Ipangagyo Kadi ti Ayat ni Jesus?

“Ti ayat nga adda ken Kristo pilitennakami.”​—2 CORINTO 5:14.

1. Kasano a mabalin a madeskribir ti ayat ni Jesus?

PUDNO unay, anian a nakaskasdaaw ti ayat ni Jesus! No usigentayo no kasano nga isut’ di mailadawan a nagsagaba bayat nga impaayna ti subbot, a babaen laeng iti dayta a mabalintayo a maragpat ti biag nga agnanayon, sigurado a ti puspusotayo ket matignay buyogen panangapresiar kenkuana! Ni Jehova a Dios ken ni Jesus a mismo ti nangiyussuat. Inayatdatayo nga immuna, idinto ta managbasoltayo pay laeng. (Roma 5:6-8; 1 Juan 4:9-11) Ti panangammo “iti ayat ni Kristo,” insurat ni apostol Pablo, “daeganna ti pannakaammo.” (Efeso 3:19) La ketdi, ti ayat ni Jesus ringbawanna unay dagiti akademiko a pannakaammo a naipempen iti panunot. Lab-awanna ti aniaman a nakitan wenno napasaranen dagiti tattao.

2. Aniada ti di makalapped ken Jesus iti panangayatna kadatayo?

² Iti panagsuratna kadagiti Kristiano idiay Roma, insaludsod ni Pablo: “Siasino ti mangisina kadatayo manipud iti ayat ni Kristo? Ti kadi rigat wenno ladingit wenno pannakaidadanes wenno bisin wenno kinalamolamo wenno peggad wenno kampilan?” Awan kadagita a bambanag ti makalapped ken Jesus iti panangayatna kadatayo. “Ta diak duaduaen,” intuloy ni Pablo, “nga uray ni patay wenno ti biag wenno dagiti anghel wenno dagiti pagturayan wenno dagiti bambanag nga agdama wenno dagiti bambanag nga umayto wenno dagiti pannakabalin wenno ti kinangato wenno kinababa wenno aniaman a sabsabali a parsua didatay mabalin nga isina iti ayat ti Dios nga adda ken Kristo Jesus nga Apotayo.”​—Roma 8:35-39.

3. Ania laeng ti makagapu iti panangpanaw kadatayo ni Jesus ken ni Amana?

³ Ti ayat ni Jehova a Dios ken ni Jesus kadakayo ket kasta kabileg. Maymaysa laeng a banag ti makalapped kadakuada a mangayat kadakayo, ket dayta isu ti bukod a sipapakinakem a pananglaksidyo iti ayatda babaen panagkedked nga agaramid iti kiddawenda. Naminsan inlawlawag ti maysa a mammadto ti Dios iti maysa nga ari ti Judea: “Ni Jehova adda kadakayo bayat ti kaaddayo kenkuana; ket no isu ti sapulenyo, ipalubosna ti pannakasarakyo kenkuana, ngem no isu ti baybay-anyo baybay-annakayto.” (2 Cronicas 15:2) Asino kadatayo ti mayat a tumallikud manipud kakasta a nakaskasdaaw, naasi a gagayyem kas ken Jehova a Dios ken ti Anakna, ni Jesu-Kristo?

Umiso a Panangipangag iti Ayat ni Jesus

4, 5. (a) Kasanot’ rebbeng a panangapektar ti ayat ni Jesus kadatayo kadagiti pannakirelasiontayo iti pada a tao? (b) Siasino pay ti rebbengtayo a pakatignayan nga ayaten gapu iti ayat ni Jesus kadatayo?

⁴ Kasanonakayo nga apektaran a personal ti di nakedngan nga ayat ni Jesus kadakayo? Kasanot’ rebbeng a pannakaapektaryo? Bueno, impakita ni Jesus no kasano a ti panangiparang ni Jesus iti ayat rebbeng nga apektaranna ti pannakilangenlangentayo kadagiti padatayo a tao. Kalpasan sipapakumbaba a panagserbina kadagiti apostolna babaen panangbuggona kadagiti sakada, kuna ni Jesus: “Ta inikkankayo ti pagtuladan, tapno, kas met laeng iti inaramidko kadakayo, aramidenyo met koma.” Innayonna: “Maysa a bilin a baro ti itdek kadakayo, tapno agayan-ayatkayo iti maysa ken maysa; kas iti panangayatko kadakayo, kasta met agayan-ayatkayo koma iti maysa ken maysa.” (Juan 13:15, 34) Nakasursuro dagiti adalanna, ket natignayda a mangpadas a mangaramid kas iti inaramidna. “Gapu itoy naammuantayo ti ayat,” insurat ni apostol Juan, “agsipud ta isu intedna ti kararuana maipaay kadatayo; ket datayo rebbengtay nga ited dagiti kararuatayo maipaay kadagiti kakabsattayo.”​—1 Juan 3:16.

