Ni Jehova Mamakawan iti Nawadwad

“Ti managdakdakes bay-anna koma ti dalanna, ken ti tao a saan a nalinteg dagiti pampanunotna; ket agsubli koma ken ni Jehova, . . . ta isu mamakawan iti nawadwad.”​—ISAIAS 55: 7.

1. Iti ania a naparaburan dagiti umawat ti pammakawan ni Jehova?

PAKAWANEN ni Jehova dagiti managbabawi a nakabasol ken palubosanna ida a mangtagiragsak iti talna ti panunot iti naespirituan a paraiso. Ngamin masabetda dagitoy nga alagaden: “Sapulenyo ni Jehova, dakayo a tattao, ita ta masarakan pay. Umawagkayo kenkuana ita ta asideg pay. Ti managdakdakes bay-anna koma ti dalanna, ken ti tao a saan a nalinteg dagiti pampanunotna; ket agsubli koma ken ni Jehova, ket isu kaasiannanto, ken iti Diostayo, ta isu pakawanennanto iti nawadwad.”​—Isaias 55:6, 7.

2. (a) Aniat’ kaipapanan ti ‘panangsapul ken ni Jehova’ ken ‘panagsubli kenkuana,’ kas nadakamat idiay Isaias 55:6, 7? (b) Apay a masapul nga agsubli ken ni Jehova dagidi Judio a nakayawan idiay Babilonia, ken aniat’ napasamak kadagiti dadduma kadakuada?

² No ‘sapulenna ni Jehova’ ken umawag kenkuana buyogen ti pannakaanamong, masapul a panawan ti managdakdakes ti di umiso a dalanna ken aniaman a pampanunotenna a mangdangran kadagiti sabsabali. Ti pakasapulan nga “agsubli ken ni Jehova” ipasimudaagna a ti nakabasol binaybay-anna ti Dios, a nasinged idi kenkuana. Kastat’ kasasaad idi dagiti agnaed ti Juda, a ti kinagulibda iti Dios nagtungpal iti pannakakayawda idiay Babilonia. Nasken nga agsubli dagiti kautibo a Judio ken ni Jehova babaen ti panagbabawida kadagiti kinadakesda a nakaigapuan ti pannakakautiboda idiay Babilonia ken ti naipadto a 70-tawen a pannakalangalang ti dagada. Idi 537 K.K.P., nagsubli dagiti natda a managbuteng-Dios a Judio a naluk-atan manipud Babilonia iti dayta a daga babaen ti bilin ti turay. (Esdras 1:1-8; Daniel 9:1-4) Naindaklan unay dagiti epekto dayta a pannakaisubli ta naiyasping ti daga ti Juda iti Paraiso ti Eden.​—Ezequiel 36:33-36.

3. Kasano nga umasping ti kapadasan dagiti natda iti naespirituan nga Israel kadagidiay managbuteng-Dios a kautibo a nagsubli idiay Juda?

³ Umasping ti kapadasan dagiti naespirituan nga Israelitas kadagidiay managbuteng-Dios a Judio a nagsubli idiay Juda kalpasan ti pannakakayawda idiay Babilonia. (Galacia 6:16) Binalbaliwan dagiti natda iti naespirituan nga Israel ti dalan ken dagiti pampanunotda kalpasan unay ti Gubat Sangalubongan I. Minarkaan ti tawen 1919 ti panagpatingga ti pannakakayawda iti Babilonia a Dakkel, ti sangalubongan nga imperio ti ulbod a relihion, manipud naan-anay nga anamong ti Dios. Gapu ta pinagbabawianda dagiti basolda mainaig iti panagbuteng iti tao ken natay a kasasaadda iti serbisio ni Jehova, linuk-atanna ida manipud Babilonia a Dakkel, insublina ida iti umiso a naespirituan a kasasaadda, ken us-usarenna manen ida a mangikasaba ti mensahe ti Pagarian. Rimmang-ay nanipud idin ti naespirituan a paraiso iti ili ti Dios, iti pakaidayawan ti nasantuan a naganna. (Isaias 55:8-13) Ngarud, iti kadaanan a padron ken moderno a katupagna, addaantayot’ nalawag a pammaneknek a ti nadibinuan a pammakawan mangyeg kadagiti bendision ken pudno a ni Jehova mamakawan iti nawadwad kadagiti managbabawi.

