“Simnek ti Asina”

1-3. (a) Ania ti inaramid ni Jesus idi nagpakpakaasi kenkuana ti dua a bulsek a makilimlimos? (b) Ania ti kayat a sawen ti sasao a “simnek ti asina”? (Kitaem ti footnote.)

ITI asideg ti Jerico, adda dua a bulsek a lallaki nga agtugtugaw iti igid ti dalan. Inaldaw a mapanda sadiay nga agpuesto iti lugar a mapagnaan dagiti tattao tapno makilimosda. Ngem iti daytoy nga aldaw, adda mapasaranda a mangbalbaliw a mamimpinsan iti biagda.

² Kellaat nga adda nangngegda nga ariwawa. Gapu ta saanda a makita ti mapaspasamak, sinaludsod ti maysa kadakuada no apay nga umarimbangaw dagiti tattao. “Ni Jesus a Nazareno lumablabas!” kinunada kenkuana. Agturong ni Jesus idiay Jerusalem iti maudi a gundaway. Ngem saan nga agmaymaysa. Nakaad-adu a tattao ti sumursurot kenkuana. Idi nangngegda no asino ti lumablabas, impukkaw dagiti makilimlimos: “Apo, maasianka kadakami, Anak ni David!” Inungtan ida dagiti tattao ket imbagada nga agulimekda, ngem saanda a nagulimek.

³ Nangngeg ni Jesus ti panagpukpukkawda. Ania ti aramidenna? Adu ti mangburburibor iti panunot ken pusona. Sumreken iti maudi a lawas ti biagna ditoy daga. Ammona nga isu ket agsagaba ken aglak-am iti naulpit nga ipapatay idiay Jerusalem. Ngem saanna nga inyaleng-aleng dagiti umaw-awag kenkuana. Nagsardeng ket kiniddawna a maiyeg kenkuana dagidiay agpukpukkaw. “Apo, maluktan koma dagiti matami,” impakpakaasida. ‘Simnek ti asi’ ni Jesus ket idi sinagidna dagiti matada, makakitadan.a Dagus a simmurotda ken ni Jesus.​—Lucas 18:35-43; Mateo 20:29-34.

4. Kasano a tinungpal ni Jesus ti padto nga isu ket ‘maasian iti daydiay nanumo’?

⁴ Saan laeng nga iti daydi a gundaway a nangngaasi ni Jesus. Iti adu a gundaway ken iti nadumaduma a kasasaad, natignay ti puso ni Jesus a mangipakita iti asi. Naipadto iti Biblia a ni Jesus “maasianto iti daydiay nanumo.” (Salmo 72:13) Pudno nga inkabilangan ni Jesus ti rikrikna dagiti sabsabali. Nagdisnudo a tumulong kadagiti tattao. Asi ti nangtignay kenkuana a mangasaba. Kitaentayo no kasano nga ipalgak dagiti Ebanghelio ti nadungngo nga asi a naiparangarang iti sasao ken tigtignayna ken no kasano a maipakitatayo ti umasping nga asi.

Panangikabilangan iti Rikrikna Dagiti Sabsabali

5, 6. Aniada a pagarigan ti mangipakita a mannakipagrikna ni Jesus?

⁵ Mannakipagrikna unay ni Jesus. Maawatanna ti rikna dagidiay agsagsagaba ken nakipagrikna kadakuada. Nupay saanna a napasaran ti amin a kasasaadda, pudno a nasnaayan ti pusona gapu kadagiti rigat a sagsagabaenda. (Hebreo 4:15) Idi pinaimbagna ti maysa a babai a 12 a tawenen nga agsagsagaba iti panagbulos ti dara, kinunana a ‘nadagsen a sakit’ ti an-annayen ti babai. Ipakita daytoy a maawatan ni Jesus ti nakaro a rigat a sagsagabaen ti babai gapu iti sakitna. (Marcos 5:25-34) Idi nakitana nga agsangsangit ni Maria ken dagiti dadduma pay gapu iti ipapatay ni Lazaro, natignay ti pusona ket kasta unay ti ladingitna. Nagarubos dagiti luana uray no ammona a pagungarenna ni Lazaro.​—Juan 11:33, 35.

