Ti Biag ken Ministerio ni Jesus

Panangtungpal ti Padto ni Isaias

KALPASAN ti pannakaammo ni Jesus nga isiksikat dagiti Pariseo ken dagiti paspsaurot ti partido ni Herodes a mangpapatay kenkuana, isu ken dagiti adalanna nagpaknida idiay Baybay ti Galilea. Ditoy ti dakkel a bunggoy manipud intero a Palestina, ken uray pay iti ruar dagiti pagbeddenganna, ti immarak kenkuana. Adu dagiti inagasanna, a gapu itoy amin dagidiay addaan ti nakaro a saksakit naggarasugasda a mangsagid kenkuana.

Gapu ta ti umariwekwek nagaduda, kinuna ni Jesus kadagiti ad-adalanna a maaddaanda koma ti maysa a barangay a mausarna. Babaen ti iyaadayuna manipud iti baybay, mabalinna ti a malappedan ti umariwekwek a gumarasugas kenkuana. Masursuruanna ida manipud iti barangay wenno agdaliasat iti sabali a lugar iti igid ti baybay tapno matulonganna dagiti tattao sadiay.

Kuna ni aladan a Mateo a ti ar-aramid ni Jesus ti kaitungpalan “ti nasao babaen ken mammadto nga Isaias.” Kalpasanna inadaw ni Mateo ti padto a tinungpal ni Jesus, awan sabali:

“Adtoy! Ti adipenko a pinilik, ti dungdungoek, a pakaay-ayuan unay toy kararuak! Ikabilkonto kenkuana ti espirituk, ket kadagiti nasnasion ipakaammonanto ti kinatimbeng. Saanto a makisusik ken dinto met agikkis, ket awanto met ti makangngeg ti timekna kadagiti plasa. Ti runo a naparpar dinanto tukkolen ket ti mitsa nga umas-asuk didanto iddepen, aginggat’ mapagpabbligina ti kinalinteg. Ket iti naganna panginanamaanto dagiti nasnasion.”

Ni Jesus, siempre, ti dungdungoen nga adipen ti Dios nga inanamonganna. Ket pinagbalin a nalawag ni Jesus no ania ti pudno a kinahustisia, nga isu dayta ti pinalibeg dagiti ulbod a narelihiusuan a tradision. Gapu iti di nalinteg a panangiyaplikarda iti linteg ti Dios, dagiti Pariseo didanto pay umay a mangbadang ti tao a masakit iti Panaginana! Gapuna, iti panangilawlawagna ti kinahustisia ti Dios, pinalag-anan ni Jesus dagiti tattao iti panangpadagsen dagiti di nainkalintegan a tradision, nga isu daytoy ti nangpadpadasan dagiti papangulo ti relihion a mangpapatay kenkuana.

Ania ti kaipapanan ti ‘saan a makisusik ket dinto met agikkis ket awanto ti makangngeg ti timekna kadagiti plasa’? Bueno, idi ag-agasanna dagiti tattao, ni Jesus ti ‘siinget a nangbilin kadakuada a dida koma iparparangarang ti kaaddana.’ Dina kayat ti nakaar-ariwawa a panangipablaak iti bagina kadagiti lansangan wenno maaddaan kadagiti aglablabes a damag a maiyallatiw babaen iti ngiwat ken matirtiritir dayta.

Kasta met, impan ni Jesus ti makaliwliwa a mensahe kadagiti tattao a nailadawan kas naparpar a runo, natukkol ken naipayatpayat. Naiyarigda kas mitsa nga umas-asuk, a ti maudi a rissik ti biag ti ngangngani naiddepen. Saan nga ibaddek ni Jesus ti natukkolen a runo wenno iddepen iti ngangngani matay, umas-asuken a mitsa. Ngem babaen iti kinadungngo ken ayat silalaingto nga itandudona ti naemma. Pudno unay, ni Jesus ti maysa a panginanamaan dagiti nasnasion! Mateo 12:15-21; Marcos 3:7-12; Isaias 42:1-4.

◆ Kasanot’ panamagbalin ni Jesus a nalawag ti kinahustisia, ken saan a nakisusik wenno nangipangato ti timekna kadagiti plasa?

◆ Asino ti naiyarig kas natukkol a runo ken umas-asuk a mitsa, ket kasanot’ panangtrato ni Jesus kadakuada?