Dagiti Saludsod Manipud Kadagiti Managbasa
Rebbeng kadi nga ipatotayo manipud Mateo 11:11 a naipasakbayen nga ammo ni Jesus a matay ni Juan a Mammautisar nga umun-una ngem ni Jesus?
Wen, nalawag nga ammo ni Jesus a saan nga agpaut ni Juan tapno agbalin a maysa a napulotan a Kristiano, ta kuna ni Jesus: “Pudno kunak kadakayo a tattao, awan kadagidiay a naiyanak kadagiti babbai ti dakdakkel ngem ni Juan a Bautista; ngem ti kababassitan unay idiay pagarian ti langit dakdakkel ngem isu.”—Mateo 11:11.
Idi inyanunsio ni anghel Gabriel ti umasideg a pannakaiyanak ni Juan, impakpakaunana a ni Juan ket, “buyogen ti espiritu ken pannakabalin ni Elias, . . . nga isaganana ti maysa nga ili nga awan pagkuranganna a maipaay ken Jehova.” Ni Juan ket agbalin a pakpakauna, nga isaganana ti maysa nga ili maipaay iti Mesias ni Jehova. Ngem awan aniaman iti dayta nga anunsio ti mangipamatmat a ni Juan a mismo ket agbalin nga adalan ti umay a Mesias, wenno awan met aniaman a panangisingasing iti dayta a banag iti naimpadtuan a sao nga inaramid ti ama ni Juan, ni Zacarias.—Lucas 1:17, 67-79.
Ngarud, kalpasan panangbautisarna ken Jesus, nagtultuloy ni Juan a nangasaba ken namautisar, a nagtalinaed iti pannakadutokna a mangisagana iti maysa nga ili. Simimilagro nga ammo ni Juan a mangipaayto ni Jesus ti bautismo iti nasantuan nga espiritu, ngem saan a kinuna ni Juan nga isu a mismo ket umawat iti nasantuan nga espiritu, nga agbalin a napulotan a Kristiano. (Mateo 3:11) Binigbig met ni Juan nga isu ket kumapoy, idinto a ni Jesus ket rumang-ay.—Juan 3:22-30.
Idi sinao ni Jesus ti mabasatayo idiay Mateo 11:11, ni Juan ket naibaluden. Impakpakauna nga impakaammo ni Jesus a daytoy a naibalud a mammadto ket basbassit ngem iti kababassitan kadagidiay agserbinto kas ari-padi kadagiti langlangit iti masanguanan. Kaskasdi, kasla ammo met ni Jesus a mabiiten a matay ni Juan, nga isut’ mapukaw ditoy lubong sakbay a ti “baro” a dalan agturong iti nailangitan a biag ket malukatan. (Hebreo 10:19, 20) Kinaipapanan dayta a ni Juan dina madanon ti Pentecostes 33 K.P., idi a nangrugi ti pannakapulot iti espiritu dagiti adalan ni Jesus. Ngarud, ti kumento ni Jesus idiay Mateo 11:11 mabalin met a maawatan kas maysa a panangipabigbig nga ammona a ni Juan ket saan a mapan idiay langit.