4. Aniat’ amken dagiti dadduma nga adipen ni Jehova?

⁴ Isu a makapagtalek dagiti agdama-aldaw nga adipen ni Jehova iti pammakawanna. Kaskasdi, dadduma kadakuadat’ masnaayan gapu kadagiti napalabas a basolda, ken gistay ilumlom ida dagiti rikna a nakabasol. Saanda nga ibilang ti bagbagida a maikari nga agtaeng iti naespirituan a paraiso. Kinapudnona, amken dagiti dadduma a nakaaramidda iti saan a mapakawan a basol ken pulos a dinto ida pakawanen ni Jehova. Mabalin kadi a kasta?

Dadduma a Basol Saan a Mapakawan

5. Apay maikuna a saan a mapakawan dagiti dadduma a basol?

⁵ Adda dagiti basol a saan a mapakawan. Kinuna ni Jesu-Kristo: “Amin a kita ti basol ken tabbaaw mapakawanto kadagiti tao, ngem ti tabbaaw a maibusor iti nasantuan nga espiritu saanto a mapakawan.” (Mateo 12:31) Gapuna, ti tabbaaw maibusor iti nasantuan nga espiritu ti Dios, wenno aktibo a puersa, saanto a mapakawan. Tinukoy ni apostol Pablo ti kasta a basol idi insuratna: “Saan a mabalin a dagiti nalawagan iti naminsan, . . . ngem kalpasanna simminada, a pabaruen ida iti panagbabawi, gapu ta inlansada manen a maipaay kadakuada ti Anak ti Dios ket isu imbabainda iti sanguanan dagiti amin a tattao.”​—Hebreo 6:4-6.

6. Aniat’ mangikeddeng no ti basol ket mapakawan wenno saan?

⁶ Ti laeng Dios ti makaammo no nakaaramid ti maysa a tao iti saan a mapakawan a basol. Nupay kasta, inlawlawag ni Pablo daytoy a banag idi insuratna: “Ta no agbasoltayo a sipapakinakem kalpasan ti panangawattayo iti umiso a pannakaammo ti kinapudno, awanen ti mabalintayo nga idaton gapu kadagiti basbasol, no di ket ti maysa a nakabutbuteng a panagur-uray iti pannakaukom.” (Hebreo 10:26, 27) Ti sipapakinakem a tao gagaraenna ti agtignay, wenno “sisusulpeng ken masansan a gagaraenna ti agsukir.” (Webster’s New Collegiate Dictionary) Siasinoman a sipapakinakem ken sisusulpeng a mangitultuloy nga agaramid ti basol kalpasan a naammuanna ti kinapudno ket saan a mapakawan. Ngarud, saan a ti basol a mismo no di ket ti kasasaad ti puso, ti kagrabe ti panangigagara, ti mangikeddeng no ti basol ket mapakawan wenno saan. Iti sabali a bangir, ti ngay nakabasol a Kristiano a mariribukan unay gapu iti basolna? Nalabit ipamatmat ti nakaro a danagna a kinapudnona, saan a nakaaramid iti saan a mapakawan a basol.

Saan a Napakawan Dagiti Basolda

7. Apay maikunatayo a dadduma kadagiti relihiuso a kabusor ni Jesus ti nakaaramid iti saan a mapakawan a basol?

⁷ Dadduma kadagiti relihiuso a papangulo a Judio a bimmusor ken Jesus ti nakaaramid iti sipapakinakem, ket ngarud saan a mapakawan, a basol. Nupay nakitada ti panagtignay ti nasantuan nga espiritu babaen ken Jesus bayat a nagaramid iti kinaimbag ken kadagiti milagro, impagapu dagidiay a klero ti pannakabalinna ken ni Beelzebub, wenno ni Satanas a Diablo. Nagbasolda buyogen naan-anay a pannakaammo iti di mailibak a panagtignay ti espiritu ti Dios. Gapuna, nakaaramidda iti saan a mapakawan a basol, ta kinuna ni Jesus: “Uray siasino nga agsaonto ti maibusor iti nasantuan nga espiritu, saan a mapakawanto kenkuana, uray itoy a sistema dagiti banag uray iti daydiay mapasungad.”​—Mateo 12:22-32.