⁶ Iti sabali a gundaway, adda agkukutel nga immasideg ken ni Jesus ket nagpakpakaasi: “No kayatmo laeng koma, kabaelannak a dalusan.” Uray no pulos a saan a nagsakit ni Jesus agsipud ta perpekto, ania ti reaksionna? Natignay ti pusona gapu iti kasasaad ti agkukutel. Kinapudnona, “simnek ti asina.” (Marcos 1:40-42) Ket adda nakaskasdaaw nga inaramidna. Pagaammona nga iti babaen ti Linteg, maibilang a narugit dagiti agkukutel isu a saan a rumbeng a makipulapolda kadagiti tattao. (Levitico 13:45, 46) Kabaelan la ketdi ni Jesus a paimbagen daytoy a lalaki uray no saanna a sagiden. (Mateo 8:5-13) Ngem inyunnatna ti imana ket sinagidna ti agkukutel. Kinunana: “Kayatko. Madalusanka koma.” Dagus nga immimbag ti agkukutel. Anian a nagdungngo a pannakipagrikna ti impakita ni Jesus!

7. Ania ti makatulong kadatayo a makipagrikna, ken kasanotay a maipakita ti pannakipagriknatayo?

⁷ Kas Kristiano, rumbeng a tuladentayo ti kinamannakipagrikna ni Jesus. Idagadag ti Biblia nga ipakitatayo ti “pannakipagmaymaysa ti rikna.”b (1 Pedro 3:8) Mabalin a saan a kaskarina a matarusantayo ti rikna dagidiay agsagsagaba iti nakaro a sakit wenno agledleddaang, nangruna no ditay pay nakapasar iti kasta. Ngem laglagipem a mabalintay ti makipagrikna uray no saantay pay a napasaran dagiti umasping a kasasaad. Nakipagrikna ni Jesus kadagiti masakit nupay pulos a saanna a napadasan ti nagsakit. Kasanotay ngarud a masursuro ti makipagrikna? Babaen ti siaanus a panagimdeng no dagiti agsagsagaba iyebkasda ti rikriknada. Mabalintay nga isaludsod iti bagitayo, ‘No siak ti adda iti kasasaadda, ania ngata ti mariknak?’ (1 Corinto 12:26) No ikabilangantayo ti rikrikna dagiti sabsabali, ad-adda a ‘maliwliwatayo dagiti malmaldaangan a kararua.’ (1 Tesalonica 5:14) No dadduma, mayebkas ti pannakipagrikna saan laeng a babaen ti sao no di pay ket babaen ti lulua. “Makipagsangitkayo kadagiti tattao nga agsangit,” kuna ti Roma 12:15.

8, 9. Kasano nga inkabilangan ni Jesus ti rikrikna dagiti sabsabali?

⁸ Nakonsiderar ni Jesus kadagiti sabsabali, ken inkabilanganna ti rikriknada. Lagipem daydi panangyeg dagiti tattao ken ni Jesus iti maysa a lalaki a tuleng ken umel. Nalabit gapu ta nadlawna nga arimbainen daytoy a lalaki gapu iti kasasaadna, adda inaramid ni Jesus a saanna nga inaramid idi pinaimbagna dagiti dadduma. “Inyadayona [ti lalaki] a pribado manipud iti bunggoy.” Idi is-isuda laengen ken awan ti sabali a kumitkita, pinaimbagna ti lalaki.​—Marcos 7:31-35.

⁹ Impakita ni Jesus ti kasta met laeng a konsiderasion idi inyeg kenkuana dagiti tattao ti maysa a bulsek a lalaki ket indawatda a paimbagenna. Ni Jesus “kinibinna ti bulsek a tao” ket “impanna iti ruar ti purok.” Kalpasanna, nalabit tapno saan a mabigla ken masisirap ti lalaki, in-inut ti panangpaimbag kenkuana ni Jesus. (Marcos 8:22-26) Anian a konsiderasion ti impakita ni Jesus!

10. Kasanotay a maikabilangan ti rikrikna dagiti sabsabali?

¹⁰ Kas paspasurot ni Jesus, masapul nga ikabilangantayo met ti rikrikna dagiti sabsabali. Nasken ngarud nga annadantayo ti panagsasaotayo tapno saantay a masair dagiti sabsabali. (Proverbio 12:18; 18:21) Dagiti Kristiano a mangikabkabilangan iti rikna dagiti dadduma ket di rumbeng a mangisawang kadagiti nagubsang, makapabain, ken makalais a sasao. (Efeso 4:31) Dakayo a panglakayen, kasano a maipakitayo ti konsiderasion iti rikna dagiti sabsabali? No mangbalakadkayo, an-anatenyo ti agsao tapno saan a maikkat ti dignidad daydiay balbalakadanyo. (Galacia 6:1) Dakayo a nagannak, kasanoyo a maikabilangan ti rikna dagiti annakyo? No mangdisiplinakayo, ikagumaanyo a saan a mapabainan dagiti annakyo.​—Colosas 3:21.

