Kasanonakayo nga Apektaran ti Panagbaliw ti Langa ni Kristo
Uppat a lallaki ti kasangsang-atda iti natayag a bantay. Kadagidiay nga alimpatok adda karkarna a napasamak. Bayat a kumitkita dagiti tallo a naklaat a pasurot ni Jesus, isut’ nagbaliw iti panagkitada. Agimdengkayo bayat a ti mannurat ti Ebanghelio a ni Marcos ipadamagna daytoy a makaparagsak a pasamak:
“INKUYOG ni Jesus da Pedro ken Santiago ken Juan, ket impanna ida iti natayag a bantay nga is-isuda laeng. Ket nagbalbaliw ti langana iti sangoda, ket dagiti pagan-anayna nagbalinda a naraniag, adayo a napudpudaw ngem iti panangpapudaw ti siasinoman a managlaba ditoy daga. Kasta met, nagparang kadakuada ni Elias agraman ken Moises, nga addada a makisasao ken Jesus. Ket bimmallaet ni Pedro ket kunana ken Jesus: ‘Mannursuro, nasayaat nga aggiantayo ditoy, ket agaramidkami iti tallo nga abong, maysa ti maipaay kenka maysa ken Moises ken maysa ken Elias.’ Kinapudnona, dina idi ammo no ania ti isungbatna, ta addada a sibubuteng unay. Ket immay ti maysa nga ulep, a nangabbungot kadakuada, ket naggapu iti ulep ti maysa a timek: ‘Daytoy ti Anakko, a dungdungnguek; denggenyo.’ Ket iti apagdarikmat, nupay kasta, kimmitada iti aglawlawda ket awan ti nakitadan, no di ni Jesus a maymaysa a naikuyog kadakuada.”—Marcos 9:2-8.
Panunotenyo laengen! Nagraniag ti rupa ni Jesus kas iti init met laeng. (Mateo 17:2) Dagiti pagan-anayna sumilsilapda, “adayo a napudpudaw ngem iti panangpapudaw ti siasinoman a managlaba ditoy daga.” Adda idi ti aweng ti mismo a natbag a timek ti Dios a mangipakpakaammo maipapan iti Anakna. Anian a nakaskasdaaw a pasamak!
Ti Griego a sao a naipatarus ditoy a “nagbaliw ti langana” kaipapananna ti “masukatan iti sabali a porma.” Agparang met daytoy idiay Roma 12:2, a sadiay dagiti Kristiano nabalakadanda a “mabaliwanda” babaen ti panangbalbaliwda kadagiti panunotda.—An Expository of New Testament Words, ni W. E. Vine, Tomo IV, panid 148.
Wen, maysa a dramatiko a pasamak ti naangay idi nagbaliw ti langa ni Jesus sumagmamano a tiempo kalpasan ti panangrambak ti Paskua iti 32 K.P. Aniat’ nangituggod iti daytoy a milagro? Addaan kadi daytoy ti naisangsangayan a panggep? Apay a nairaman da Moises ken Elias? Ken kasanonakayo nga apektaran ti panagbaliw ti langa ni Kristo?
Dagiti Pasamak Kasakbayanna
Sakbay ti iyuulida iti bantay, adda da Jesus ken dagiti pasurotna idiay kaparanget ti Cesarea Filipos. Gapu ta daytoy a siudad ket agarup 25 a kilometro iti abagatan a laud ti Bantay Hermon, ti panagbaliw ti langa mabalin a napasamak idiay maysa kadagiti nangato nga aringgawisna.
