Aglikmut ti Baybay ti Galilea

NAPALIKMUTAN iti turturod iti makin-amianan a Palestina ti ayan ti tamnay ti danumna a danaw iti uneg ti pagilian, a naawagan dayta iti Baybay ti Galilea, Baybay ti Tiberias, wenno Danaw ti Genesaret. (Ladawan iti baba) Naisaad a kasla saniata iti nauneg a labneng, ti danaw ket adda iti agarup 210 m (700 pie) iti baba ti patar ti baybay. Agarup 21 km (13 mi) ti kaatiddogna ken agarup 12 km (7.5 mi) ti kaakabana. Adu a naisangsangayan a pasamak iti ministerio ni Jesus ti naaramid iti daytoy a danaw ken iti aglikmutna.

Sumagmamano a daras a nagsao ni Jesus kadagiti bunggoy a naguummong kadagiti igid ti baybay bayat nga isu adda iti barangay. (Mr 4:1, 2) Ti Capernaum, siudad iti makin-amianan nga igid ti baybay, nagbalin a pagaammo kas “mismo a siudad” ni Jesus, nupay ad-adu ti kaawanna sadiay ta kanayon idi nga agdaliasat. (Mt 9:1; Mr 2:1) Nagna ni Jesus iti rabaw ti dandanum daytoy a baybay ken iti asideg dayta ti nagparanganna kalpasan ti panagungarna.​—Jn 6:1, 16-21; 21:1, 4-19.