Panagdisnudo a Tumulong Kadagiti Sabsabali

11, 12. Aniada a salaysay iti Biblia ti mangipakita a nagdisnudo ni Jesus a mangngaasi kadagiti sabsabali?

¹¹ Nangipakita ni Jesus iti asi saan laeng a gapu ta kiniddawda dayta kenkuana. Kinapudnona, ti asi gutugotenna ti maysa a tao nga agtignay, tumulong. Di ngarud pakasdaawan a ti nadungngo nga asi ti nangtignay ken ni Jesus nga agdisnudo a tumulong kadagiti sabsabali. Kas pagarigan, idi nagtalinaed dagiti nakaad-adu a tattao iti ayan ni Jesus iti tallo nga aldaw nga awan a pulos ti kinkinnanda, saanen a nasken pay nga adda mangibaga ken ni Jesus a mabisin dagiti tattao wenno adda mangisingasing a masapul nga asikasuenna ida. Kuna ti salaysay: “Inayaban ni Jesus dagiti adalanna ket kinunana: ‘Maasianak iti bunggoy, agsipud ta tallo nga aldawen a nakipagtalinaedda kaniak ket awan makanda; ket diak kayat a pagawiden ida a mabisbisin. Mabalin nga agkapuyda iti dalan.’” Ket iti kabukbukodanna a nakem, namilagruan a pinakanna dagiti tattao.​—Mateo 15:32-38.

¹² Usigem ti sabali pay a salaysay. Idi 31 K.P., idi adda ni Jesus iti asideg ti siudad ti Nain, adda naranaanna a nakalkaldaang a kasasaad. Apag-isu a rummuar dagiti tattao iti maysa a pumpon, a nalabit agturongda iti pagitaneman nga adda iti asideg a turod, tapno itabonda ‘ti bugbugtong nga anak a lalaki ti maysa a balo.’ Mailadawanmo kadi ti saem a narikna ti ina? Mapanna itabonen ti kakaisuna nga anakna, ket bukbukodanna ti lidayna ta natay metten ti asawana. Kadagiti amin a nakipamumpon, ti balo a natayan iti anak ti “nakita” ni Jesus. Natignay ti pusona a nakakita iti balo​—wen, “simnek ti asina” kenkuana. Awan ti nagpakpakaasi kenkuana no di ket nagtignay iti kabukbukodanna a nakem gapu ta naasian. Ngarud, “immasideg ket sinagidna ti idda ti natay,” sa pinagungarna ti agtutubo. Ania ti simmaruno a napasamak? Saan nga imbaga ni Jesus iti agtutubo a kumuyog kadagiti tattao a kaduana nga agturong idiay Jerusalem. Imbes ketdi, ‘intedna ti agtutubo iti inana’ tapno saan nga agmaymaysa ti balo nga inana ken adda agaywan kenkuana.​—Lucas 7:11-15.

13. Kasano a matuladtayo ni Jesus no maipapan iti panagdisnudo a tumulong kadagidiay agkasapulan?

¹³ Kasano a matuladtayo ti ulidan ni Jesus? Siempre, awan ti pannakabalintayo a mangpakan iti namilagruan a pamay-an wenno mangpagungar iti natay. Nupay kasta, matuladtayo ni Jesus babaen ti panagdisnudo a tumulong kadagiti agkasapulan. Mabalin nga adda nakaro a pinansial a parikut ti kapammatiantayo wenno naawanan iti trabaho. (1 Juan 3:17) Nalabit nasken a matarimaan a dagus ti pagtaengan ti maysa a balo. (Santiago 1:27) Nalabit adda ammotayo a natayan a pamilia nga agkasapulan iti liwliwa wenno saranay. (1 Tesalonica 5:11) Kadagiti kanito ti panagkasapulan, agdisnudotayo a tumulong. (Proverbio 3:27) Asi ti mangtignay kadatayo nga agdisnudo a tumulong no ipalubos ti kasasaadtayo. Ditay liplipatan a ti uray bassit a kinaimbag wenno ti makaliwliwa a sasao a naimpusuan ti pannakaisawangna ket nabileg nga ebkas ti pannakipagrikna.​—Colosas 3:12.

