No Kasano a Mapagballigian Dagiti Kristiano ti Panangumsi Dagiti Tao

ANIA ti mariknayo no adda mangumsi wenno mamadpadakes kadakayo? Gagangay a masaktankay unay. Kasta met ti mapasaran dagiti Saksi ni Jehova tunggal agbalinda a puntiria ti di umiso wenno tiritir nga impormasion iti media. Ngem kas kinuna ni Jesus iti Mateo 5:11, 12, kaskasdi nga addaanda iti rason nga agrag-o.

Kas pagarigan, kinuna ti maysa a Katoliko a publikasion idiay Alemania nga “obligado ti tunggal Saksi a mangyabuloy ti 17 aginggat’ 28 a porsiento iti mapastrekna [a kuarta] iti hedkuarter ti sekta.” Nupay kasta, saan a maysa a sekta dagiti Saksi ni Jehova, ket ti trabahoda naan-anay a masupsuportaran kadagiti boluntario a donasion. Adu a managbasa ti naallilaw gapu iti daytoy ulbod nga impormasion, a pakaldaangan dagiti Saksi ni Jehova. Ngem kasanot’ panagtignay dagiti pudno a Kristiano no maumsida iti media?

Maysa nga Ulidan a Tuladen Dagiti Kristiano

Silalawag nga iladawan ti Mateo kapitulo 23 no kasano a binabalaw ni Jesus dagiti relihiuso a bumusbusor kenkuana gapu iti panaginsisingpet ken panangallilawda. Mangipaay kadi daytoy iti pagwadan para kadagiti Kristiano itatta maipapan iti no kasano a sanguen dagiti kritiko? Saan. Binabalaw ti Anak ti Dios dagiti relihiuso a bumusbusor kenkuana gapu iti naidumduma nga autoridad ken nauneg a pannakaawat nga ik-ikutanna, nga inaramidna dayta agpaay iti pagimbagan ti umariwekwek nga agdengdengngeg.

Isalaysay ti Mateo 15:1-11 a nababalaw ni Jesus gapu ta sinalungasing kano dagiti adalanna ti tradision dagiti Judio. Kasanot’ panagtignay ni Jesus? Nagtalinaed a natibker. No dadduma, sipaprangka a nakirinnason ni Jesus kadagiti mangbabbabalaw kenkuana, nga impabigbigna dagiti biddut a panangmatmatda. Kadawyan nga awan pagdaksanna kadagiti Kristiano itatta ti panangikagumaanda a mangilinteg iti biddut a panangipapan iti trabaho wenno sursuroda, a padpadasenda a lawlawagan ti kasasaad iti napudno ken nainkalintegan a pamay-an. Ar-aramidenda daytoy tapno matulongan dagiti napasnek a tattao a mangbigbig a ti pammabalaw kadagiti Saksi ni Jehova ket saan a maiparbeng ken makaipababat’ dayaw.

Ngem kitaenyo no aniat’ inaramid ni Jesus kamaudiananna idi kinuna dagiti adalanna: “Ammom kadi a dagiti Fariseo naitibkolda iti pannakangngegda iti kinunam?” ‘Naitibkol’ dagitoy a Fariseo​—saanda laeng a nariribukan no di ket nagbalinda a nakadakdakes a kabusor a linaksid ni Jesus. Isut’ gapuna nga insungbatna: “Bay-anyo ida. Isuda dagiti bulsek a mangidaldalan.” Awan mamaayna ti pannakisarita iti kakasta a nauyong a kabusor, saan a makagunggona iti siasinoman, ken mangituggod laeng iti awan serserbina a panagsusupiat. (Mateo 7:6; 15:12-14; idiligyo iti 27:11-14.) Ipakita dagiti sungbat nga impaay ni Jesus nga adda “panawen ti panagulimek ken adda panawen ti panagsao.”​—Eclesiastes 3:7.

Saan a mangnamnama dagiti Saksi ni Jehova iti siasinoman a sipaparabur nga agsao maipapan kadakuada. Sipapanunotda kadagiti sasao ni Jesus: “Asikay pay, inton amin a tattao agsaoda iti naimbag maipapan kadakayo, ta dagiti bambanag a kas kadagitoy ti inaramid dagiti ammada kadagiti ulbod a mammadto.” (Lucas 6:26) Iti naminsan a napagsaludsodan ni C. T. Russell, ti immuna a presidente ti Watch Tower Society, no apay a dina sinalakniban ti bagina maibusor kadagiti manangumsi. Simmungbat: “No agsardengka tapno kugtaram ti tunggal aso a mangtaol kenka, saankanto a pulos makaadayo.”

