Adda Napateg a Gameng nga Iranudtayo
1 Napno ti Sao ti Dios kadagiti napateg a naespirituan a gameng. (Sal. 12:6; 119:11, 14) Iti maysa a partikular a situasion, nagusar ni Jesus kadagiti ilustrasion a mangiladawan iti nagduduma nga aspeto ti Pagarian sa insaludsodna kadagiti adalanna: “Naalayo kadi ti kababagas amin dagitoy a banag?” Idi simmungbatda iti “Wen,” kinunana kadakuada: “No kasta, tunggal manangisuro iti publiko, no naisuro maipapan iti pagarian ti langlangit, umasping iti maysa a tao, maysa a bumalay, a mangiruar iti bambanag a baro ken daan manipud iti pagipempenanna iti gameng.”—Mat. 13:1-52.
2 Maibilang kas daan a gameng dagiti kinapudno iti Biblia a nasursurotayo idi damotayo ti agadal. Babaen ti agtultuloy a panangsukimattayo a mismo kadagiti naun-uneg a bambanag iti Sao ti Dios, makabiroktayo kadagiti dadduma pay a kinapudno a linaon ti Biblia, nga ibilangtayo kas kabbaro a gameng. (1 Cor. 2:7) Maysa pay, matarusantayo dagita a kabbaro a gameng iti tulong “ti matalek ken masirib nga adipen.”—Mat. 24:45.
3 Ipatpategtayo unay dagita a naespirituan a gameng, daan man wenno baro. Dayta ti mangtignay kadatayo nga agsanay ken agbalin a nalaing a mannursuro iti Sao ti Dios, a sipaparabur nga iranudtayo kadagiti sabsabali dagiti napateg a kinapudno a nasursurotayo.
4 Agsursurokayo iti Ulidan ni Jesus: Kas panangipakita nga ipatpategna dagiti kasta a gameng, inkagumaan ni Jesus nga iranud dagita kadagiti sabsabali. Uray no nabannogen, saan a nagsardeng a nangiruar kadagiti gameng manipud iti “kamaligna.”—Juan 4:6-14.
5 Ti panangayat ni Jesus kadagidiay napanglaw iti naespirituan ti nangtignay kenkuana a mangiranud kadagiti makaited-biag a gameng ti kinapudno a naggapu iti Dios. (Sal. 72:13) Isu ket naasian kadagidiay mabisbisin iti naespirituan ken natignay a ‘mangisuro kadakuada iti adu a banag.’—Mar. 6:34.
6 Tuladenyo ni Jesus: No tagipatgentayo unay dagiti gameng nga adda kadatayo, kas iti inaramid ni Jesus, sigagagar nga ipakitatayo kadagiti tattao dagiti naespirituan a kinapudno manipud iti Biblia a mismo. (Prov. 2:1-5) Uray no mabannogtayo no dadduma, naimpusuan nga isarsaritatayo kadagiti sabsabali dagiti Nainkasuratan a kinapudno. (Mar. 6:34) No apresiarentayo unay dagiti gameng nga adda kadatayo, matignaytayo a mangaramid iti amin a kabaelantayo a makiraman a naan-anay iti ministerio.