Agibangbangonka Kadi iti Rabaw ti Darat Wenno iti Rabaw ti Bato?
MARAGRAGSAKANKA kadi nga agbasa iti Biblia? Nalabit regular a makipagad-adalka pay ketdin iti Biblia iti maysa kadagiti Saksi ni Jehova. No kasta, awan duadua a nariknam a nakatulong kenka ti pannakaammo a nagun-odmo tapno ad-adda a matarusam no apay a napno ita ti lubong kadagiti parikut. (Apocalipsis 12:9, 12) Kanayonanna, adu a teksto ti Biblia ti nakaliwliwa kenka kadagiti tiempo ti rigat ken nangipaay iti namnama iti masanguanan.—Salmo 145:14; 147:3: 2 Pedro 3:13.
Kadagidiay agtartarigagay nga agbalin a pasurot ni Kristo, napateg nga addang ti pananggun-od iti umiso a pannakaammo iti Biblia. Ngem dayta laeng kadi ti kasapulan? Saan. Tapno makapagtalinaed a pudno a Kristiano—nangnangruna no masubok ti pammatina—adda sabali pay a napateg nga addang a masapul nga aramiden ti maysa nga agad-adal iti Biblia. Ania dayta? Tapno masungbatan, usigentayo biit ti Sermon iti Bantay nga impalawag ni Jesus idiay Galilea.—Mateo 5:1, 2.
Nasubok ti Dua a Balay
Pamiliarka kadi iti linaon ti Sermon iti Bantay? Masarakam daytoy a nalatak a palawag iti Ebanghelio ni Mateo ken ni Lucas. (Mateo 5:1–7:29; Lucas 6:20-49) Mabasam ti intero a sermon iti uneg laeng ti 20 a minuto. Kaskasdi a naglaon iti nasurok a 20 a panagadaw iti Hebreo a Kasuratan ken nasurok a 50 a piguratibo a sasao. Maysa kadagita a piguratibo a sasao—maipapan iti panangibangon iti dua a balay—ket naisangsangayan gapu ta inusar dayta ni Jesus kas konklusion ti palawagna. No maawatam ti kinapateg dayta a pangserra a pangngarig, matulongannaka nga agtalinaed a natibker kas pasurot ni Kristo aniaman a suot iti pammati ti pakaipasanguam.
Kinuna ni Jesus: “Tunggal maysa a dumngeg kadagitoy a sasaok ket aramidenna ida mayaspingto iti masirib a lalaki, a binangonna ti balayna iti rabaw ti dakkel a bato. Ket nagbuyat ti tudo ken immay dagiti layus ket nagpuyupoy dagiti angin ken immablatda iti dayta a balay, ngem saan a narba, ta naibangon iti rabaw ti dakkel a bato. Kanayonanna pay, tunggal maysa a dumngeg kadagitoy a sasaok ket saanna nga aramiden ida mayaspingto iti maag a lalaki, a binangonna ti balayna iti rabaw ti darat. Ket nagbuyat ti tudo ken immay dagiti layus ket nagpuyupoy dagiti angin ken immablat iti dayta a balay ket narba, ket nakaro idi ti pannakarpuogna.”—Mateo 7:24-27.
Ti Tao “a Nagkali ket Pinaunegna”
Ania a nagpateg a kinapudno ti insuro ni Jesus kadagiti adalanna babaen ti pangngarig maipapan iti dua a nagibangon? Tapno masungbatan, usigem a naimbag dagiti sasao ni Jesus. Ania ti madlawmo maipapan kadagiti dua a balay? Nagpasarda iti agpada a kalamidad. Agparang nga awan nagdumaan dagitoy dua a balay. Nalabit naibangonda iti isu met laeng a lugar—mabalin nga agkaabayda pay ketdi. Kaskasdi, maysa ti naibangon iti rabaw ti darat, ket ti sabali iti rabaw ti bato. Kasano a kasta? Nadakamat ngamin iti Ebanghelio ni Lucas a ti masirib a tao “nagkali ket pinaunegna” tapno madanonna ti bato a pangisaadanna. (Lucas 6:48) Kas resultana, nagtalinaed a nakatakder ti balayna.
Ania ti ipagpaganetget ni Jesus? Dinakamat ni Jesus dayta a pangngarig tapno ipaganetgetna ti inaramid dagiti nagibangon, saan ket a ti langa wenno lugar dagiti balay wenno ti kapigsa ti kalamidad. Ti maysa nagkali iti nauneg, ngem saan a kasta ti inaramid daydiay maysa. Kasanom a matulad ti masirib a tao a nagkali iti nauneg? Ginupgop a mismo ni Jesus ti kababagas ti pangngarigna idi kinunana: “Apay, ngarud, nga awagandak iti ‘Apo! Apo!’ ngem saanyo nga aramiden ti bambanag nga ibagak? Tunggal maysa nga umay kaniak ket dumngeg iti sasaok ken aramidenna ida, ipakitak kadakayo no asino ti kaaspingna: Umasping iti tao . . . a nagkali ket pinaunegna ket nangisaad iti pamuon iti rabaw ti dakkel a bato.”—Lucas 6:46-48.
