“Saanmo nga Ammo no Sadino nga Agballiginto Daytoy”!

“Iti bigat imulam ti bin-im ket agingga iti rabii saanmo a paginanaen ta imam; ta saanmo nga ammo no sadino nga agballiginto daytoy.”​—ECL. 11:6.

1. Apay nga agpadpada a nakaskasdaaw ken mamagpakumbaba ti pannakakita iti idadakkel ti mula?

NASKEN nga aganus ti maysa a mannalon. (Sant. 5:7) Kalpasan a maimulana ti bin-i, masapul nga urayenna nga agtubo ken dumakkel dagita. No nasayaat dagiti kasasaad, mangrugin ti in-inut nga irurusing ken idadakkelda. Inton agangay, agdawa ken matangkenan dagita agingga a mabalinton nga anien ti mannalon. Makapasiddaaw la ketdi a masaksian ti milagro ti panagdakkel! Matignaytay met nga agpakumbaba apaman a mabigbigtayo no asino ti Makinggapuanan iti dayta a panagdakkel. Kabaelantay ti agaywan iti bin-i ken tumulong iti panagsibug, ngem ti laeng Dios ti makapadakkel iti dayta.​—Idilig ti 1 Corinto 3:6.

2. Kadagiti ilustrasion a nausig iti napalabas nga artikulo, ania dagiti insuro ni Jesus maipapan iti naespirituan a panagdakkel?

² Kas nadakamat iti napalabas nga artikulo, ti trabaho a panangikasaba iti Pagarian ket inyarig ni Jesus iti panagmula ti maysa a mannalon iti bin-i. Iti pangngarigna maipapan iti nagduduma a kita ti daga, impaganetget ni Jesus a nupay nasayaat a bin-i dagiti imula ti mannalon, ti panagtubo ken idadakkel dayta ket agpannuray iti kasasaad ti puso ti maysa a tao. (Mar. 4:3-9) Iti pangngarig maipapan iti daydiay naturog kalpasan a nagimula iti bin-i, intampok ni Jesus a ti proseso ti panagdakkel ket saan a naan-anay a maawatan dayta a mannalon. Ti ngamin panagdakkel ket maigapu iti pannakabalin ti Dios, saan a babaen kadagiti panagregget ti tao. (Mar. 4:26-29) Usigentayo ita ti tallo pay kadagiti pangngarig ni Jesus​—ti bukel ti mustasa, ti lebadura, ken ti iket.a

Ti Pangngarig Maipapan iti Bukel ti Mustasa

3, 4. Iti pangngarig maipapan iti bukel ti mustasa, ania a bambanag ti naitampok maipapan iti mensahe ti Pagarian?

³ Ti pangngarig maipapan iti bukel ti mustasa, a nailanad met iti Marcos kapitulo 4, itampokna ti dua a banag: umuna, ti nakaskasdaaw nga iyaadu dagiti mangipangpangag iti mensahe ti Pagarian; maikadua, ti pannalaknib a maipapaay kadagiti immawat iti mensahe. Kinuna ni Jesus: “Iti ania ti pangyaspingantayo iti pagarian ti Dios, wenno iti ania a pangngarig nga iparangtayo dayta? Umasping iti bukel ti mustasa, nga iti tiempo ti pannakaimulana iti daga isu ti kababassitan kadagiti amin a bukel nga adda ditoy daga​—ngem inton naimulan, tumubo ket agbalin a dakdakkel ngem ti amin a sabsabali pay a nateng ken mangpataud kadagiti dadakkel a sanga, iti kasta dagiti tumatayab iti langit makasarakda ti pagaponan iti sidong ti linongna.”​—Mar. 4:30-32.

⁴ Nailadawan ditoy ti irarang-ay ti “pagarian ti Dios” kas paneknekan ti panagsaknap ti mensahe ti Pagarian ken ti irarang-ay ti kongregasion Kristiano sipud idi Pentecostes 33 K.P. nga agpatpatuloy. Ti bukel ti mustasa ket maysa a bassit a bin-i a mabalin a mangiladawan iti nakabasbassit a banag. (Idilig ti Lucas 17:6.) Ngem inton kamaudiananna, ti mula a mustasa ket mabalin a madanonna ti katayag a 3 agingga iti 5 a metro ken addaan iti natibker a sangsanga, isu a kasla maibilang pay ketdin a kayo.​—Mat. 13:31, 32.