Isu a rumbeng a ditay ipalubos a ti pammabalaw dagiti determinado a bumusbusor singaenna ti panagserbitayo iti Dios. (Salmo 119:69) Ipamaysatayo ti trabaho dagiti pudno a Kristiano, nga isu ti panagebanghelio. Kas resulta daytoy, maaddaantay kadagiti gundaway a mangsungbat kadagiti saludsod ken mangilawlawag iti kaipapanan ti trabahotayo, kas ti panangparang-ay iti moral ti maysa a tao ken panangisuro kenkuana iti Sao ti Dios.​—Mateo 24:14; 28:19, 20.

Rumbeng Aya a Sungbatanyo ti Pammabalaw?

Kinuna ni Jesus kadagiti pasurotna: “Saankayo a paset ti lubong . . . Gapu iti daytoy ti lubong guraennakayo.” (Juan 15:19) Ti adu a damag a mamadpadakes kadagiti Saksi ni Jehova ket maysa nga ebkas daytoy a pananggura, ket rumbeng a palabsen dagitoy. Nupay kasta, no dadduma mabalin a mangidatag ti media iti impormasion a mangipaspasimudaag iti kinaawan pannakaammo maipapan kadagiti Saksi wenno mangtiritir ken mangballikug iti sumagmamano a kinapudno. Mabalin a mangala ti sumagmamano a periodista iti impormasion manipud kadagiti adda dasdasiganna a gubuayan. No rumbeng met laeng a palabsentay ti di umiso nga impormasion iti media wenno salaknibantay ti kinapudno babaen ti umiso a pamay-an ket agpannuray kadagiti kasasaad, iti naggapuan ti pammabalaw, ken iti panggepna.

No dadduma, mailinteg dagiti bambanag babaen ti maysa a nasayaat pannakaaramidna a surat iti editor no naan-anay a naipablaaken ti surat. Ngem mabalin a ti kasungani iti ninamnama ti ibunga ti kasta a surat. Kasano? Ti immuna a kinaulbod no kasta ket mabalin nga ad-adda a maipablaak, wenno mabalin a maipaayan iti ad-adu pay a gundaway dagiti bumusbusor a makayimprenta iti kinaulbod wenno pammadakes. Iti adu a kaso, kasayaatan no palubosan dagiti panglakayen nga agdesision no kasapulan nga agsurat iti editor. No ti maysa a negatibo a report iti pagiwarnak ket mangpataud iti panagilem, mabalin nga ipakaammo ti sanga nga opisina ti Watch Tower Society kadagiti kongregasion iti dayta a pagilian dagiti kinapudno, iti kasta matulongan dagiti amin nga agibumbunannag a mangipaay iti makapnek a panangilawlawag kadagiti managimtuod.

Kasapulan kadi a makiramankay kas indibidual iti kasta a tiritir a pammabasol? Ti balakad ni Jesus a “bay-anyo ida,” saanyo ida nga ikaskaso, silalawag a mayaplikar iti daytoy a grupo dagiti kabusor. Adda Naimbibliaan a rason dagiti nasungdo a Kristiano iti panangliklik kadagiti apostata ken dagiti kapanunotanda. (1 Corinto 5:11-13; Tito 3:10, 11; 1 Juan 2:19; 2 Juan 10, 11) No pudpudno nga interesado ti maysa no dagiti pammabalaw kadagiti Saksi ket pudno wenno ulbod, gagangay nga umdasen ti natibker-nakaibatayanna a pannakaammoyo a mangipaay iti sungbat.​—Kitaenyo Ti Pagwanawanan a Marso 15, 1986, pinanid 13 ken 14.

No naipasangokayo iti tiritir nga impormasion iti pagiwarnak, ipangagyo ti balakad iti Proverbio 14:15: “Ti nanengneng patienna amin a sao, ngem ti manakem a tao matmatanna a nalaing ti papananna.” Idiay Switzerland, adu a tattao ti nagpungtot idi a kinuna ti maysa a makatukay-rikna a damag a natay ti maysa nga agtutubo a babai a Saksi gapu ta nagkitakit dagiti kabagianna a mangipalubos kadagiti mangngagas a mangyalison iti dara. Kasta kadi nga agpayso ti napasamak? Saan. Nagkedked ti pasiente a mayalisonan iti dara gapu iti narelihiusuan a rason, ngem immanamong iti sandi a panangagas a di agusar iti dara. Narugian koma daytoy nga awanen ti adu a pakaburiboran ket nalabit a naispal ti biagna. Ngem, intantan ti ospital dagiti bambanag a di met kasapulan agingga a naladawen ti amin. Saan a dinakamat ti damag iti pagiwarnak dagitoy a kinapudno.

Gapuna, tingitingen a naimbag no kasano kapudno ti linaon ti kakasta a damag. Mabalintay nga ilawlawag kadagiti managimtuod nga as-asikasuen dagiti lokal a panglakayen ti kakasta a kasasaad iti naayat a pamay-an ken maitunos kadagiti pagalagadan iti Biblia. Ti panagbatay kadagiti pagalagadan no sumungsungbat lapdannatayo a sidadarasudos nga agaramid kadagiti konklusion.​—Proverbio 18:13.