Bayat a magmagnada agturong idiay “natayag a bantay,” inimtuod ni Jesus dagiti pasurotna: “Siasinoak ti kuna dagiti tattao?” Simmungbatda: “Ni Juan a Mammautisar, ket dagiti sabsabali, Ni Elias, dagiti sabsabali pay, Maysa kadagiti mammadto.” Idin insaludsod ni Kristo: “Dakayo, nupay kasta, siasinoak ti panagkunayo?” Simmungbat ni Pedro: “Sika ti Kristo.” Iti dayta, ni Jesus “siiinget a binilinna ida a dida ibagbaga iti siasinoman ti maipapan kenkuana. Kasta met, inrugina nga insuro ida a ti Anak ti tao masapul a lumasat kadagiti adu a panagsagaba ken ilaksid dagiti lallakay ken dagiti nangato a padi ken dagiti eskriba ken mapapatay, ken agungar kalpasan ti tallo nga aldaw.”—Marcos 8:27-31.
Inlayon ni Jesus ti nagkari: “Adda dadduma kadagiti sitatakder ditoy a didanto pulos maramanan ni patay agingga iti makitada nga umuna ti pagarian ti Dios nga umay iti pannakabalinna.” (Marcos 9:1; Mateo 16:28) Natungpal daytoy a kari “innem nga aldaw kalpasanna,” idi nga agkarkararag ni Jesus ket nagbaliw ti langana iti sango da Pedro, Santiago, ken Juan. Kunaen ni Lucas a napasamak daytoy “walo nga aldaw” kalpasanna, nalawag gapu ta inramanna ti aldaw a pannakaikarina ken daydiay aldaw ti pannakatungpalna.—Mateo 17:1, 2; Marcos 9:2; Lucas 9:28.
Saan a Tagtagainep wenno Parparmata
Ti panagbaliw ti langa ni Jesus ket saan a tagtagainep. Saan koma a naaddaan dagiti tallo nga apostol iti isu met la a tagtagainep, ken inawagan dayta ni Jesus a “sirmata.” Saan nga ipasimudaag dayta ti parparmata, ta ti Griego a sao a nausar idiay Mateo 17:9 ket naipatarus kadagiti sabali pay a paset kas “panagkita.” (Aramid 7:31) Gapuna a dagiti nakabuya ket naan-anayda a siririing, ket kadagiti mata ken lapayagda, talaga a nakita ken nangngegda no ania ti mapaspasamak.—Lucas 9:32.
Siririing unay ngem dina ammo ti sawenna, insingasing ni Pedro ti panagbangon iti tallo nga abong—saggaysa da Jesus, Moises, ken Elias. (Lucas 9:33) Ti ulep a nabukel kas sinao ni Pedro nabatad nga ipasimudaagna ti kaadda ti Dios idiay bantay, kas idiay tolda ti gimong ti Israel idiay let-ang. (Exodo 40:34-38; Lucas 9:34) Ket sigurado a saan a nakaturog dagiti apostol idi “ti Dios Ama” impakaammona: “Daytoy isu ti anakko, ti pinilik. Agimdengkay kenkuana.”—2 Pedro 1:17, 18; Lucas 9:35.
Apay a Nakita ni Moises
Idi napasamak ti panagbalbaliw ti langa, “awan ammo” ni Moises, ta isut’ natay siniglon kasakbayanna. (Eclesiastes 9:5, 10) Kas ken David, isut’ saan pay a napagungar ket ngarud saan a mismo a presente. (Aramid 2:29-31) Ngem apay a nakita ni Moises a kadua ni Kristo iti daytoy a sirmata?
Imbaga ti Dios ken Moises: “Mamangonakto kadakuada iti maysa a mammadto nga aggapu kadagiti kakabsatda, a kas kenka; ket ikabilkonto dagiti saok iti ngiwatna, ket sawennanto kadakuada amin nga ibilinkonto kenkuana.” (Deuteronomio 18:18) Masinunuo unay nga inyaplikar ni Pedro daytoy a padto ken Jesu-Kristo. (Aramid 3:20-23) Malaksid ken Jesus, ni Moises isut’ kadadakkelan a mammadto nga imbaon ti Dios iti nasion ti Israel.