Asi ti Nangtignay Kenkuana a Mangasaba

14. Apay nga impangpangruna ni Jesus ti panangikasaba iti naimbag a damag?

¹⁴ Kas nakitatayo iti Benneg 2 daytoy a libro, nangipasdek ni Jesus iti nagsayaat nga ulidan iti panangikasaba iti naimbag a damag. Kinunana: “Masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Lucas 4:43) Apay nga impangpangrunana daytoy a trabaho? Kangrunaanna gapu iti ayatna iti Dios. Ngem adda sabali pay a nakatignayan ni Jesus: Ti naimpusuan nga asi ti nanggutugot kenkuana a mangipaay iti naespirituan a kasapulan dagiti sabsabali. Kadagiti amin a pamay-anna a nangipakita iti asi, awanen ti napatpateg pay ngem ti panangep-epna iti naespirituan a bisin dagiti tattao. Usigentayo ti dua a pasamak a mangipalgak no kasano ti panangmatmat ni Jesus kadagiti tattao a kinasabaanna. Ti kasta a panangusig matulongannatayo a mangamiris iti motibotayo a mangasaba.

15, 16. Mangdakamatka iti dua a pasamak a mangipalgak no kasano ti panangmatmat ni Jesus kadagiti tattao a kinasabaanna.

¹⁵ Idi 31 K.P., kalpasan ti agarup dua a tawen a naganetget a panangaskasabana, ad-adda pay nga inggaedna ti nangasaba babaen ti ‘panagsursorna kadagiti amin a siudad ken purpurok’ ti Galilea. Natignay ti pusona iti nakitana. Kinuna ti salaysay ni apostol Mateo: “Idi makitana dagiti bunggoy simnek ti asina kadakuada, agsipud ta nalalatan ken naiwarawarada a kasla karkarnero nga awanan pastor.” (Mateo 9:35, 36) Naasian ni Jesus kadagiti gagangay a tattao. Nakitana ti nakalkaldaang a kasasaadda. Ammona nga inrurumen ken naan-anay a binaybay-an ida dagiti mismo a tattao a rumbeng a mangipastor kadakuada​—dagiti panguluen ti relihion. Gapu ta maasian unay, siaanep nga indanon ni Jesus kadagiti tattao ti makaliwliwa a mensahe. Kasapulanda unay ti naimbag a damag maipapan iti Pagarian ti Dios.

¹⁶ Adda umasping a napasamak sumagmamano a bulan kalpasanna, idi umad-adanin ti Paskua idi 32 K.P. Iti daydi a gundaway, limmugan ni Jesus ken dagiti apostolna iti barangay sada naglayag iti Baybay ti Galilea tapno sumapulda iti naulimek a lugar a paginanaanda. Ngem nagtataray ti adu a tattao iti igid ti baybay ket immun-unada ngem iti barangay a dimteng. Ania ti reaksion ni Jesus? “Idi makadissaag, nakitana ti maysa a dakkel a bunggoy, ngem simnek ti asina kadakuada, agsipud ta kaslada karkarnero nga awanan pastor. Ket rinugianna nga isuro ida iti adu a banag.” (Marcos 6:31-34) Maminsan pay, ‘simnek ti asi’ ni Jesus gapu iti nakalkaldaang a kasasaad dagiti tattao. Kas kadagiti “karkarnero nga awanan pastor,” mabisinda iti naespirituan ket awan ti mangasikaso kadakuada. Asi imbes nga obligasion laeng ti nangtignay ken ni Jesus a mangasaba.

17, 18. (a) Ania ti mangtignay kadatayo a mangasaba? (b) Kasano a maaddaantayo iti asi kadagiti sabsabali?

