Mano ti Kayatyo nga Ibayad iti Daytoy?

ADDA kadi ammoyo a banag a napateg unay ta situtulokkayo a mangisakripisio iti amin nga adda kadakayo tapno matagikuayo dayta? Adda ammo ni Jesus, ket nasaona daytoy kadagiti pasurotna.

Kinunana: “Ti pagarian ti langit maiyarig iti maysa a tao nga agtagtagilako nga agsapsapul kadagiti nasayaat a perlas. Isu nga idi nakasarak ti maysa a napateg unay a perlas, napan ket inlakona ti amin nga adda kenkuana ket isu ti ginatangna.”​—Mateo 13:45, 46.

Situtulok dayta nga agtagtagilako a mangisakripisio ti amin tapno matagikuana ti “perlas,” ti Pagarian ti Dios. Apay? Ngamin, awan ditoy lubong ti maipadis iti dayta. Risutento ti Pagarian ti Dios dagiti parikut a di marisut ti tao, kas iti gubat, bisin, krimen, ken panangirurumen. (Salmo 72:4-8, 13, 14) Iti sidong ti Pagarian, awanton uray ti basol, sakit, ken ipapatay. (Apocalipsis 21:4, 5) Isu met la a ti maikadua a dawat iti Kararag ti Apo (ti “Amami”) ket, “Umay koma ti pagariam”!​—Mateo 6:9, 10.

Aniat’ ibayadyo tapno makiraman kadagiti bendision ti Pagarian? Kinapudnona, libre dagiti bendision. Ngem tapno matagiragsakyo dagitoy, masapul nga ammuenyo no ania ti Pagarian, patienyo a napaypayso dayta, ken ipangpangrunayo iti biagyo. Maaramidyo kadi dayta? Adda impormasion iti Biblia a makatulong kadakayo. Apay a dikay palubosan a tulongandakayo dagiti Saksi ni Jehova a makasursuro maipapan iti Pagarian ti Dios ken makakita no kasano a gunggonaannakayo uray itatta.