Adda dagiti pagaspingan da Moises ken ti Dakdakkel a Moises, ni Jesu-Kristo. Kas pangarigan, bayat ti kinamaladagada, agpadada a pinarigat dagiti naulpit nga agtuturay, ngem sinigurado ti Dios a mailasat dagitoy nga ubbing. (Exodo 1:20–2:10; Mateo 2:7-23) Dagitoy a lallaki agpadada a nangbusbos iti 40 nga aldaw a panagayunar iti rugi ti karerada kas naisangsangayan nga adipen ni Jehova. (Exodo 24:18; 34:28; Deuteronomio 9:18, 25; Mateo 4:1, 2) Ken da Moises ken Jesus agpadada a nagaramid kadagiti milagro babaen ti pannakabalin ti Dios.—Exodo 14:21-31; 16:11-36; Salmo 78:12-54; Marcos 4:41; Lucas 7:18-23; Juan 14:11.
Inusar ti Dios ni Moises tapno isalakanna ti Israel manipud pannakabalud idiay Egipto, uray met ni Jesus nangiyeg naespirituan a pannakawayawaya. (Exodo 12:37–14:31; Juan 8:31, 32) Naikkan pribilehio ni Moises a mangibaet iti Linteg ti tulag iti Dios ken dagiti Israelitas, idinto a ni Jesus ti Manangibabaet iti baro a tulag. (Exodo 19:3-9; 34:3-7; Jeremias 31:31-34; Lucas 22:20; Hebreo 8:3-6; 9:15) Inusar met ni Jehova ni Moises tapno isut’ mangaramid ti nagan maipaay Kenkuana iti sango dagiti Israelitas, dagiti Egipcio, ken sabsabali pay, a kas met iti panangitan-ok ni Jesus iti nasantuan a nagan ni Jehova. (Exodo 9:13-17; 1 Samuel 6:6; Juan 12:28-30; 17:5, 6, 25, 26) Babaen ti panagparang ni Moises a kadua ni nagbaliw langana a Jesus, impakita ti Dios nga agserbi ni Kristo kadagitoy a kapasidad iti adayo a dakdakkel a rukod.
Apay a Nagparang ni Elias
Nupay saan pay a napagungar ti natayen a mammadto nga Elias, maitutop nga isut’ agparang iti sirmata ti panagbaliw ti langa. Dakkel naaramidan ni Elias iti panangisubli ti nadalus a panagdaydayaw ken pannakasantipikar ti nagan ni Jehova kadagiti Israelitas. Inaramid ni Jesus ti isu met laeng idi adda ditoy daga ken ad-addanto pay nga aramidenna tapno isublina ti nadalus a relihion ken itan-okna ti nailangitan nga Amana babaen iti Mesianiko a Pagarian.
Impakita ni mammadto a Malakias a ti trabaho ni Elias inyaniniwanna ti masanguanan nga aramid. Baeten ken Malakias, kuna ti Dios: “Adtoy! Ibaonkonto kadakayo ni Elias a mammadto sakbay iti iyaay ti dakkel ken nakakigkigtot nga aldaw ni Jehova. Ket isublinanto ti puso dagiti amma kadagiti annak, ken ti puso dagiti annak kadagiti ammada; di la ket ta siak umayak ket kabilek ti daga iti panangilunod.”—Malakias 4:5, 6.
Naaddaan daytoy a padto ti bassit a kaitungpalan iti trabaho ni Juan a Mammautisar. Impatuldo daytoy ni Jesus kalpasan ti panagbaliw ti langana, idi insaludsod dagiti pasurotna no apay a kinuna dagiti eskriba a masapul nga umay nga umuna ni Elias—sakbay ti panagparang ti Mesias. Kuna ni Jesus: “Pudno, ni Elias, umay nga umuna ket tarimaanennanto dagiti amin a banag. Ngem kunak kadakayo nga immayen ni Elias ket isu dida nailasin no di ket inaramidda kenkuana ti amin a kinayatda. kasta met ti Anak ti tao agsagabanto kadakuada.” Inayon ti salaysay: “Idin dagiti adalan naawatanda a ni Juan a Bautista ti kinunana kadakuada.”—Mateo 17:10-13.