8. Apay saan a napakawan ti basol ni Judas Iscariote?

⁸ Saan met a napakawan ti basol ni Judas Iscariote. Ti panangliputna ken Jesus isu ti sipapakinakem, ginagara a nagtungpalan ti kurso ti kinamanaginsisingpet ken kinasuitik. Kas pangarigan, idi nakita ni Judas a sinapsapuan ni Maria ni Jesus iti nangina a lana, insaludsodna: “Apay-apay a saan a nalako daytoy a bangbanglo iti tallo gasut a denario ket naited koma kadagiti napanglaw?” Innayon ni apostol Juan: “Kinuna daytoy [ni Judas], saan a gapu ta isakitna dagiti napanglaw, no di ket gapu ta mannanakaw, ket agsipud ta isu ti agiggem ti supot, innalana dagiti naipisok.” Di nagbayag kalpasanna, liniputan ni Judas ni Jesus iti 30 a kapisi ti pirak. (Juan 12:1-6; Mateo 26:6-16) Pudno, nagbabawi ni Judas ket nagbekkel. (Mateo 27:1-5) Ngem saan a napakawan, yantangay ti ginagara, nagtultuloy nga inaagum a wagasna ken ti panangliputna ipakitana a ti basolna ket maibusor iti nasantuan nga espiritu. Maitutop la unay a ni Jesus inawaganna ni Judas a “ti anak ti pannakadadael”!​—Juan 17:12; Marcos 3:29; 14:21.

Napakawan dagiti Basolda

9. Apay pinakawan ti Dios dagiti basol ni David mainaig ken ni Bat-seba?

⁹ Dagiti ginagara a basol maigiddiatda unay kadagiti basol dagidiay pinakawan ti Dios. Alaentayo ni Ari David ti Israel kas ehemplo. Isut’ nakikamalala ken ni Bat-seba, ti asawa ni Uria, ket idi agangay, impamaniobrana ken ni Joab ti pannakapapatay ni Uria iti gubat. (2 Samuel 11:1-27) Apay a kinaasian ti Dios ni David? Kangrunaanna gapu iti tulag ti Pagarian ngem gapu met iti mismo a kinamanangaasi ni David ken ti pudpudno a panagbabawina.​—1 Samuel 24:4-7; 2 Samuel 7:12; 12:13.

10. Nupay nagbasol iti nadagsen ni Pedro, apay a pinakawan ti Dios?

¹⁰ Usigenyo met ni apostol Pedro. Isut’ nagbasol iti nadagsen gaput’ maulit-ulit a panangilibakna ken ni Jesus. Apay a pinakawan ti Dios ni Pedro? Saan a kas ken Judas Iscariote, napudno ni Pedro iti panagserbina iti Dios ken ni Kristo. Daytoy a basol ti apostol ket gapu iti nainlasagan a kinakapuy, ket isut’ pudpudno a nagbabawi ken “nagsangit a sipapait.”​—Mateo 26:69-75.

11. Kasanot’ panangdepinaryo iti “panagbabawi,” ken aniat’ masapul nga aramiden ti maysa a tao no pudpudno nga agbabbabawi?

¹¹ Ipakita dagita nga ehemplo nga uray ti tao a nadagsen ti basolna magun-odanna ti pammakawan ni Jehova a Dios. Ngem ania a kababalin ti kasapulan tapno mapakawan? Nasken ti pudpudno a panagbabawi tapno ti nakabasol a Kristiano pakawanen ti Dios. Ti panagbabawi kayatna a sawen, “panagbaw-ing manipud basol gaput’ panagladingit kadagiti napalabas a basol” wenno “agbabawi wenno agladingit gaput’ naaramid ti maysa wenno saanna a naaramid.” (Webster’s Third New International Dictionary) Ti pudno nga agbabbabawi a tao pagladingitanna ti aniaman nga umsi, leddaang, wenno parikut nga inyeg ti basolna iti nagan ni Jehova ken iti organisasionna. Ti managbabawi a nakabasol mangpataud met iti maitupag a bunga, nga agaramid kadagiti aramid a maitutop iti panagbabawi. (Mateo 3:8; Aramid 26:20) Kas pangarigan, no adda tinakawanna, isut’ mangaramid kadagiti maiparbeng nga addang tapno masukatan ti pukaw. (Lucas 19:8) Ti kasta a managbabawi a Kristiano adda nainkalintegan a Nainkasuratan a rasonna nga agtalek a ni Jehova mamakawan iti nawadwad. Ania dagitoy?

