MUSTASA

[Gr., siʹna·pi].

Yerba a napartak a dumakkel, a ti bin-i wenno bukelna ti tinukoy ni Jesus iti maysa a pangngarig maipapan iti Pagarian ti langlangit (Mt 13:31, 32; Mr 4:30-32; Lu 13:18, 19; kitaenyo ti PANGNGARIG) ken iti panangipamatmatna nga uray ti bassit a pammati adu ti maibanagna. (Mt 17:20; Lu 17:6) Adu a kita ti mustasa ti masarakan nga agtubtubo lattan idiay Palestina, a ti nangisit a mustasa (Brassica nigra) isu ti kakikita a kaaduanna a maimulmula. Iti nataba a daga, ti bin-i agtubo ken mabalin a dumakkel a kasla kayo kalpasan ti sumagmamano a bulan, maysa a mula a dumanon iti katayag a 4.5 m (15 pie), a ti kangrunaan nga ungkayna ket kapuspuskol ti takiag ti tao. Duyaw ti sabsabong dagiti mula a mustasa ket ti igid dagiti bulongda adda giraygirayna ken natayengteng a berde ti marisda. Dagiti tumanor a bunga aglaonda iti maysa nga intar ti bukbukel, a ti bukbukel ti nangisit a mustasa ket natayengteng a kayumanggi ti marisda. Iti otonio, tumangken ken sumikkil dagiti ungkay ken sangsanga ti mula, umdas ti kinatibkerda a pagbatayan dagiti tumatayab a kas kadagiti linnet ken finch nga agtaraon kadagiti bukel dayta.

Nupay adda dagiti sumupiat a ti bukel ti mustasa saan nga “isu ti kababassitan” kadagiti amin a bukel, a basbassit dagiti bukel ti orkidia, ket ti bukel ti mustasa saan nga aktual nga agbalin a “kayo,” laglagipen koma nga agsasao idi ni Jesus sigun kadagiti termino a pagaammo dagiti agdengdengngeg kenkuana. Iti biang dagiti dumdumngeg ken Jesus, ti bukel ti mustasa ket pudno a maysa kadagiti kababassitan a bukel a naimulan, ket makapainteres ta dagiti Arabo ibilangda kas “kaykayo” dagiti mula a basbassit ngem iti mustasa.​—Mt 13:31, 32.