Napateg ti Direkta nga Impormasion

Idi umuna a siglo, nagiwaras dagiti tao kadagiti kinaulbod maipapan ken Jesu-Kristo tapno madadael ti pakasarsaritaanna, a pinagparang pay ketdi ti dadduma nga isu ket mangliliput. (Lucas 7:34; 23:2; idiligyo ti Mateo 22:21.) Idi kamaudiananna, naipasango ti kabbaro a kongregasion Kristiano iti nasaknap nga ibubusor agpadpada dagiti relihiuso ken nailubongan nga elemento. Yantangay “ti Dios pinilina dagiti minamaag a bambanag ti lubong,” adu ti nangumsi kadagiti adipenna. (1 Corinto 1:22-29) Masapul a sanguen dagiti pudno a Kristiano itatta ti panangumsi, a maysa a kita ti panangidadanes.​—Juan 15:20.

Nupay kasta, apresiaren dagiti Saksi ni Jehova no ti tao a kasarsaritada ket awan dasdasiganna ken mangipakpakita iti isu met laeng a kababalin kas dagiti bisita ni Pablo idi idiay Roma, a nagkuna: “Pagarupenmi nga umiso a dumngegkami kenka no ania dagiti kapanunotam, ta pudno a no maipapan itoy a sekta naammuanmi a masupsuppiat iti isuamin a lugar.”​—Aramid 28:22.

Lawlawaganyo dagiti tattao a nakaawat iti di umiso nga impormasion, nga aramidenyo dayta buyogen ti kinaemma. (Roma 12:14; idiligyo ti 2 Timoteo 2:25.) Awisenyo ida a gumun-od iti direkta nga impormasion maipapan kadagiti Saksi ni Jehova, tapno saanda a maallilaw kadagiti ulbod a pammabasol. Mabalinyo met nga aramaten dagiti panangilawlawag nga impablaak ti Watch Tower Society a mangipapaay kadagiti detalye maipapan iti organisasion, ti pakasaritaanna, ken dagiti sursuro daytoy.a Naminsan sinungbatan ni Felipe ni Natanael babaen laeng ti panangikunana: “Umayka ket kitaem.” (Juan 1:46) Maaramidtay met ti kasta. Sibabara a maawat ti siasinoman nga agtarigagay a sumarungkar iti lokal a Kingdom Hall tapno direkta a mapaliiwna no ania a kita ti tattao dagiti Saksi ni Jehova ken no ania ti patpatienda.

Dikay Agbuteng Kadagiti Bumusbusor

Anian a makapabileg a maammuan a saan a mapasardeng ti panangumsi dagiti tao iti panagbalinda a Saksi! Iti maysa a talk show iti TV idiay Alemania, nangidatag dagiti apostata iti adu a kinaulbod maipapan kadagiti Saksi. Nailasin ti maysa nga agbuybuya a saan nga agpayso ti sasawen dagiti apostata ket natignay a mangitultuloy iti pannakipagadalna ti Biblia kadagiti Saksi. Wen, nasayaat ti ibunga no dadduma ti panangumsi dagiti tao!​—Idiligyo ti Filipos 1:12, 13.

Ammo ni apostol Pablo a mangipaay ti dadduma iti ad-adu nga atension kadagiti “ulbod a sarsarita” ngem iti kinapudno. Isut’ gapuna nga insuratna: “Agtalinaedka a sipupuot iti isuamin a bambanag, anusam ti dakes, aramidem ti trabaho ti managebanghelio, naan-anay nga itungpalmo ti ministeriom.” (2 Timoteo 4:3-5) Isu a diyo ipalubos a maburiborkayo, ken ‘iti aniaman a pamay-an saan a mabuteng’ kadagiti kabusoryo. (Filipos 1:28) Agtalinaedkay a kalmado ken natanang ket ikasabayo ti naimbag a damag a sirarag-o, ket sititibker a mapagballigianyonto ti panangumsi dagiti tao. Wen, laglagipenyo ti kari ni Jesus: “Naragsakkayo inton dagiti tattao umsiendakayo ken idadanesdakayo ket siuulbod a sawenda ti tunggal kita ti nadangkes a banag a maibusor kadakayo maigapu kaniak. Agrag-o ken aglagtokayo gapu iti rag-o, yantangay dakkel ti gunggonayo iti langlangit; ta kasta ti panangidadanesda kadagiti mammadto nga immun-una ngem dakayo.”​—Mateo 5:11, 12.

[Footnote]

[Blurb iti panid 27]

Idi naipasango kadagiti bumusbusor, imbaga ni Jesus kadagiti adalanna: “Bay-anyo ida.” Aniat’ kayatna a sawen?

[Blurb iti panid 29]

“Naragsakkayo inton dagiti tattao umsiendakayo ken idadanesdakayo ket siuulbod a sawenda ti tunggal kita ti nadangkes a banag a maibusor kadakayo maigapu kaniak.” ​—Mateo 5:11