Dagiti Rason nga Agtalek iti Pammakawan ti Dios

12. Maigapu iti ania a ti Salmo 25:11 ipasimudaagna a ti managbabawi a tao makapagkararag ti pammakawan?

¹² Ti managbabawi a nakabasol sitatalek a makapagkararag iti pammakawan gapu iti nagan ni Jehova. Impakpakaasi ni David: “Gapu iti kaikarian ti naganmo, O Jehova, pakawanem ti basolko, ta dakkel.” (Salmo 25:11) Ti kasta a kararag, a napakuyogan ti panagbabawi gapu iti aniaman nga umsi nga inyeg ti nakabasol iti nagan ti Dios, ti manglapped met koma kenkuana nga agaramid iti nadagsen a basol iti masanguanan.

13. Aniat’ akem ti kararag iti nadibinuan a pammakawan?

¹³ Sungbatan ni Jehova a Dios dagiti naimpusuan a kararag dagiti nakabasol ngem managbabawi nga adipenna. Kas ehemplo, saan a nagintutuleng ni Jehova ken David, a nagkararag iti naimpusuan idi nabigbigna ti kadagsen ti basolna mainaig ken Bat-seba. Kinapudnona, dagiti sasao ni David idiay Salmo 51 iyebkasnat’ rikna dagiti adu a dumawdawat iti asi. Impakpakaasina: “Kaasiannak, O Dios, kas mayannurot iti kinamanagayatmo. Kas mayannurot iti karuay dagiti nasnekan a kaasim punasem dagiti salungasingko. Bugguannak a naan-anay iti amin a kinadakesko, ket ugasannak iti basolko. Dagiti sakripisio a maipaay iti Dios isu ti espiritu a nadudog; ti nadudog ken sibababawi a puso, O Dios, saanmonto a laisen.”​—Salmo 51:1, 2, 17.

14. Kasano nga ipanamnama dagiti Kasuratan a pakawanen ti Dios dagidiay mangalagad ti pammati iti daton a subbot ni Jesus?

¹⁴ Pakawanen ti Dios dagidiay mangalagad ti pammati iti daton a subbot ni Jesus. Insurat ni Pablo: “Kenkuana maaddaantayo ti pannakasubbot gapu iti darana, wen, ti pannakapakawan dagiti basbasoltayo.” (Efeso 1:7) Umasping unay, insurat ni apostol Juan: “Annakko a babassit, isuratko kadakayo dagitoy a bambanag tapno dikay koma agbasol. Ket no addanto pay la siasinoman a makabasol, addaantayo ti maysa a katulongan a kadua ti Ama, nga isu ni Jesu-Kristo, maysa a nalinteg. Ket isu ti mamagkappia a daton gapu kadagiti basbasoltayo, ngem, saan laeng a gapu kadagiti basbasoltayo no di pay ket iti isuamin a lubong.”​—1 Juan 2:1, 2.

15. Tapno agtultuloy a tagiragsakenna ti asi ti Dios, aniat’ masapul nga aramiden ti managbabawi a nakabasol?

¹⁵ Ti kinamanangaasi ni Jehova ipaayanna ti managbabawi a nakabasol iti pammasiguro nga isut’ mapakawan. Kinuna ni Nehemias: “Sika ti maysa a Dios a madadaan a mamakawan, naparabur ken manangaasi, natanang nga agpungtot ken nawadwad iti kinamanangaasi.” (Nehemias 9:17; idiligyo ti Exodo 34:6, 7.) Siempre, tapno agtultuloy a tagiragsaken ti nadibinuan nga asi, masapul a pagreggetan ti nakabasol a salimetmetan ti linteg ti Dios. Kas kinuna ti salmista, “dagiti nasnek a kaasim umayda kadi kaniak, tapno makapagbiagak; ta ti lintegmo isu ti linglingayko. Adu dagiti kinamanangaasim, O Jehova. Pagbiagennak kas mayalubog kadagiti pagbilinam.”​—Salmo 119:77, 156.

