Ti Biag ken Ministerio ni Jesus
Ni Jesus Tinubngarna dagiti Pariseo
NO ITI pannakabalin ni Satanas nga isut’ mangparparuar kadagiti demonio, insungbat ni Jesus, no kasta ni Satanas ti nabingaybingay met la iti bagina. “Uray aramidenyo ti kayo a nasayaat ket ti bungana nasayaat,” intuloyna, “wenno aramidenyo ti kayo a dakes ket ti bungana dakes; ta gapu iti bungana mailasin ti kayo.”
Minamaag ti panangipabasol a ti nasayaat a bunga a panangparuar kadagiti demonio ket gaput’ panagserserbi ni Jesus ken Satanas. No ti bunga ket nasayaat, saan a mabalin a ti kayo ket dakes. Iti kasumbangirna, ti dakes a bunga dagiti Pariseo iti nakakatkatawa a pammabasolda ken awan nakaibatbatayanna nga ibubusor ken Jesus ket pammaneknek nga isuda a mismo ket dakesda. “Dakayo kaputotan dagiti karasaen,” kinuna ni Jesus, “kasano ti pannakabalinyo nga agsao kadagiti banag a naimbag, idinto a dakeskayo? Ta ti naruay iti puso isu ti sawen ti ngiwat.”
Gapu ta dagiti sasaotayo isarmingda ti kasasaad ti puspusotayo, aniaman a sawentayo ti mangted pakaibatayan ti pannakaukom. “Ket kunak kadakayo,” kuna ni Jesus, “nga amin a sao nga awan kapapayanna a sawento dagiti tattao, isu ti sungbatandanto iti Aldaw ti Pannakaukom; ta gapu kadagiti sao maibilangkanto a nalinteg, ket gapu kadagiti sao maibliangkanto a dakes.”
Agpapan pay dagiti mannakabalin nga ar-aramid ni Jesus, inkalikagum dagiti eskribas ken Pariseo: “Mannursuro, kayatmi a makita ti maysa a pagilasinan nga aggapu kenka.” Nupay dagitoy a tattao manipud Jerusalem ti mabalin a saanda a personal a nakita dagiti datdatlagna, dagiti di mapaulbodan a pammaneknek dagiti nakasaksin maipapan kadakuada ti adda. Gapuna kuna ni Jesus kadagiti papangulo a Judio: “Ti maysa a kaputotan a dakes ken mannakiabig dumawat ti maysa a pagilasinan, ngem awanto ti pagilasinan a maited kenkuana no di ti pagilasinan ni Jonas a mammadto.”
Iti panangilawlawagna ti kayatna a sawen intuloy ni Jesus: “Ta no kasano ti panagyan ni Jonas iti tian ti dakkel nga ikan iti tallo nga aldaw ken iti tallo a rabii, kasta ti panagyanto ti Anak ti tao iti puso ti daga iti tallo nga aldaw ken tallo a rabii.” Kalpasan ti pannakaalun-onna iti dakkel nga ikan, rimmuar ni Jonas a kasla napagungar, gapuna impadto ni Jesus nga isut’ matay ket iti maikatlo nga aldaw maibangonto a sibibiag. Kaskasdi dagiti papangulo a Judio, uray pay idi iti kamaudianannan ket napagungar ni Jesus, inlaksidda “ti pagilasinan ni Jonas.”
Gapuna kinuna ni Jesus a dagiti tattao ti Nineve a nagbabawi iti panangaskasaba ni Jonas tumakderdanto iti panangukom tapno ilunodda wenno kondenarenda dagiti Judio a nangilaksid ken ni Jesus. Umas-asping iti dayta, inyaspingna ida iti reina ti Seba, a naggapu manipud kadagiti ungto ti daga tapno mangngegan ti kinasirib ni Salomon ket nagsiddaawanna ti nakita ken nangngeganna. “Ket, adda ditoy!” kinuna ni Jesus, “ti maysa a nangnangruna ngem ni Salomon.”
Kalpasanna inted ni Jesus ti ilustrasion ti maysa a tao a rimmuaran ti maysa a narugit nga espiritu. Ti lalaki, nupay kasta, ket saanna a pinunnuan daydiay ungaong a disso babaen kadagiti naimbag a bambanag ket gapu itoy isut’ nagyanan manen ti pito nga ad-adda a dakes nga espiritu. “Kasta met ti maaramidto itoy dakes a kaputotan,” kuna ni Jesus. Ti nasion nga Israelita ti nadalusan ket naglak-amda ti pannakareporma—kas ti temporario nga ipapanaw ti narugit nga espiritu. Ngem ti panangilaksid ti nasion kadagiti mammadto ti Dios, a nagtungpal iti ibubusorda ken ni Kristo a mismo, ti nangipanayag iti dakes a kasasaadda a dakdakes ngem iti daydiay pangrugianna.
Bayat nga agsasao ni Jesus, dimteng ni inana ken dagiti kakabsatna ket nagtakderda idiay ruar a kadua dagiti adu a tattao. Gapuna adda nagkuna: “Adtoy! ni inam ken dagiti kakabsatmo addada idiay ruar, a tarigagayanda ti pannakisao kenka.”
“Asino ti inak ken siasinoda dagiti kakabsatko?” insaludsod ni Jesus. Ket intudona dagiti adalanna, kinunana: “Adtoy! Ni inak ken dagiti kakabsatko! Ta siasinoman a mangaramidto iti pagayatan ni Amak nga adda sadi langit, isu dayta ti kabsatko a lalaki ken babai, ken inak.” Iti daytoy a pamay-an impakita ni Jesus nga uray kasano ti kapateg ti singgalut a mamagsinggalut kenkuana kadagiti kakabagyanna, kaskasdi a napatpateg ti pannakirelasionna kadagiti adalanna. Mateo 12:33-50; Marcos 3:31-35; Lucas 8:19-21.
◆ Kasano a napaay dagiti Pariseo a namagbalin a nasayaat agpadpada iti kayo ken ti bungana?
◆ Ania “ti pagilasinan ni Jonas,” ken kasano a nailaksid dayta?
◆ Kasano a ti nasion nga Israelita kas daydiay lalaki a rimmuaran ti narugit nga espiritu?
◆ Kasanot’ panangipaganetget ni Jesus iti nasinged a pannakirelasionna kadagiti adalanna?