Inaramid ni Juan ti kas iti trabaho ni Elias idi binautisaranna dagiti Judio a nagbabawi kadagiti basolda maibusor iti Linteg ti tulag. Napatpateg pay, ni Juan isu ti pakpakauna ti Mesias ken inyam-ammona ni Jesu-Kristo. (Mateo 11:11-15; Lucas 1:11-17; Juan 1:29) Ngem apay a ti trabaho ni Juan bassit la a kaitungpalan ti padto ni Malakias?
Iti daytoy a sirmata, ni Elias ket nakita a makisasao ken Jesus. Daytoy ket kalpasan ti ipapatay ni Juan a Mammautisar, ket ngarud ipabpabigbigna a maaramid ti trabaho ni Elias iti masanguanan. Kasta met, impakita ti padto a daytoy a trabaho ket maaramid sakbay “ti dakkel ken nakakigkigtot nga aldaw ni Jehova.” Dayta a nakaparpartak iyaasidegna a pasamak iramanna “ti gubat iti dakkel nga aldaw ti Dios a Mannakabalin-amin” idiay Har–Magedon, wenno Armagedon. (Apocalipsis 16:14-16) Kayat a sawen daytoy a ti masanguanan a pannakaipasdek idi ti nailangitan a Pagarian ti Dios ket un-unaan ti maysa a trabaho a kaibatugan dagiti ar-aramid ni Elias ken ti sandina, ni Eliseo. Ket iti nasurok a maysa a siglo, dagiti moderno-aldaw a Saksi ni Jehova ti mangibakbaklay iti trabaho a mangiramraman ti pannakaisubli ti nadalus a panagdayaw ken ti panangitan-ok iti nagan ti Dios.—Salmo 145:9-13; Mateo 24:14.
Ti Panggepna
Ti panagbaliw ti langa pinakiredna la ketdi ni Jesus kadagiti panagsagaba ken ipapatay a lasatenna iti mabiit. Iti pannakangngegna iti nailangitan nga Amana a nagsao maipapan kenkuana kas ti naanamongan nga Anakna ti nangpabileg la ketdi iti pammati ni Jesus. Ngem aniat’ naaramidan ti panagbaliw ti langa kadagiti sabsabali?
Ti panagbaliw ti langa ni Jesus pinabilegna met ti pammati dagiti nakabuya. Napapatida kadagiti panunotda a ni Jesu-Kristo isut’ Anak ti Dios. Pudno, idinto ta ti Kangrunaan a Pannakangiwat ti Dios, ti Verbo, ket adda idi iti tengngada, nangngegda ti timek ti Dios a mangipakaammo: “Isu daytoy ti Anakko, ti dungdungnguek, isu nga inanamongak.” Nupay nangisawang ni Jehova iti umarngi a pammaneknek idi nabautisaran ni Jesus, innayon ti Dios kabayatan ti panagbaliw ti langa a rebbeng a denggen dagiti pasurot ti Anakna.—Mateo 3:13-17; 17:5; Juan 1:1-3, 14.
Ti panagbaliw ti langa pinabilegna ti pammati iti sabali pay a pamay-an. Bayat ti sirmata, ni Jesus, “Moises,” ken “Elias” nagsasaritada maipapan iti “ipapanaw a naikeddeng a tungpalen [ni Kristo] idiay Jerusalem.” (Lucas 9:31) Ti “ipapanaw” ket naipatarus manipud porma ti Griego a sao nga eʹxo·dos. Daytoy nga exodo, wenno ipapanaw, nalawag nga inramanna agpadpada ti ipapatay ni Jesus ken ti panangpagungar ti Dios kenkuana iti espiritu a biag. (1 Pedro 3:18) Gapuna a ti panagbaliw ti langa pinabilegna ti pammati iti panagungar ni Kristo. Nangnangruna a nangipasdek dayta iti pammati babaen ti panangipaayna iti makaallukoy a pammaneknek a ni Jesus ti agbalinto nga Ari iti Mesianiko a Pagarian ti Dios. Kasta met, impakita ti sirmata a ti Pagarian ket nadayagto.