5. Kasano a rimmang-ay ti kongregasion Kristiano idi umuna a siglo?

⁵ Bassit la ti bilang dagiti kameng ti kabbuangay a kongregasion Kristiano idi 33 K.P. idi a ti agarup 120 nga adalan ket napulotan iti nasantuan nga espiritu. Iti las-ud ti ababa a tiempo, daytoy nagbassit a kongregasion dagiti adalan ket naaddaan iti rinibu a kameng. (Basaen ti Aramid 2:41; 4:4; 5:28; 6:7; 12:24; 19:20.) Iti las-ud ti tallo a dekada, kasta unay ti iyaadu dagiti agani, nga uray la naibaga ni apostol Pablo iti kongregasion ti Colosas a ti naimbag a damag ket ‘naikasaban iti isuamin a parsua nga adda iti baba ti langit.’ (Col. 1:23) Anian a nakaskasdaaw nga irarang-ay!

6, 7. (a) Ania nga irarang-ay ti napasamak sipud idi 1914? (b) Ania pay nga irarang-ay ti mapasamakto?

⁶ Sipud idi naipasdek ti Pagarian ti Dios idiay langit idi 1914, dagiti sanga ti “kayo” a mustasa ket ad-adda a rimmangpaya ngem iti ninamnama. Naimatangan ti ili ti Dios ti literal a kaitungpalan daytoy a padto nga insurat ni mammadto Isaias: “Daydiay met laeng bassit agbalinto a sangaribu, ket daydiay nagbassitan maysa a mannakabalin a nasion.” (Isa. 60:22) Ti bassit a grupo dagiti napulotan a makipaspaset iti trabaho a panangasaba idi rugrugi ti maika-20 a siglo ket dida impagarup a dumanon iti agarup pito a milion a Saksi ti makiraman iti daytoy a trabaho iti tawen 2008, iti nasurok a 230 a pagilian. Talaga a nakaskasdaaw dayta nga irarang-ay, a mayasping iti panagtubo ken idadakkel ti bukel ti mustasa iti pangngarig ni Jesus!

⁷ Ngem agpatingga kadi ditan ti irarang-ay? Saan. Dumtengto ti tiempo nga amin a tattao ditoy daga ket iturayanen ti Pagarian ti Dios. Nagessatton ti amin a bumusbusor. Ngem mapasamak dayta saan a gapu iti panagregget ti tao no di ket gapu iti ibaballaet ni Soberano nga Apo Jehova kadagiti pasamak ditoy daga. (Basaen ti Daniel 2:34, 35.) Iti kasta, makitatayton ti maudi a kaitungpalan ti maysa pay a padto nga insurat ni Isaias: “Ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.”​—Isa. 11:9.

8. (a) Siasino ti isimbolo dagiti tumatayab iti pangngarig ni Jesus? (b) Iti ania a masalsalaknibantayo uray pay itan?

⁸ Kinuna ni Jesus a dagiti tumatayab iti langit ket makasarakda iti pagaponan iti salinong ti Pagarian. Dagitoy a tumatayab saanda nga isimbolo dagiti kabusor ti Pagarian a mangkaan kadagiti nasayaat a bin-i, a kas iti inaramid dagiti tumatayab iti pangngarig maipapan iti tao a nagiwaris iti bin-i a nagdisso iti nagduduma a kita ti daga. (Mar. 4:4) Imbes ketdi, iti daytoy a pangngarig, dagiti tumatayab ket isimboloda dagiti nalinteg panagpuspusoda a tattao a nagkamang iti kongregasion Kristiano. Uray pay ita, masalsalaknibanen dagitoy tapno saan a matulawan ti espiritualidadda kadagiti imoral ken narugit nga aramid daytoy nadangkes a lubong. (Idilig ti Isaias 32:1, 2.) Inyasping met ni Jehova ti Mesianiko a Pagarian iti maysa a kayo idi impakaammona daytoy a padto: “Iti bantay ti kangatuan ti Israel iyakarkonto nga imula, ket sigurado a maaddaanto kadagiti kangrunaan a sanga ken mangpataud iti bunga ket agbalin a nadaeg a sedro. Ket iti sirokna pudno nga agtaengto amin dagiti tumatayab a nadumaduma ti payakda; agtaengdanto iti salinong ti bulbulongna.”​—Ezeq. 17:23.

