Ti Biag ken Ministerio ni Jesus

Ni Jesus​—a Sentro ti Panagsusuppiat

DI NAGBAYAG kalpasan ti pannakasangailina idiay balay ni Simon, rinugian ni Jesus ti maikadua a panagbaniagana a nangaskasaba idiay Galilea. Iti napalabas a panagbaniagana iti teritoria isut’ kinuyog dagiti immuna nga adalanna, da Pedro, Andres, Santiago, ken ni Juan. Ngem itan ti 12 nga apostolesna ti kimmuyog kenkuana, agraman sumagmamano a babbai. Dagitoy inramanna ni Maria Magdalena, Susanna, ken ni Joanna, a ni lakayna ket maysa nga opisial ni Ari Herodes.

Bayat a pumarpartak ti ministerio ni Jesus, kasta met ti suppiat maipapan iti aramidna. Maysa a lalaki a naluganan ti sairo, a maysa met a bulsek ken umel, ti naiyeg ken ni Jesus. idi isut’ inagasan ni Jesus, tapno mawayawayaan manipud iti panangituray ti sairo, ken isu metten ti makapagsao ken makakita, maragsakan unay dagiti tattao. Rinugianda a kinuna: “Mabalin ngata nga isu daytoy ti Anak ni David?”

Ket naguurnong dagiti adu unay a tattao iti aglawlaw ti balay a paggigianan ni Jesus nga isu ti di pay makapanganen agraman dagiti adalanna. Malaksid kadagidiay mamati a nalabit isu ti maikari nga “Anak ni David,” addada pay dagiti eskribas ken Pariseo a naggapu manipud Jerusalem tapno isu ti padaksenda. Idi nangngeg dagiti kabagyan ni Jesus ti riribuk maipapan ken ni Jesus, immayda tapno isu ti tiliwenda. Agpaay iti ania a rason?

Bueno, dagiti mismo a kakabsat ni Jesus dida pay mamati idi nga isu ti Anak ti Dios. Kasta met, ti pannakagulo ti publiko a pinartuatna ti interamente a di kababalin ni Jesus nga am-ammoda bayat nga isu ti dumakdakkel pay laeng idiay Nasaret. Gapuna impatoda nga adda ti pannakadadael ti isip ni Jesus. “Napukawna ti nakemna,” impatoda, ket napanda idi a tiliwen ken iyadayu koma.

Kaskasdi nalawag ti ebidensia a pinaimbag ni Jesus ti tao a nagunggan ti sairo. Ammo dagiti eskribas ken Pariseo a dida mailibak ti kinapudno daytoy, agraman dagiti dadduma a datdatlag ni Jesus. Gapuna tapno padaksenda ni Jesus kunada kadagiti tattao: “Adda kenkuana ni Beelzebub, ket gapu iti prinsipe dagiti sairo, mamaruar kadagiti sairo.”

Agsipud ta pagaammona ti pampanunotda, inawagan ni Jesus dagiti eskribas ken Pariseo a mapan kenkuana ket kinunana: “Amin a pagarian a mabingaybingay a maibusor met laeng kenkuana marbek, ket isuamin nga ili wenno balay a malasinlasin iti maibusor met laeng kenkuana dinto mataginayon. Ket no ni Satanas, paruarenna ni Satanas, malasinlasin a maibusor met laeng kenkuana; kasano, ngarud, ti pannakataginayonto ti pagarianna?”

Anian a makadadael a lohika! Yantangay kinuna dagiti Pariseo a dagiti tattao manipud iti tengngada ti agparparuar kadagiti sairo, insaludsod pay met ni Jesus: “Ket no siak gapu ken Beelzebub paruarek dagiti sairo, asino ti akin-pannakabalin ti panamarruar dagiti annakyo kadagiti sairo?” Iti sabali a pannao, ti pammabasolda ken ni Jesus ti rebbeng met a maiyaplikar kadakuada a kas kenkuana. Kalpasanna namakdaar ni Jesus: “Ngem no gapu iti espiritu ti Dios paruarek dagiti sairo, pudno a dimtengen kadakayo ti pagarian ti Dios.”

Tapno maiyilustrar a ti panangparuarna kadagiti sairo ket pammanek ti pannakabalinna ken ni Satanas, kuna ni Jesus: “Kasano ti pannakabalin ti maysa a sumrek iti balay ti maingel ken mangrabsut kadagiti gargaretna no dina umuna a reppeten ti maingel? Ket kalpasanna ikisapnanto iti balayna. Ti saan a makikadua kaniak isu ti bumusor kaniak, ket ti saan a makipagurnong kaniak agiwara.” Nalawag a dagiti Pariseo bumusbusorda ken ni Jesus, nga impamatmatda ti bagbagida nga isuda dagiti ahente ni Satanas. Isuda ti agiwarwara kadagiti Israelitas nga umadayu kenkuana.

Gapuna, pinakdaaran ni Jesus dagitoy a sataniko a bumusbusor a “ti panagtabbaaw a maibusor iti espiritu saanto a mapakawan.” Inlawlawagna: “Ket uray siasino nga agsao iti maibusor iti Anak ti tao, mapakawanto kenkuana; ngem uray siasino nga agsaonto ti maibusor iti nasantuan nga espiritu saanto a mapakawan kenkuana, uray itoy a biag, uray iti biag a mapasungad.” Dagidiay nga eskribas ken Pariseo ti nakaaramid ti di mapakawan a basol babaen ti simamalisiuso a panangipabiangda ken ni Satanas iti nakabatbatad a namilagruan a panagtignay iti nasantuan nga espiritu ti Dios. Mateo 12:22-32; Marcos 3:19-30; Juan 7:5.

◆ Kasano ti pannakaiduma ti maikadua a panagbaniaga ni Jesus idiay Galilea manipud iti damo?

◆ Apay a dagiti kakabagyan ni Jesus ti nangpadpadas a mangtengngel kenkuana?

◆ Kasanot’ panangpadpadas dagiti Pariseo a mangpadakes iti milagro ni Jesus, ken kasanot’ panangsungbat ni Jesus kadakuada?

◆ Ania ti basol dagidiay Pariseo, ken apay?