SIROFENICIA, UMILI TI

Ti awag iti maysa a di Israelita a babai nga agnanaed iti rehion ti Tiro ken Sidon, sigun iti Marcos 7:26. Mabalin a timmaud ti sao nga “umili ti Sirofenicia,” a nagtipon a “Sirio” ken “Feniciano,” gapu ta ti Fenicia ket paset ti Siria a probinsia ti Roma. Ti babai nga umili ti Sirofenicia ket naawagan met iti Kha·na·naiʹa (iti literal, Canaanita; naipatarus a “taga Fenicia” iti NW), ta nagtaud ken Canaan dagiti nagkauna nga agnanaed iti Fenicia. Idi agangay, ti “Canaan” ket kangrunaanna a tumukoy iti Fenicia. (Mt 15:22, Rbi8 ftn) Naawagan iti “taga Grecia” mabalin a gapu ta Griego ti kapuonanna.​—Mr 7:26.

Saan a nagbayag kalpasan ti Paskua ti 32 K.P., immasideg ken Jesu-Kristo daytoy a babai nga umili ti Sirofenicia, a maulit-ulit a nagkiddaw a paruarenna ti sairo manipud anakna a babai. Idi damo nagkedked ni Jesus ket kinunana: “Saan nga umiso nga alaen ti tinapay ti annak ket ipuruak dayta kadagiti uken.” Kadagiti Judio, narugit nga animal ti aso. Ngem pinalag-an ni Jesus ti inaramatna a sasao babaen ti panangipadisna kadagiti di Judio “kadagiti uken,” a mabalin a maaywanan iti pagtaengan, saan ket a kadagiti atap nga aso iti kalsada. Nupay kasta, nalawag a ti kinuna ni Jesus ket pangsubok laeng iti babai. Sipapakumbaba a binigbig ti babai: “Wen, Apo; ngem pudno a dagiti uken manganda kadagiti murkat nga agtintinnag manipud iti lamisaan dagiti appoda.” Inyanninaw ti sasaona a dakkel ti pammatina, iti kasta napaimbag ti anakna a babai.​—Mt 15:21-28; Mr 7:24-30.