Ti Pangngarig Maipapan iti Lebadura

9, 10. (a) Ania a punto ti impaganetget ni Jesus iti pangngarig maipapan iti lebadura? (b) Iti Biblia, ania ti masansan nga isimbolo ti lebadura, ken ania a saludsod ti usigentayo maipapan iti panangtukoy ni Jesus iti lebadura?

⁹ Ti idadakkel wenno irarang-ay ket saan a kanayon a makita ti tao. Dayta a punto ti impaganetget ni Jesus iti sumaganad a pangngarigna. Kinunana: “Ti pagarian ti langlangit umasping iti lebadura, nga innala ti maysa a babai ket indulinna iti tallo a dadakkel a sukat ti arina, agingga nga immalsa ti intero a masa.” (Mat. 13:33) Ania ti isimbolo daytoy a lebadura, ken ania ti nakainaiganna iti irarang-ay ti Pagarian?

¹⁰ Iti Biblia, ti lebadura ket masansan a nausar a mangisimbolo iti basol. Iti kasta nga anag a tinukoy ni apostol Pablo ti lebadura idi dinakamatna ti makadadael nga impluensia ti maysa a managbasol iti kongregasion ti nagkauna a Corinto. (1 Cor. 5:6-8) Ti kadi lebadura a tuktukoyen ni Jesus ket mangisimbolo iti irarang-ay ti maysa a negatibo a banag?

11. Ania ti nakausaran ti lebadura iti nagkauna nga Israel?

¹¹ Sakbay a sungbatantayo dayta a saludsod, nasken a laglagipentayo ti tallo a kangrunaan a kinapudno. Umuna, nupay saan nga impalubos ni Jehova ti pannakausar ti lebadura bayat ti pannakarambak ti Paskua, adda dagiti gundaway nga inawatna dagiti daton a nalebaduraan. Nausar ti lebadura mainaig kadagiti pakikaykaysa a sakripisio, a ti agidatdaton boluntario nga idatagna ti datonna kas ebkas ti panagyamanna iti adu a bendision ni Jehova. Pagrag-oan dagiti agidatdaton ti pannanganda kadagita.​—Lev. 7:11-15.

12. Ania ti masursurotayo iti panangusar ti Biblia kadagiti simbolo?

¹² Maikadua, nupay ti maysa a simbolo a nausar iti Biblia ket adda negatibo nga ipasimudaagna, adda met gundaway a mabalin a mausar dayta a mangirepresentar iti banag a positibo. Kas pagarigan, iti 1 Pedro 5:8, ni Satanas ket nayasping iti leon, a mangiladawan iti napeggad ken narungsot a kababalinna. Ngem iti Apocalipsis 5:5, ni Jesus ket nayasping met iti leon​—“ti Leon a nagtaud iti tribu ni Juda.” Iti naud-udi a teksto, ti leon ket nausar a mangisimbolo iti natured a panangiwayat iti hustisia.

13. Ania ti ipakita ti pangngarig ni Jesus maipapan iti lebadura no iti naespirituan nga irarang-ay?

¹³ Maikatlo, iti pangngarig ni Jesus, saanna a kinuna a dinadael ti lebadura ti intero a masa ti arina isu a saanen a mausar dayta. Tinukoyna laeng ti gagangay a pamay-an ti panagaramid iti tinapay. Ti babai inrantana nga ilaok ti lebadura, isu a nasayaat wenno positibo dagiti resulta dayta. Ti lebadura ket naidulin iti masa ti arina. Gapuna, ti panangpaalsa ti lebadura iti masa ti arina ket saan a nakita ti babai. Ipalagip daytoy kadatayo ti mannalon a naturog iti rabii kalpasan ti panagmulana iti bin-i. Sigun ken Jesus, “ti bin-i agtubo ken dumakkel, [ket ti mannalon] saanna nga ammo no kasano.” (Mar. 4:27) Anian a nagsimple a panangyarig iti di makita a proseso ti naespirituan nga irarang-ay! Mabalin nga iti damo, ditay makita ti irarang-ay, ngem agminarto dagiti resulta inton agangay.