⁵ Kaskasdi, masayangtayo ti panggep ti biag ken ministerio ni Jesus no tignayennatayo ti ulidanna tapno laeng ayaten ken pagserbian dagiti interes ti padatayo a tao. Di kadi rebbeng a ti ayat ni Jesus kadatayo tignayennatayo a mangayat met kenkuana ken kangrunaanna ayatentayo ti Amana, isu a nangisuro kenkuana iti amin nga ammona? Ipangagyo kadi ti ayat ni Kristo ken agserbi iti Amana kas inaramidna?​—Efeso 5:1, 2; 1 Pedro 1:8, 9.

6. Kasanot’ panangapektarna ken Pablo ti ayat ni Jesus kenkuana?

⁶ Usigenyo ti kaso ni Saulo, a kamaudiananna naawagan a Pablo. Iti naminsan indadanesna ni Jesus, a “nangiyesngaw iti panangipangta ken panangpapatay kadagiti adalan.” (Aramid 9:1-5; Mateo 25:37-40) Idi pudno a naam-ammon ni Pablo ni Jesus, nagyaman unay gaput’ iyaawatna ti pammakawan nga isut’ saan laeng a situtulok nga agsagaba maipaay ken Jesus no di ket nakasagana met a matay para kenkuana. “Nailansaak a naikuyog ken Kristo,” insuratna. “Saan a siak ti agbiagen . . . Ngarud, ti biag a pagbiagak ita iti lasag pagbiagak iti pammati iti Anak ti Dios, isu a nangayat kaniak ken nangiyawat iti bagina maipaay kaniak.”​—Galacia 2:20.

7. Ti ayat ni Jesus rebbeng a tignayennatayo nga agaramid ti ania?

⁷ Anian a rebbeng a makaguyugoy a bileg kadagiti biagtayo ti ayat ni Jesus kadatayo! “Ti ayat nga adda ken Kristo pilitennakami,” insurat ni Pablo kadagiti taga Corinto, ‘nga agbiag a saanen a maipaay kadagiti bagbagimi, no di ket maipaay iti daydi natay gapu kadakami ken napagungar.’ (2 Corinto 5:14, 15) La ketdi, ti kinamanagyaman ken Jesus gaput’ panangtedna iti biagna para kadatayo rebbeng a tignayennatayo nga agaramid iti aniaman a kiddawenna. Iti daytoy laeng a pamay-an a mapaneknekantayo nga isut’ pudpudno nga ay-ayatentayo. “No ayatendak, tungpalenyo dagiti bilinko,” kuna ni Jesus. “Ti addaan kadagiti bilbilinko ket tungpalenna ida, isu dayta ti agayat kaniak.”​—Juan 14:15, 21; idiligyo ti 1 Juan 2:3-5.

8. Kasano a ti ayat ni Jesus inapektaranna ti biag dagiti adu a managbasol?

⁸ Apaman a naadalda dagiti bilin ni Jesus, dagiti mannakiabig, mannakikamalala, homoseksual, mannanakaw, managbartek, ken managpaanak idiay kadaanan a Corinto impangagda ti ayat ni Jesus babaen panangisardengda kadagidiay nga ar-aramid. Insurat ni Pablo maipapan kadakuada: “Nadalusankayon, . . . naibilangkayon a nalinteg iti nagan ni Apotayo a Jesu-Kristo.” (1 Corinto 6:9-11) Umasping unay, ti ayat ni Jesus ti nangtignay iti adu ita tapno mangaramid kadagiti dadakkel a panagbalbaliw iti biagda. “Dagiti pudno a balligi iti Kinakristiano ket makita iti panagbalin a naimbag a tattao dagidiay mangbigbig kadagiti doktrinana,” insurat ni historiador a John Lord. “Adda pammaneknektayo kadagiti di mapilaw a biagda, dagiti di malais a moralda, iti nasayaat a pannakipagilida, ken kadagiti Nakristianuan a sagudayda.” Anian a nagpaiduma ti naaramidan dagiti pannursuro ni Jesus!

