogna ni Jehova iti naespirituan a templo ket nasarakanna ti ili ti Dios nga agkasapulan ti pananggugor ken panangdalus.

○ 3:2, 3​—Ti kadaanan a panaggugor ket mabayag bassit. Gapuna, masansan a ti mananggugor “agtugaw,” nga agur-uray agingga a ti narunawen a metal sumilapen kas maysa a nadalusanen a sarming ket makitana ti ladawanna iti dayta. Kasta met, intuloy a ginugoran ni Jehova ti ilina itatta, nga inikkatna dagiti narugit a sursuro ken ar-aramid. Daytoy ti nangtulong kadakuada a mangisarming nga ad-adda pay iti ladawanna.​—Efeso 5:1.

○ 4:2​—Daytoy ti pannakailadawan ti masanguanan a bendision a tagiragsakento dagidiay agbuteng iti nagan ti Dios. Addaandat’ namnama nga agkainaranto iti lawag ti pabor ti Dios inton dagiti pisikal, mental, ken emosional a saksakit a nangsaplit ti natauan a pamilia ket napaimbagton.​—Apocalipsis 21:3, 4.

○ 4:5​—Nagbiag ni mammadto nga Elias agarup 500 a tawtawen kasakbayan ti pannakaited daytoy a padto. Idi umuna a siglo K.P., ni Jesu-Kristo impabigbigna ni Juan a Mammautisar kas ti naipadto a katupag ni Elias. (Mateo 11:12-14; Marcos 9:11-13) Nupay kasta, ni “Elias” isunto ti pakpakauna ti “aldaw ni Jehova,” a mangiparparangarang ti kanayonan pay a kaitungpalanna iti daytoy panawen ti “kaadda” ni Kristo.​—2 Tesalonica 2:1, 2.

[Ladawan iti panid 31]

Bayat ti naindagaan a minsteriona, dinalusan ni Jesus ti templo. Idi 1918 kinuyogna ni Jehova iti naespirituan a templo tapno dalusanna ti ili ti Dios