Ti Biag ken Ministerio ni Jesus

Nabendisionan ti Ad-adu a Pannursuro

KAAW-AWAT pay laeng dagiti adalan ti pannakailawlawag ti pangngarig ti agmulmula. Ngem itan kayatda ti makaadal ti ad-adu pay. “Ipalawagmo kadakami,” indawatda, “ti pangngarig dagiti zizania iti talon.”

Anian ti pannakaiduma ti pannakabalin dagiti adalan manipud kadagiti dadduma a tattao nga adda idiay igid ti baybay! Dagidiay a tattao ket agkurangda iti napasnek a tarigagay a makaammo iti kaipapanan dagiti pangngarig, nga isuda lat’ mapmapnek laeng iti balabala dagiti bambanag a naipasango kadakuada. Iti panamaggiddiat kadagiti agdengdengngeg idiay igid ti baybay kadagiti managsukimat nga ad-adalan, kunkuna ni Jesus:

“Ti rukod a pangrukodyo, isunto ti pakarukodanyo, wen, ket maikkankayto iti ad-adda pay.” Dagiti ad-adalan ti mangipakpakita iti napasnek nga interes ken atension ken ni Jesus ket gapu itoy nabendisionanda nga immawat iti ad-adu pay a pannursuro. Gapuna, kas sungbat iti panagkalikagum dagiti adalanna, inlawlawag ni Jesus:

“Ti agmula kadagiti nasayaat a bukel isu ti Anak ti tao; ket ti talon isu ti lubong; ket dagiti nasayaat a bukel, isuda dagiti annak ti pagarian; dagiti zizania isuda dagiti annak ti dakes, ket ti kabusor a nangimula kadagitoy isu ti Diablo. Ket ti panagani isu ti panungpalan ti sistema dagiti bambanag, ket dagiti agani isuda dagiti anghel.”

Kalpasan ti panangiyam-ammona iti tunggal paset ti pangngarigna, dineskribir ni Jesus ti pagtungpalanna. Iti panungpalan ti sistema dagiti bambanag, kunana, “dagiti agani,” wenno dagiti anghel, paglasinlasinendanto dagiti kasla zizania nga imitasion a Kristiano manipud kadagiti pudno nga “annak iti pagarian.” “Dagiti annak iti managdakdakes” mamarkaandanto a maipaay iti pannakadadael, ngem dagiti annak iti Pagarian ti Dios, “dagiti nalinteg,” agraniagdanto a kasla init idiay Pagarian ni Amada.

Sumaruno a binendisionan ni Jesus dagiti managsukimat nga adalanna iti tallo pay nga ilustrasion wenno pangngarig. Umuna, kunana: “Ti pagarian ti langit maipadis iti maysa a gameng a nailemmeng iti talon, isu a nasarakan ti maysa a tao ket ket inlimedna; ket iti ragsakna gapu iti daytoy, mapan ken ilakona ti amin nga adda kenkuana ket gatangenna daydiay a talon.”

“Kasta met,” intuloyna, “ti pagarian ti langit maipadis iti maysa a tao nga agtagtagilako nga agsapsapul kadagiti nasayaat a perlas. Isu nga idi nakasarak ti maysa a napateg unay a perlas, napan ket inlakona ti amin nga adda kenkuana ket isu ti ginatangna.”

Ni Jesus mismo ket arigna daydiay tao a nakasarak ti nailemmeng a gameng ket kas iti daydiay agtagtagilako a nakasarak iti napateg unay a perlas. Inlakona ti isuamin nga adda kenkuana, ti kaiyariganna, babaen ti panangisukona ti nadayaw a saadna idiay langit tapno agbalin a nababa laeng a tao. Kalpasanna, kas maysa a tao ditoy daga, nagsagaba iti pannakalalais ken narungsot a pannakaidadanes, amin tapno mapaneknekanna a maikari nga agbalin kas ti Agturay iti Pagarian ti Dios.

Naipasango met ti karit kadagiti paspasurot ni Jesus nga ilakoda ti isuamin nga adda kadakuada tapno magun-odanda ti naindaklan a gunggona nga agbalin a kadua nga agturay ni Kristo wenno kas naindagaan nga iturayan iti Pagarian. Panunotentayto aya ti pannakiraman iti Pagarian ti Dios kas maysa a banag a napatpateg ngem ti aniaman iti biag, kas maysa a di magatadan a gameng wenno maysa a napateg a perlas?

Kamaudiananna, inyarig ni Jesus “ti pagarian ti langit” iti maysa nga iket nga agurnong kadagiti isuamin a kita ti ikan. Idi a mapaglalasinlasin dagiti ikan, dagiti di maikari maibellengda ngem dagiti nasayaat ti maidulin. Gapuna, kuna ni Jesus, kastanto met inton panungpalan ti sistema dagiti bambanag; dagiti anghel ilasindanto dagiti dakes manipud kadagiti nalinteg, nga ikeddeng dagiti managdakdakes iti pannakadadael.

Ni Jesus mismo ti nangirugi iti daytoy proyekto a panagdaklis, nga inayabanna dagiti immuna nga adalanna nga agbalin a “dumadaklis kadagiti tattao.” Babaen iti panangiwanwan dagiti anghel, ti trabaho a panagdaklis ti agtultuloy iti panaglabas dagiti adu a siglo. Itan dimteng met laengen ti tiempo nga ibagkat ti “iket,” nga isimsimbolona dagiti organisasion ditoy daga nga agkunkuna nga isuda Kristianoda.

Nupay dagiti di maikari nga ikan ti maipalladaw iti pannakadadael, siyayaman a mabalin a maibilangtayo kadagiti ‘nasayaat nga ikan’ a maidulinto. Babaen ti panangiparangarang iti isu met laeng a napasnek a tarigagay kas inaramid dagiti adalan ni Jesus a maipaay iti ad-adu a pannakaammo ken pannakaawat, mabendisionantayo saan laeng nga iti ad-adu a pannursuro no di ket ti bendision ti Dios iti biag nga awan inggana. Mateo 13:36-52; 4:19; Marcos 4:24, 25.

◆ Kasano a naiduma dagiti ad-adalan manipud kadagiti dadduma nga adda iti igid ti baybay?

◆ Asino wenno ania ti inrepresentar ti agmulmula, ti talon, ti nasayaat a bin-i, ti kabusor, ti panagani, ken dagiti agani?

◆ Ania dagiti tallo a kanayonan a pangngarig nga impaay pay ni Jesus, ket aniat’ maammuantayo manipud kadakuada?