Kinapudnona, ti basta panagdengngeg wenno panagbasa iti pannursuro ti Biblia ket arigna panangisaad iti balay iti rabaw ti darat—saanen a kasapulan ti panagkali. Iti sabali a bangir, maysa a karit ti panangyaplikar kadagiti pannursuro ni Kristo. Kalikagumanna ti panagkali iti nauneg tapno madanon ti pamuon a bato.
Gapuna, ti panagtalinaedmo a natibker kas pasurot ni Kristo ket agpannuray iti panangyaplikarmo iti nangngegmo. No iyaplikarmo iti inaldaw a panagbiagmo ti nasursurom iti Biblia, mayaspingka iti masirib a tao a nagkali iti nauneg. Gapuna, tunggal maysa nga agad-adal iti Biblia iyimtuodna iti bagina: ‘Maysaak laeng kadi a managdengngeg wenno maysaak a managtungpal? Basta basbasaek ken ad-adalek laeng kadi ti Biblia wenno ikabkabilangak ti bilinna no agaramidak kadagiti desision?’
Makagunggona ti Panagkali iti Nauneg
Usigem ti kapadasan ni José. Sinanay dagiti dadakkelna a mangipateg kadagiti moral a pagalagadan ti Biblia, ngem dina pay pulos inadal a mismo ti Sao ti Dios. “Idi awanakon iti poder dagiti dadakkelko,” kuna ni José, “inkagumaak ti agbalin a nasingpet, ngem nakikaduaak kadagiti di umiso a gagayyem. Nagusarak iti droga, nakiramanak iti seksual nga imoralidad, ken kanayonak a makiapa.”
Idi agangay, inkeddeng ni José a baliwan ti wagas ti panagbiagna ket siaanep a nagadal iti Biblia. “Ti maysa a nangtignay kaniak tapno agbalbaliw,” kuna ni José, “isu ti panangbasa ken panangtarusko iti Sermon ni Jesus iti Bantay. Ngem saan a kaskarina a nakapagbalbaliwak. Idi damo, maamakak iti mabalin nga ibaga dagiti ‘gagayyemko,’ ngem napagballigiak met laeng dayta. Insardengkon ti agulbod ken ti naalas a panagsasaok ket rinugiakon ti tumabuno kadagiti gimong dagiti Saksi ni Jehova. Nasursurok a ti simple a panagbiag ken panangyaplikar kadagiti singasing ti Biblia ket talaga a mangiturong iti manayon a kinaragsak, kas inkari ni Jesus.”—Mateo 5:3-12.
Ania ti magunggonam no agkalika iti nauneg tapno agibangon iti rabaw ti bato—kayatna a sawen, no ikagumaam nga iyaplikar ti nabasam iti Sao ti Dios? Kuna ni Jesus: “Idi naadda ti layus, ti karayan dinalapusna dayta a balay, ngem saan nga umdas ti pigsana a manggunggon iti dayta, gapu iti pannakaibangonna a naimbag.” (Lucas 6:48) Pudno, no agibangonka a naimbag babaen ti panangyaplikarmo iti naadalmo, ti arig balay a pammatim saanna laeng a maibturan ti kasla bagyo a suot no di ket saanto pay a magunggon. Anian a makapabileg dayta!
Ni adalan a Santiago, a kabsat ni Jesus iti ina, dinakamatna ti sabali pay a magunggona dagiti agad-adal iti Biblia a saan laeng a managdengngeg no di ket pudno a managtungpal iti naisurat a Sao ti Dios. Insurat ni Santiago: “Agbalinkayo a managtungpal iti sao, ket saan a managdengngeg laeng . . . Ti mangsukimat iti perpekto a linteg a kukua ti wayawaya ken agtultuloy iti dayta, daytoy a tao, agsipud ta isu nagbalin, saan a maysa a manglipat a managdengngeg, no di ket maysa a managaramid iti trabaho, naragsakto iti panangaramidna iti dayta.”—Santiago 1:22-25.
Wen, naragsak dagiti mangannurot iti balakad ti Biblia. Ti kasta a kinaragsak ti mangted iti bileg kadagiti pasurot ni Kristo tapno maanduranda ti arig bagyo a pakarigatan a mangsubok iti pammatida ken iti pudpudno a debosionda iti Dios.
Ania ti Aramidem?
Idi impalawag ni Jesus ti Sermonna iti Bantay, impaganetgetna a maysa a personal a desision ti panagserbi ken Jehova a Dios. Kas pagarigan, insuro ni Jesus nga agpannuray iti maysa no pilienna ti maaddaan iti simple a mata wenno nadangkes a mata, agpaadipen iti Dios wenno iti kinabaknang, magna iti nalawa wenno iti nailet a dalan. (Mateo 6:22-24; 7:13, 14) Ket iti pangserra a pangngarigna maipapan iti dua a nagibangon, nangted ni Jesus iti sabali pay a panagpili: Agtignay a kas iti masirib wenno kas iti maag a tao.
Masiribka no itultuloymo nga iyaplikar a naimpusuan ti maad-adalmo iti Biblia. Wen, ti panagkali iti nauneg tapno makaibangon iti rabaw ti bato mangyeg kenka kadagiti bendision ita ken iti masanguanan.—Proverbio 10:25.
[Dagiti Ladawan iti panid 30]
Ti panagtalinaedtayo a natibker ket agpannuray iti panangyaplikartayo iti maad-adaltayo