9. Aniat’ nainaig iti panagimdeng ken Jesus?

⁹ Sigurado unay, awan panagadal a mabalin nga aramiden ti maysa a tao ita ti napatpateg ngem iti daydiay biag ken ministerio ni Jesu-Kristo. “Kumitakayo a naimbag ken . . . Jesus,” imparegget ni apostol Pablo. “Ngarud, panunotenyo a naimbag daydiay.” (Hebreo 12:2, 3) Kabayatan ti panagbaliw ti langa ni Jesus, imbilin a mismo ti Dios maipapan iti Anakna: “Agimdengkayo kenkuana.” (Mateo 17:5) Nupay kasta, rebbeng a maipaganetget, a ti panagimdeng ken Jesus iramanna ti ad-adda ngem ti basta panagdengngeg laeng iti ibagana. Kaipapanan dayta ti panangtungpal kadagiti bilinna, wen, panangtulad kenkuana babaen panangaramid iti inaramidna iti pamay-an a panangaramidna iti dayta. Ipangagtayo ti ayat ni Jesus babaen panangaramattayo kenkuana kas pagtuladantayo, babaen isusurot a sisisinged kadagiti addangna.

No Aniat’ Kayat ni Jesus nga Aramidentayo

10. Siasinoda ti sinanay ni Jesus ken iti ania a panggep?

¹⁰ Ti komision ni Jesus manipud iti Dios ket isu ti panangikasaba maipapan ti pagarian ni Amana, ket sinanayna dagiti pasurotna nga aramidenda ti isu met laeng a trabaho. “Mapantayo iti sabali a lugar,” kunana kadagiti immuna nga adalanna, “tapno mangasabaak met sadiay, ta maipuon itoy immayak.” (Marcos 1:38; Lucas 4:43) Idi agangay, kalpasan panangsanayna a naimbag kadagiti 12 nga apostol, binilin ida ni Jesus: “Ket no mapankayo, mangasabakayo, a kunkunayo, ‘Ti pagarian ti langit dimtengen.’” (Mateo 10:7) Sumagmamano a bulan kalpasanna, kalpasan panangsanayna kadagiti 70 a sabsabali pay, imbaonna ida buyogen ti bilin a: “Kunayo kadakuada, ‘Immasideg kadakayo ti pagarian ti Dios.’” (Lucas 10:9) Nalawag unay, kayat ni Jesus nga agbalin dagiti pasurotna a manangasaba ken manangisuro.

11. (a) Iti ania a pamay-an a dagiti adalan ni Jesus agaramidda kadagiti dakdakkel a trabaho ngem iti inaramidna? (b) Aniat’ napasamak kadagiti adalan kalpasan a napapatay ni Jesus?

¹¹ Intultuloy ni Jesus a sanayen dagiti adalanna maipaay itoy a trabaho. Kabayatan ti maudi a rabii sakbay ipapatayna, pinaregtana ida buyogen sasao a: “Ti mangalagad ti pammati kaniak, dagiti aramid nga aramidek aramidennanto met; ket dakdakkelto pay ngem dagitoy ti aramidenna.” (Juan 14:12) Dakdakkelto dagiti trabaho dagiti pasurotna ngem dagiti trabahona gapu ta iti ministerioda adayo nga ad-adu a tao ti danonenda iti adayo a nalawlawa a lugar ken para iti at-atiddug a panawen. Kaskasdi, kalpasan pannakapapatay ni Jesus, dagiti adalan ket pinasardeng ida ti buteng. Naglemmengda ket dida intuloy ti trabaho a nangsanayanna kadakuada nga aramiden. Dadduma ti nagsublida payen iti negosio a panagdaklis. Nupay kasta, iti di malipatan a pamay-an, impalnaadna kadagitoy a pito no ania ti kayatna kadakuada, kasta met kadagiti pasurotna, nga aramidenda.

12. (a) Ania a milagro ti inaramid ni Jesus idiay Baybay ti Galilea? (b) Ania, ti nalawag unay, a kayat a sawen ni Jesus idi nga inimtuodna ni Pedro no Isut’ ayatenna “nga ad-adda ngem dagitoy”?

