NAGSARDENG ni Jesus idi agturturong sadi Cesarea Filipos, ket isut’ mangisursuro iti maysa a bunggoy a kaduana dagiti apostolesna. Inaramidna daytoy nakakelkellaat nga anunsio kadakuada: “Pudno kunak kadakayo adda dadduma kadagiti agtatakder ditoy a didanto maramanan ni patay agingga iti makitada ti Anak ti tao nga um-umay iti pagaraianna.”

‘Aniat’ kayat a sawen koma ni Jesus?’ mabalin a dagiti adalan ti agpampanunot. Agarup maysa a lawas kamaudiananna, inkuyog ni Jesus da Pedro, Santiago, ken Juan kenkuana ket simmang-atda iti maysa a bantay a natayag. Kaawatan a daytat’ rabii, agsipud ta makaturturog dagiti adalan. Bayat nga agkarkararag ni Jesus, nagbalbaliw ti langana iti imatangda. Naglawag ti rupana a kas init, ket dagiti pagan-anayna nagbalinda a napudaw a kas iti lawag.

Anian a makapapigsa daytoy a sirmata, agpadpada ken Jesus ken kadagiti adalanna! Ti sirmata, kaiyariganna ti pakpakauna ti dayag ti Pagarian ni Kristo. Kaiyariganna, nakita dagiti adalan, ti “Anak ti tao nga um-umay iti pagarianna,” kas inkari ni Jesus maysa a lawas a nasapsapa. Kalpasan ti ipapatay ni Jesus, nagsurat ni Pedro maipapan iti ‘panagbalinda a saksi iti kinadayag ni Kristo bayat ti kaaddada a kaduana iti nasantuan a bantay.’