• Pannakaisalakan ken Panagrag-o iti Sidong ti Turay ti Mesias
    Ti Padto ni Isaias—Lawag nga Agpaay iti Sangatauan I

    • 4, 5. Ania ti impadto ni Isaias maipapan iti iyaay ti Mesias, ket kasano nga inyaplikar ni Mateo ti sasao ni Isaias?

      4 Sinigsiglo kasakbayan ti tiempo ni Isaias, dinakamat ti dadduma pay a Hebreo a mannurat iti Biblia ti iyaay ti Mesias, ti pudno a Pangulo nga ibaonto ni Jehova iti Israel. (Genesis 49:10; Deuteronomio 18:18; Salmo 118:22, 26) Ita, babaen ken Isaias, mangnayon ni Jehova kadagiti detalye. Isurat ni Isaias: “Addanto rummuar a saringit manipud iti pungdol ni Jesse; ket manipud kadagiti ramutna nabunganto ti maysa a tarubong.” (Isaias 11:1; idiligyo ti Salmo 132:11.) Agpada a ti “saringit” ken “tarubong” ipasimudaagda a ti Mesias ket kaputotanto ni Jesse babaen ken anakna a David, a napulotan iti lana a kas ari ti Israel. (1 Samuel 16:13; Jeremias 23:5; Apocalipsis 22:16) Inton dumteng ti pudno a Mesias, daytoy a “tarubong,” manipud iti balay ni David, mangpataudto iti nasayaat a bunga.

      5 Ni Jesus ti naikari a Mesias. Ni Mateo a mannurat ti ebanghelio tinukoyna ti sasao ti Isaias 11:1 idi kinunana a ti pannakaawag ni Jesus iti “Nazareno” ket tinungpalna ti sasao dagiti mammadto. Yantangay dimmakkel idiay ili ti Nazaret, naawagan ni Jesus iti Nazareno, nagan nga agparang a nainaig iti Hebreo a sao a nausar iti Isaias 11:1 para iti “tarubong.”b​—Mateo 2:23, footnote ti New World Translation of the Holy Scriptures​—With References; Lucas 2:39, 40.