¹² Nagtagilasag ni Jesus ket nagparang idiay Baybay ti Galilea. Aglaylayag dagiti pito nga apostol ngem awan nadaklisda nga ikan iti nagpatnag. Immawag ni Jesus manipud takdang: “Iwayatyo ti iket iti bakrang a makanawan ti barangay ket makaalakayto.” Idi a ti iket simimilagro a napno iti ikan agingga nga urayda la napigpigis, dagidiay nga adda iti barangay nabigbigda a ni Jesus daydiay adda iti igid, ket nagdardarasda a napan iti ayanna. Kalpasan panangipaayna kadakuada iti pammigat, ni Jesus, nalabit kitkitaenna ti adu a natiliwda nga ikan, inimtuodna ni Pedro: “Simon nga anak ni Juan, ad-adda ti panagayatmo kaniak ngem dagitoy?” (Juan 21:1-15) Awan duadua a kayat a sawen ni Jesus, Ad-adda kadi a naisinggalutka iti panagdaklis ngem iti panangasaba a trabaho a nangisaganaak kadakayo nga aramidenyo?

13. Kasano a sibibileg nga imparikna ni Jesus kadagiti pasurotna ti pamay-an a panangipangagda iti ayatna?

¹³ Simmungbat ni Pedro: “Wen, Apo, ammom nga ayatenka.” Simmungbat ni Jesus: “Pakanem dagiti korderok.” Ni Jesus nagimtuod iti maikadua: “Simon nga anak ni Juan, ayatennak kadi?” Simmungbat manen ni Pedro, nga awan duadua buyogen napigpigsa a pammasiguro: “Wen, Apo, sika ammom nga ayatenka.” Imbilin manen ni Jesus: “Ipaarabmo dagiti karnerok.” Nagimtuod ni Jesus iti maikatlo: “Simon nga anak ni Juan, patpatgennak kadi?” Nagladingiten ni Pedro. Sumagmamano la nga aldaw sakbayna, namitlo nga inlibakna nga am-ammona ni Jesus, gapuna a pampanunotenna a pagduduaan ni Jesus ti kinasungdona. Ngarud, iti maikatlo a daras, simmungbat ni Pedro, nalabit iti agpakpakaasi a tono: “Apo, sika ammon dagiti isuamin; sika ammom nga ayatenka.” Simmungbat laeng ni Jesus: “Pakanem dagiti karnerok.” (Juan 21:15-17) Adda kadi panagduadua no ania ti kayat ni Jesus nga aramiden ni Pedro ken dagiti kakaduana? Anian a sibibileg ti panangipariknana kadakuada​—kasta met iti asinoman nga agbalin nga adalanna ita​—a no isut’ ayatenda, makiramanda iti trabaho a panagaramid-adalan!

14. Kadagiti sabsabali pay a gundaway, kasano nga impakita ni Jesus ti pamay-an a rebbeng a panangipangag dagiti adalanna iti ayatna?

¹⁴ Sumagmamano nga aldaw kalpasan dayta a panagsasarita idiay igid ti baybay, nagparang ni Jesus idiay Bantay ti Galilea ket binilinna ti maysa a naragsak a taripnong ti agarup 500 a pasurot: “Inkayo ngarud ket pagbalinenyo nga ad-adalan dagiti tattao iti amin a nasion, . . . nga isursuroyo kadakuada nga aywananda dagiti isuamin a banag nga imbilinko kadakayo.” (Mateo 28:19, 20; 1 Corinto 15:6) Panunotenyo dayta! Dagiti lallaki, babbai, ken ubbing aminda inawatda ti isu met laeng a komision. Kaskasdi idi agangay, kasakbayan unay ti iyuulina idiay langit, imbaga ni Jesus kadagiti adalanna: “Dakayonto dagiti saksik . . . agingga iti ungto ti daga.” (Aramid 1:8) Kalpasan amin dagitoy a pananggutugot, awan duadua a ni Pedro, tawtawen kalpasanna, kunana: “[Ni Jesus] binilinnakami a mangasaba kadagiti tattao ken mangted naan-anay a pammaneknek.”​—Aramid 10:42.

15. Maipapan iti ania nga awan panagduadua?

¹⁵ Awan panagduadua iti no kasanotayo nga ipangag ti ayat ni Jesus. Kas imbagana kadagiti apostolna: “No alagadenyo dagiti bilinko, agtalinaedkayo iti ayatko . . . Dakayo dagiti gagayyemko no aramidenyo ti ibilinko kadakayo.” (Juan 15:10-14) Ti saludsod ket, Ipakitayo kadi ti panangapresiar iti ayat ni Jesus babaen panagtulnog iti bilinna a makiraman iti trabaho a panagaramid adalan? Pudno, mabalin a saan a nalaka daytoy para kadakayo gapu kadagiti nagduduma a rason. Ngem daytat’ saan met a nalaka idi ken Jesus. Usigenyo dagiti panagbalbaliw a nakalikaguman kenkuana.

