Ti Panangmatmat ti Biblia

Rumbeng Kadi a Bayadam Dagiti Narelihiosuan a Serbisio?

ITI adu a lugar, dagiti lider dagiti makunkuna a Kristiano ken saan a Kristiano a relihion agpabayadda para kadagiti narelihiosuan a serbisio kas iti buniag, kasar, wenno pumpon. Mabalin a ginasut wenno rinibu a pisos ti singirenda.

Dadduma a klero ket susuelduan ti gobierno para iti panangannongda kadagiti seremonia, panangasikasoda iti parokia, ken panangilualoda iti inaldaw a panaglukat ti sesion dagiti mammanday linteg. Dagita a serbisio ket mabalin nga apresiaren dagiti tattao, ken kasapulan nga adda pondo ti simbaan para kadagiti paggastuanda. Ngem maitunos ngata iti Biblia dagita a gagangayen a kostumbre a panagpabayad para kadagiti narelihiosuan a serbisio wenno ti panangobligar pay ketdi kadagiti tattao nga agbayad?

“Balay ti Tagilako”?

Idi adda ni Jesu-Kristo ditoy daga, dagiti lider ti relihion dagiti Judio ken dadduma pay ginundawayanda ti aglako kabayatan dagiti narelihiosuan nga okasion nangruna bayat ti Paskua. Inanamongan kadi dayta ni Jesus? Saan! Kinapudnona, kuna ti Biblia nga “imbukbokna dagiti sinsilio dagiti agsuksukat iti kuarta ket imbalintuagna dagiti lamisaanda.” Kinuna ni Jesus: “Isardengyo a pagbalbalinen ti balay ni Amak a balay ti tagilako!”—Juan 2:14-16.

Idi maikawalo a siglo K.K.P., kasta met la ti napasamak idi panawen ni propeta Mikias. Sigun iti Biblia, dagiti narelihiosuan a lider ti Israel ‘marimonda iti kinahustisia.’ Dagiti met papadi “mangisuroda maipaay laeng iti maysa a gatad.” Ngem maigiddato iti dayta, ibagbagada a supsuportaran ida ti Dios, a kunkunada: “Saan kadi nga adda ni Jehova iti tengngatayo?” (Mikias 3:9, 11) Ngem saan nga an-anamongan ni Jehova a Dios ti ar-aramidenda. Karimonna ketdi dayta ken namin-adu nga imbatadna dayta babaen iti propetana a ni Mikias.

Makitkita met ita ti kasta a kinaagum iti adu a lider ti relihion, a pagbalbalinenda dagiti simbaan wenno kapiliada kas ‘balbalay ti tagilako.’ Kinapudnona, agnegnegosio ti dandani amin a narelihiosuan nga organisasion. Masansan a dakkel a panguartaanda ti panaglako kadagiti imahen ken dadduma pay a kita ti narelihiosuan a ramramit.a—1 Juan 5:21.

“Inawatyo nga Awan Bayadna, Itedyo nga Awan Bayadna”

Idi binilin ni Jesus dagiti apostolna nga ikasabada ti naimbag a damag, paimbagenda dagiti masakit, ken pagungarenda pay dagiti natay, kinunana: “Inawatyo nga awan bayadna, itedyo nga awan bayadna.” (Mateo 10:7, 8) Wen, dagiti pudno a pasurotna ket saanda a rumbeng nga agpabayad para kadagiti serbisioda. Kanayonanna, inyulidan ni Jesus ti panagserbi iti sabsabali a di pulos nagpabayad.

Kas panangsurotna iti ulidan ni Jesus, inaramid ni Pablo ti ministeriona “nga awan bayadna.” (1 Corinto 9:18) Idi agkasapulan iti kuarta, nagtrabaho kas agar-aramid iti tolda. (Aramid 18:1-3) Gapuna, maikunana maipapan kenkuana ken kadagiti kaduana a misionero: “Saantayo a managilako iti sao ti Dios a kas iti adu a tattao.” (2 Corinto 2:17) Ngem ti ngay panangurnong iti pondo nga usaren ti kongregasion, nalabit tapno panggatang wenno pagabang iti lugar a paggigimongan?

“Ti Dios Ayatenna ti Naragsak a Manangited”

Dagiti pondo a kasapulan dagiti Saksi ni Jehova ket aggapu kadagiti boluntario a donasion. Iyap-aplikarda daytoy a prinsipio: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2 Corinto 9:7) Gapuna, dagiti Saksi dida pabayadan dagiti literatura wenno narelihiosuan a serbisio, kas iti panangbautisar, kasar, wenno pumpon. Dida met agkiddaw iti apagkapullo, wenno agipasa iti pagitinnagan iti abuloy bayat ti panaggigimongda. Siasinoman a mayat nga agdonar para iti sangalubongan a trabaho a panangasaba ket mabalinna nga itinnag dayta kadagiti kahon a naikabil kadagiti di unay nakadkadlaw a paset ti lugar a paggigimonganda.

Iti intero a lubong, aggapu kadagiti boluntario a kontribusion ti pondo nga us-usaren dagiti Saksi ni Jehova para kadagiti Kingdom Hall, Assembly Hall, sanga nga opisina, ken pagimprentaan, agraman dagiti pangsaranayda kadagiti nadidigra. Bassit laeng ti maited ti dadduma kas iti nakurapay a balo a kinomendaran ni Jesus. (Lucas 21:2) Ngem dakkel met ti maited ti sabsabali. Aniaman ti kasasaad, dagiti mangan-annurot kadagiti prinsipio ti Biblia ken mangmangted sigun kadagiti kabaelanda ket makarikna iti kinakontento ken pudno a kinaragsak. Masagrapda pay ti adu a bendision ti Dios.—Aramid 20:35; 2 Corinto 8:12.

[Footnote]

NAPANUNOTMO KADIN?

● Ania ti kinuna ni Jesus kadagidiay agnegnegosio iti templo?—Juan 2:14-16.

● Nagpabayad kadi ti Kristiano nga apostol a ni Pablo para kadagiti narelihiosuan a serbisio?—2 Corinto 2:17.

● Ania a kita ti panangted ti pagragsakan ni Jehova?—2 Corinto 9:7.

[Blurb iti panid 23]

“Isardengyo a pagbalbalinen ti balay ni Amak a balay ti tagilako!”—Juan 2:14-16