16. Ania a liwliwa ti adda iti kinapudno a maawatan ni Jehova ti managbasol a kasasaadtayo?

¹⁶ Ti kinapudno a maawatan ni Jehova ti managbasol a kasasaadtayo mangipaay met iti managbabawi a nakabasol iti liwliwa ken rason nga agkararag buyogen panagtalek nga isut’ pakawanen ti Dios. (Salmo 51:5; Roma 5:12) Nangipaay ni salmista a David iti makaliwliwa a pammasiguro idi kinunana: “Isu [ni Jehova a Dios] saanna nga impaay kadatayo ti kas mayannatup kadagiti basbasoltayo; dinatayo met sinupapakan iti katutopan dagiti kinadangkestayo. Ta kas kangato dagiti langlangit iti ngatuen toy daga, kasta ti kadakkel ti kinamanagayatna kadagiti agbuteng kenkuana. Kas panagaddayo ti daya ken ti laud, kasta ti nangyadayuanna kadagiti salsalungasingtayo kadatayo. Kas panangngaasi ti maysa nga ama kadagiti annakna, kasta ti panangngaasi ni Jehova kadagiti agbuteng kenkuana. Ta ammona ti pannakasukogtayo, isu malagipna a datayo tapuktayo.” (Salmo 103:10-14) Wen, ti nailangitan nga Amatayo ad-adda a manangaasi ken mannakipagrikna ngem ti natauan a naganak.

17. Aniat’ pakainaigan ti napalabas a rekord ti matalek a panagserbi ti maysa iti Dios iti pammakawan?

¹⁷ Ti managbabawi a nakabasol makapagkararag iti pammakawan buyogen panagtalek a saanto a lipaten ni Jehova ti napalabas a rekord ti matalek a panagserbina. Saan a nagpakpakaasi ni Nehemias iti pannakapakawan ti basolna, ngem kinunana: “Lagipennak, O Diosko, a maipaay iti naimbag.” (Nehemias 13:31) Ti managbabawi a Kristiano makasarak iti liwliwa kadagiti sasao a: “Ta saan a nakillo ti Dios tapno lipatenna ti aramidyo ken ti ayat nga impakitayo iti naganna.”​—Hebreo 6:10.

Tulong Manipud kadagiti Panglakayen

18. Aniat’ rumbeng a maaramid no ti maysa a Kristiano ket pinagsakit ti basolna iti naespirituan?

¹⁸ No ngay marikna ti maysa a Kristiano a saan a maikari nga agtalinaed iti naespirituan a paraiso wenno saan a makapagkararag agsipud ta isut’ pinagsakit ti basolna iti naespirituan? “Paayabanna koma dagiti panglakayen ti kongregasion ket ikararaganda koma, a sapsapuanda iti lana iti nagan ni Jehova,” insurat ni adalan a Santiago. “Ket ti kararag ti pammati isalakannanto ti masakit, ket ni Jehova paungarennanto. Ket no nakaaramid kadagiti basbasol, mapakawanto kenkuana.” Wen, dagiti panglakayen iti kongregasion mabalin a siiepektibo a makipagkararagda ken ikararaganda ti managbabawi a kapammatian a siinanamada a maisubli ti nasayaat a naespirituan a salun-atna.​—Santiago 5:14-16.