Suroten ti Ulidan ni Jesus

16. Ania a nakaskasdaaw nga ulidan ti impaay ni Jesus?

¹⁶ Ti bugbugtong nga Anak ti Dios tinagiragsakna ti natan-ok a saad ti nailangitan a dayag a nangatngato ngem kadagiti anghel. Isu ket pudno a nabaknang! Ngem situtulok a pinakurapayna ti bagina, a naiyanak kas maysa a kameng ti nanumo a pamilia, ken dimmakkel iti aglawlaw dagiti masakit, matay a tattao. Inaramidna daytoy gapu kadatayo, kas inlawlawag ni apostol Pablo: “Ammoyo ti di kaikarian a kinamanangaasi ni Apotayo a Jesu-Kristo, nga idinto a nabaknang nagbalin a napanglaw gapu kadakayo, tapno dakayo gapu iti kinapanglawna bumaknangkayo koma.” (2 Corinto 8:9; Filipos 2:5-8) Anian nga ulidan! Anian a panangiparang iti ayat! Awanen sabali pay a nangipaay iti ad-adu wenno nagsagaba iti ad-adda maigapu kadagiti sabsabali. Ken awan nakapagbalin a posible para kadagiti sabsabali tapno tagiragsakenda dagiti dakdakkel a kinabaknang, wen, biag nga agnanayon iti kinaperpekto!

17. Ania a kurso ti naituyang iti sanguanantayo, ket anianto ti pagbanagan ti panangsurot iti dayta?

¹⁷ Masurottayo ti ulidan ni Jesus ken umasping met a magunggonaantayo dagiti sabsabali. Maulit-ulit, pinaregta ni Jesus dagiti tattao nga agbalinda a pasurotna. (Marcos 2:14; Lucas 9:59; 18:22) Kinapudnona, insurat ni Pedro: “Ta maipaay iti daytoy a naawiskayo, ta ni Kristo nagsagaba met gapu kadakayo, a nangibati kadakayo iti ulidan tapno surotenyo a sisisinged dagiti addangna.” (1 Pedro 2:21) Ipangagyo kadi ti ayat ni Jesus uray agingga iti panagsagaba tapno mapagserbian ti Amana kas inaramidna? Anian a makagunggona kadagiti sabsabali ti kasta a kurso! La ketdi, babaen panangsurot iti ulidan ni Jesus, babaen naan-anay a panangipakat kadagiti pannursuro nga inawatna ken Amana, “isalakanmonto ti bagim ken dagidiay dumngeg kenka.”​—1 Timoteo 4:16.

18. (a) Ania nga ulidan ti intuyang ni Jesus maipanggep iti kababalinna kadagiti tattao? (b) Kasanot’ panagtignay dagiti tattao iti personalidad ni Jesus?

¹⁸ Tapno matulongan a naimbag dagiti tattao, masapul a ti riknatayo kadakuada ket kas iti rikna ni Jesus. Kuna ti maysa a padto maipanggep kenkuana: “Mangaasinto kadagiti napanglaw ken makasapul.” (Salmo 72:13) Mapaliiw dagiti pasurotna a ni Jesus “nariknana ti ayat” kadagidiay nakisaritaanna ket pudno unay a kayatna a tulongan ida. (Marcos 1:40-42; 10:21) “Iti pannakakitana kadagiti bunggoy,” kunaen ti Biblia, “simnek ti asina kadakuada, gapu ta nalidayda ken kasda la karnero nga awan pastorna.” (Mateo 9:36) Uray dagiti nakaro a managbasol nariknada ti ayatna ket naiyasidegda kenkuana. Babaen iti tono ti timekna, taktakderna, ken ti wagas ti panangisurona, napainanaanda. Kas nagbanaganna, isut’ sinarak uray dagiti nalalais a managsingir ti buis ken dagiti balangkantis.​—Mateo 9:9-13; Lucas 7:36-38; 19:1-10.