14. Ania nga aspeto ti trabaho a panangasaba ti nayarig iti panangpaalsa ti lebadura iti intero a masa?

¹⁴ Daytoy nga irarang-ay ket saan la a di makita ti tao no di ket sumaksaknap met dayta. Daytoy ti sabali pay nga aspeto a naipaganetget iti pangngarig ni Jesus maipapan iti lebadura. Ti lebadura pinaalsana ti intero a masa, ti amin a “tallo a dadakkel a sukat ti arina.” (Luc. 13:21) Kas iti lebadura, ti trabaho a panangikasaba iti Pagarian a nakaigapuan dayta a naespirituan nga irarang-ay ket simmaknap “agingga iti kaadaywan a paset ti daga.” (Ara. 1:8; Mat. 24:14) Anian a nagsayaat a pribilehio ti pannakiraman iti daytoy a nakaskasdaaw nga irarang-ay ti trabaho ti Pagarian!

Ti Iket

15, 16. (a) Sumariaenyo ti pangngarig maipapan iti iket. (b) Ania ti isimbolo ti iket, ken ania nga aspeto ti irarang-ay ti Pagarian ti tuktukoyen dayta a pangngarig?

¹⁵ Ti kalidad dagidiay agkunkuna nga adalan ida ni Jesu-Kristo ket napatpateg ngem iti bilangda. Tinukoy ni Jesus daytoy nga aspeto ti irarang-ay ti Pagarian idi nangipaay iti sabali pay a pangngarig, a daytoy ket maipapan iti iket. Kinunana: “Manen ti pagarian ti langlangit umasping iti iket a naitinnag iti baybay ken agur-urnong iti tunggal kita ti ikan.”​—Mat. 13:47.

¹⁶ Ti iket, a mangisimbolo iti trabaho a panangikasaba iti Pagarian, ket makaurnong iti tunggal kita ti ikan. Intuloy a kinuna ni Jesus: “Idi napnon [ti iket] insang-atda agingga iti igid ti baybay ket, bayat a situtugawda, inummongda dagiti nasayaat kadagiti tiklis, ngem dagiti di nasayaat imbellengda. Kastanto inton panungpalan ti sistema ti bambanag: rummuarto dagiti anghel ket ilasinda dagiti nadangkes manipud kadagiti nalinteg ket ipuruakdanto ida iti umap-apuy nga urno. Sadiay nga addanto panagsangitda ken ti panagngaretnget dagiti ngipenda.”​—Mat. 13:48-50.

17. Ania a periodo ti tiempo ti tuktukoyen ti panamaglalasin iti pangngarig maipapan iti iket?

¹⁷ Daytoy kadi a panamaglalasin tukoyenna ti maudi a panangukom kadagiti karnero ken kadagiti kalding nga imbaga ni Jesus a mapasamak inton dumteng iti dayagna? (Mat. 25:31-33) Saan. Dayta a maudi a panangukom ket mapasamak iti iyaay ni Jesus bayat ti dakkel a rigat, idinto ta ti panamaglalasin a nadakamat iti pangngarig maipapan iti iket ket mapasamak bayat “ti panungpalan ti sistema ti bambanag.”b Isu daytoy ti tiempo a pagbibiagantayo ita​—dagiti al-aldaw sakbay ti dakkel a rigat. No kasta, kasano a maar-aramid ita ti trabaho a panamaglalasin?

18, 19. (a) Kasano a maar-aramid ita ti trabaho a panamaglalasin? (b) Ania nga addang ti masapul nga aramiden dagiti napudno ti panagpuspusoda a tattao? (Kitaen met ti footnote iti panid 21.)

¹⁸ Literal a minilion a simboliko nga ikan iti baybay ti sangatauan ti maat-atrakar iti kongregasion ni Jehova iti moderno a panawen. Adda dagidiay tumabtabuno iti Memorial, dadduma ti makigimgimong a kaduatayo, ken adda met dagidiay makipagad-adal iti Biblia. Ngem pampaneknekan kadi amin dagitoy a pudnoda a Kristiano? Mabalin a ‘maisang-atda agingga iti igid ti baybay,’ ngem kinuna ni Jesus a dagiti laeng “nasayaat” ti naummong kadagiti tiklis, a mangisimbolo kadagiti kongregasion Kristiano. Dagiti di nasayaat a simboliko nga ikan ket maibelleng, ken inton agangay, maipuruakdanto iti simboliko nga umap-apuy nga urno a mangipasimudaag iti masanguanan a pannakadadael.