Ti panagbaliw ti langa pinabilegna met ti pammati iti Nainkasuratan a padto. Agarup 32 a tawen kalpasanna (agarup 64 K.P.), nalagip pay la ni Pedro daytoy a kapadasan ket insuratna: “Saan, saanmi a sinurot dagiti nainsikapan a palpaltuad idi impakaammomi kadakayo ti pannakabalin ken ti iyaay ni Apotayo a Jesu-Kristo, no di ket nasaksian dagiti matami ti dayagna. Ta inawatna iti Dios Ama ti dayaw ken dayag, idi immay kenkuana dagitoy a sasao babaen iti nakaskasdaaw a dayag a kastoy: ‘Daytoy isu ti dungdungnguek nga Anak, isu a pagay-ayatak.’ Wen, dagitoy a sasao nangngegmi nga immay manipud sadi langit idi addakam a naikuyog kenkuana idiay nasantuan a bantay. Ket naaddaankami iti natibtibker a sao ti padto; ket nasayaat ti aramidenyo no addakay a siiimdeng kadakuada a kas iti maysa a silaw a manglawag iti maysa a disso a nasipnget, agingga iti agbannawag ket ti baggak lumtuad, kadagiti pusoyo.”—2 Pedro 1:16-19.
Ti Kaipapananna Kadakayo
Wen, minatmatan ni Pedro ti panagbaliw ti langa ni Jesus kas nabileg a pammasiguro iti naimpadtuan a sao ti Dios. Mabalin a tuktukoyen met ni apostol Juan daytoy a sirmata idi kunana: “Ti Verbo nagbalin a lasag ket nakipagnaed kadatayo, ket nakitami ti dayagna, a kasla iti dayag ti bugbugtong nga anak ti ama; napno iti di kaikarian a kinamanangaasi ken kinapudno.” (Juan 1:14) Umasping unay, ti panagbaliw ti langa kabaelanna nga ipasdek ti pammatiyo iti naimpadtuan a sao ni Jehova.
Ti panagbaliw ti langa ken dagiti naitimpuyog a pasamak pabilgenna ti pammatiyo a ni Jesu-Kristo isut’ Anak ti Dios ken ti naikari a Mesias. Pakirdenna ti pammatiyo iti panagungar ni Jesus iti espiritu a biag idiay langit. Daytoy nakaskasdaaw a sirmata rebbeng a nayonanna met ti pammatiyo iti gobierno ti Dios, ta ti panagbaliw ti langa ket maysa a pakpakauna a buya iti dayag ni Kristo ken turay ti Pagarian.
Makapabileg-pammati unay a maammuan a ti panagbaliw ti langa ni Jesus ket itudtudona ti kaaldawantayo, ita a pimmudnon ti kaadda ni Jesus. (Mateo 24:3-14) Nanipud 1914 isut’ agturturayen kas dinutokan ti Dios nga Ari kadagiti langlangit. Ti inted-Dios nga autoridadna ken pannakabalin ti mausarton iti mabiit maibusor kadagiti amin a kabusor ti nadiosan a turay, a mangilukat ti dalan maipaay iti baro a lubong. (2 Pedro 3:13) Matagiragsakyo dagiti awan patinggana a bendisionna no alagadenyo ti pammati kadagiti nakaskasdaaw a bambanag a nailadawan iti panagbaliw ti langa ni Jesu-Kristo.