19. Kasanot’ panangtulad ni Pablo ken Jesus, ket anianto ti resulta ti panangaramidtayo iti kasta?

¹⁹ Dagiti umuna-siglo nga adalan ni Jesus tinuladda ti naayat nga ulidanna. Nagsurat ni Pablo kadagiti dadduma a nagserbianna: “Nagbalinkami a naemma iti tengngayo, kas iti ina nga agtagibi dungdunguenna dagiti annakna met laeng . . . Kas maysa nga ama kadagiti annakna, intultuloymi ti panangbagbaga iti tunggal maysa kadakayo, ken panangpakired ken panangsaksi kadakayo.” (1 Tesalonica 2:7-11) Mariknayo kadi ti isu met laeng a napudno a pannakaseknan kadagidiay adda iti teritoriayo a kas marikna dagiti naayat a nagannak kadagiti dungdunguenda nga annak? Ti panangiparang ti kasta a pannakaseknan iti tono ti timekyo, ti ebkas ti rupayo, ken dagiti tignayyo pagbalinenna a makaallukoy ti mensahe ti Pagarian kadagiti marakarnero a tattao.

20, 21. Aniada ti sumagmamano a moderno aldaw a pangarigan dagiti tattao a nangsurot iti ulidan ni Jesus iti ayat?

²⁰ Maysa a nalam-ek nga aldaw idiay España, dua a Saksi ti nakasarak iti nataengan a babai a nakalangkapi a ti balayna ket nakalamlamiisen gapu ta naibus ti pagsungrodna iti paginuduan. Ur-urayenna ti barona nga agawid manipud trabahona tapno mangayo. Nangayo dagiti Saksi, ket nangibatida met kadagiti magasin a basaenna. Idi simmangpet ti barona, isut’ nasdaaw met iti naayat a pannakaseknan dagiti Saksi ken nanangna ket binasana dagiti literatura, inrugina ti agadal iti Biblia, nabautisaran, ket di nagbayag simrek iti kinapayunir a ministerio.

²¹ Idiay Australia maysa a lalaki ken ni baketna ti nangilawlawag kadagiti sumarsarungkar a Saksi nga awan kuartada a pangbiag iti pamiliada. Pimmanaw ti agassawa a Saksi ket nangiyegda kadagiti pagbiag, agraman sinam-it para kadagiti ubbing. Naganug-og ken nagsangit dagiti nagannak, a kunkunada a naleddaangda unay ket pampanunotendan ti agbekkel. Agpadada a nangrugi nga agadal ti Biblia, ket ti babai ti nabautisaran iti nabiit pay. Maysa a babai idiay Estados Unidos a kagurgurana unay dagiti Saksi ni Jehova impadamagna kalpasan pannakasabetna iti maysa a Saksi. “Pudno a diak malagip no ania ti nagsaritaanmi, ngem ti malagipko ket no kasano ti kinaasina kaniak, ken no kasano ti kinamanagpadagus ken kinapakumbabana. Pudno a naiyadaniak kenkuana kas maysa a tao. Tagipatgek ti pannakigayyemna agingga iti daytoy nga aldaw.”

22. Kalpasan panangsukimat iti biag ni Jesus, aniat’ maikunatayo maipapan kenkuana?

²² No ipangagtayo ti ayat ni Jesus babaen panangaramid iti trabaho nga inaramidna iti pamay-an a panangaramidna iti dayta, anian a nakaskasdaaw a bembendision ti matagiragsaktayo! Ti kinatan-ok ni Jesus ket naminar ken aglaplapusanan. Matignaytayo a mangikallangogan kadagiti sasao ni Romano a gobernador a Poncio Pilato: “Adtoy! Ti tao!” Wen, la ketdi, “Ti tao,” ti katan-okan a tao a nagbiag pay laeng.​—Juan 19:5.

Kasanot’ Panangsungbatmo?

◻ Kasano kadakkel ti ayat ni Jesus?

◻ Ti ayat ni Jesus tignayennatayo a mangayat kadagiti siasino, ken ti ayatna rebbeng a tignayennatayo nga agaramid ti ania?

◻ Ania a trabaho ti kayat ni Jesus nga aramidentayo?

◻ Kasano a ni Jesus ket nabaknang, ket apay a nagbalin a napanglaw?

◻ Kasano ti rebbeng a panangtuladtay ken Jesus iti pamay-an ti panagserbina kadagiti tao?

[Ladawan iti panid 15]

Intuyang ni Jesus ti pagsurotan iti panangipakita iti ayat

[Ladawan iti panid 17]

Sibibileg nga inyilustrar ni Jesus no kasano ti rebbeng a panangiparangarang dagiti adalanna ti ayat kenkuana