19. No nailaksid ti maysa a tao, aniat’ masapul nga aramidenna tapno mapakawan ken maisubli?

¹⁹ Uray no ilaksid ti hudisial a komite ti saan nga agbabawi a nakabasol, saanna kayat a sawen nga isut’ nakaaramid ti saan a mapakawan a basol. Tapno mapakawan ken maisubli, nupay kasta, masapul a sipapakumbaba nga agtulnog kadagiti linlinteg ti Dios, mangpataud kadagiti aramid a maitutop iti panagbabawi, ken dawatenna kadagiti panglakayen ti pannakaisublina. Kalpasan a nailaksid ti maysa a mannakiabig manipud iti kongregasion idiay kadaanan a Corinto, insurat ni Pablo: “Umanayen iti kasta a tao dayta a dusa nga impatay kenkuana dagiti ad-adu kadakayo, iti kasta, rebbengyo ketdi a pakawanen ken liwliwaen, di la ket ta dayta a tao malmes iti aglablabes a liday. Gapuna, dawatek kadakayo a paneknekanyo ti ayatyo kenkuana.”​—2 Corinto 2:6-8; 1 Corinto 5:1-13.

Ti Dios Mamapigsa

20, 21. Aniat’ makatulong iti maysa a tao a madandanagan a nalabit nakaaramid iti saan a mapakawan a basol?

²⁰ No dagiti bambanag kas ti nakapuy a salun-at wenno pakadagsenan ti mangpadpadanag a nakaaramid ti maysa iti saan a mapakawan a basol, mabalin a makatulong ti umdas nga inana ken turog. Ngem, nangnangruna a laglagipenyo koma dagiti sasao ni Pedro: “Itaklinyo amin a pakadanaganyo iti [Dios], agsipud ta isu aluadannakayo.” Ken saanyo pulos palubosan nga upayennakayo ni Satanas, ta innayon ni Pedro: “Agparbengkayo, agsalukagkayo. Ti kabusoryo, ti Diablo, magmagna iti sibayyo a kasla leon a ngumerngernger, nga agsapsapul ti alun-unenna. Ngem sarangtenyo ngarud, babaen ti nabileg a pammati, yantangay ammoyo a dagiti kastoy a sagsagabaen madamada a mapasamak kadagiti kakabsatyo nga adda ditoy lubong. Ngem, kalpasan ti panagsagabayo iti bassit nga aldaw, ti Dios ti amin a di kaikarian a kinamanangaasi . . . isu met laeng palaingennakayto, patibkerennakayto, papigsaennakayto.”​—1 Pedro 5:6-10.

²¹ Isu a no agbabbabawikayo ngem amkenyo a nakaaramidkayo iti saan a mapakawan a basol, laglagipenyo a dagiti daldalan ti Dios ket nainsiriban, nalinteg, ken naayat. Gapuna, agkararagkayo kenkuana buyogen ti pammati. Kanayon a mangankayo iti naespirituan a taraon nga ipapaayna babaen ti “matalek ken naannad nga adipen.” (Mateo 24:45-47) Makitimpuyogkayo kadagiti kapammatian ken regular a makiraman iti Nakristianuan a ministerio. Daytoy ti mamapigsa iti pammatiyo ken luk-atannakayo manipud iti aniaman a panagamak nga amangan ta saan a pinakawan ti Dios ti basolyo.

22. Anianto ti sumaruno nga usigentayo?

²² Dagiti agnaed iti naespirituan a paraiso makasarakda iti liwliwa iti pannakaammo a ni Jehova mamakawan iti nawadwad. Kaskasdi, saanda a mailisi kadagiti suot ita. Nalabit masnaayanda gapu iti ipapatay ti ingungotenda wenno masakit unay ti patpatgenda a gayyem. Kas makitatayto, kadagitoy ken dadduma pay a kasasaad, ni Jehova tulonganna ken idalanna ti ilina babaen ti nasantuan nga espirituna.

Ania dagiti Sungbatyo?

◻ Aniat’ adda a pammaneknek a ni Jehova ‘mamakawan iti nawadwad’?

◻ Ania a basol ti saan a mapakawan?

◻ Kadagiti ania a kasasaad a mapakawan dagiti basol ti maysa?

◻ Apay makapagtalek iti pammakawan ti Dios dagiti managbabawi a nakabasol?

◻ Ania a tulong ti magun-odan dagiti managbabawi a nakabasol?

[Ladawan iti panid 10]

Ammoyo kadi no apay a napakawan ni David ken ni Pedro ngem ni Judas Iscariote saan?

[Ladawan iti panid 12]

Dakkel ti maitulong dagiti panglakayen iti kongregasion iti maysa a Kristiano iti naespirituan