¹⁹ Kas isimbolo dagiti di nasayaat nga ikan, adu a makipagad-adal iti Biblia iti ili ni Jehova ti simmardengen nga agpayadal. Adda dadduma met nga annak dagiti Saksi a talaga a dida pulos kayat a suroten ti panagbiag nga inyulidan ni Jesus. Saanda a kayat ti agdesision nga agserbi ken Jehova wenno kalpasan nga inkeddengda nga aramiden dayta, simmardengdan nga agserbi kenkuana.c (Ezeq. 33:32, 33) Ngem masapul a ti amin a napudno ti panagpuspusoda a tattao ket tumulokda a maummong kadagiti arig-tiklis a kongregasion sakbay ti maudi nga aldaw ti panangukom ket agtalinaedda iti natalged a lugar.

20, 21. (a) Ania ti nasursurotayo iti panangrepasotayo kadagiti pangngarig ni Jesus maipapan iti idadakkel wenno irarang-ay? (b) Ania ti determinado nga aramidem?

²⁰ Gapuna, ania ti nasursurotayo iti ababa a panangrepasotayo kadagiti pangngarig ni Jesus maipapan iti idadakkel wenno irarang-ay? Umuna, kas iti idadakkel ti bukel ti mustasa, adda nagdakkel nga irarang-ay ti trabaho ditoy daga agpaay iti interes ti Pagarian. Awan ti makalapped iti panagsaknap ti trabaho ni Jehova! (Isa. 54:17) Kanayonanna, maipapaayan iti naespirituan a pannakasalaknib dagidiay nagkamang iti ‘pagaponan iti sidong ti linong ti kayo.’ Maikadua, ti Dios ti mangpadakkel. Kas iti nailemmeng a lebadura a nangpaalsa iti intero a masa, ti irarang-ay ti interes ti Pagarian ket saan a kanayon a nalaka a makita wenno maawatan, ngem talaga a mapaspasamak dayta! Maikatlo, saan nga amin kadagidiay naummong ket nakapaneknek a nasayaatda. Dadduma ket kas kadagiti di nasayaat nga ikan iti pangngarig ni Jesus.

²¹ Nupay kasta, anian a makaparegta a makita ti nagadu a nasayaat a tattao nga inyadani ni Jehova! (Juan 6:44) Nagresulta dayta iti nakaskasdaaw nga irarang-ay iti adu a pagilian. Ni Jehova a Dios ti naan-anay a mapadayawan iti dayta nga irarang-ay. Gapu ta maim-imatangantayo dayta, rumbeng koma nga agtulnog ti tunggal maysa kadatayo iti balakad a naisurat sinigsiglon ti napalabas: “Iti bigat imulam ti bin-im . . . , ta saanmo nga ammo no sadino nga agballiginto daytoy, no ditoy wenno sadiay, wenno no isuda a dua agpadadanto a naimbag.”​—Ecl. 11:6.

[Footnotes]

Ania ti Sungbatmo?

• Ania ti isuro kadatayo ti pangngarig ni Jesus maipapan iti bukel ti mustasa mainaig iti irarang-ay ti Pagarian ken ti naespirituan a pannakasalaknib?

• Ania ti isimbolo ti lebadura iti pangngarig ni Jesus, ken ania a kinapudno ti intampok ni Jesus maipapan iti irarang-ay ti Pagarian?

• Ania nga aspeto ti irarang-ay ti Pagarian ti tuktukoyen ti pangngarig maipapan iti iket?

• Kasanotayo a masigurado a makapagtalinaedtayo a karaman kadagidiay a ‘naummong kadagiti tiklis’?

[Dagiti Ladawan iti panid 18]

Ania ti isuro kadatayo ti pangngarig maipapan iti bukel ti mustasa mainaig iti irarang-ay ti Pagarian?

[Ladawan iti panid 19]

Ania ti masursurotayo iti pangngarig maipapan iti lebadura?

[Ladawan iti panid 21]

Ania ti iladawan ti panamaglalasin kadagiti nasayaat nga ikan manipud kadagiti di nasayaat nga ikan?