¹⁷ Kas paspasurot ni Jesus, ania ti mangtignay kadatayo a mangasaba? Kas nakitatayo iti Kapitulo 9 daytoy a libro, addaantayo iti annongen, responsabilidad, a mangasaba ken mangaramid kadagiti adalan. (Mateo 28:19, 20; 1 Corinto 9:16) Ngem aramidentayo daytoy saan laeng a gapu ta obligadotayo. Kangrunaan iti amin, ti ayattayo ken ni Jehova ti mangtignay kadatayo a mangikasaba iti naimbag a damag maipapan iti Pagarianna. Mangaskasabatayo met gapu ta maasiantayo kadagidiay saantay a kapammatian. (Marcos 12:28-31) No kasta, kasano a maaddaantayo iti asi kadagiti sabsabali?

¹⁸ Nasken a tuladentayo ti panangmatmat ni Jesus kadagiti tattao​—“karkarnero nga awanan pastor.” Ania ngata ti mariknam no makasarakka iti kordero a nayaw-awan? Gapu ta awan ti pastor a mangiturong kenkuana iti nalangto a pagaraban ken iti ayan ti danum, mabisbisin ken mawaw unay daytoy a nakakaasi a parsua. Saanka kadi a maasian iti dayta a kordero? Saanmo kadi nga ikagumaan a pakanen ken painumen? Mayarig iti dayta a kordero dagiti adu a tattao a saan pay a makaammo iti naimbag a damag. Gapu ta binaybay-an ida dagiti saan a pudno a narelihiosuan a papastor, mabisbisin ken mawawda iti naespirituan ken awan ti napaypayso a namnamada iti masanguanan. Adda kadatayo ti kasapulanda: ti makapasalun-at a naespirituan a taraon ken ti makapagin-awa a danum ti kinapudno a masarakan iti Sao ti Dios. (Isaias 55:1, 2) No panunotentayo ti naespirituan a kasapulan dagiti sabsabali, sumnek ti asitayo kadakuada. No, kas ken Jesus, maseknantayo unay kadagiti tattao, aramidentayo ti amin a kabaelantayo a mangiranud kadakuada iti namnama nga itden ti Pagarian.

19. Ania ti mabalintay nga aramiden tapno magutugot a makiraman a mangasaba ti kualipikadon nga iyad-adalantayo iti Biblia?

¹⁹ Kasano a matulongantayo dagiti sabsabali a mangtulad iti ulidan ni Jesus? Ibagatayon a kayattayo a paregtaen a makiraman a mangasaba ti kualipikadon nga iyad-adalantayo iti Biblia. Wenno nalabit kayattayo a tulongan ti di aktibo a kabsat a makiraman manen a naan-anay iti ministerio. Kasanotay a matulongan dagiti kasta a tattao? Nasken a gutugotentayo ti pusoda. Lagipem nga idi ‘simnek ti asi’ ni Jesus kadagiti tattao, sinursuruanna ida. (Marcos 6:34) No ngarud matulongantay ida a makarikna iti asi, mabalin a matignay ti pusoda a mangtulad ken ni Jesus ken mangisarsarita iti naimbag a damag kadagiti sabsabali. Mabalintay nga isaludsod kadakuada: “Kasano a simmayaat ti biagmo gapu iti panangipangagmo iti mensahe maipapan iti Pagarian? Dagiti ngay tattao a saan pay a makaammo iti daytoy a mensahe​—saan kadi a nasken a mangngeganda met ti naimbag a damag? Kasano a matulongam ida?” Siempre, ti panagayat iti Dios ken ti tarigagay nga agserbi kenkuana ti kangrunaan a mangtignay kadatayo a mangasaba.

20. (a) Ania ti ramanen ti panagbalin a pasurot ni Jesus? (b) Ania ti mausig iti sumaganad a kapitulo?

²⁰ Saan laeng a basta panangipakaammo iti pannursuro ni Jesus ken panangtulad kadagiti inaramidna ti ramanen ti panagbalin a pasurotna. Nasken a patanorentayo ti “kababalin iti isip” nga adda kenkuana. (Filipos 2:5) Anian a yamantayo ngarud ta ipalgak kadatayo ti Biblia ti pampanunot ken rikrikna a naiparangarang iti sasao ken tigtignay ni Jesus! No ammotayo ti “panunot ni Kristo,” ad-adda a masursurotayo ti makipagrikna ken mapatanortayo ti naimpusuan nga asi ket iti kasta matuladtayo ti wagas a pannakilangen ni Jesus kadagiti tattao. (1 Corinto 2:16) Iti sumaganad a kapitulo, usigentayo ti nadumaduma a wagas a panangipakita ni Jesus iti ayat nangnangruna kadagiti pasurotna.